Lefaseng ka moka, batho ba bantšhi ba tshwenywa ke mafula ao a senyago. Ekwa dipego tše di latelago:

•   “Matšatšing a sa tšwago go feta, toropong e kgolo ya China go nele pula e kgolo yeo go fetilego mengwaga e ka bago 140 e sa ne. Go tloga ka Mokibelo go fihla ka Laboraro, go nele pula yeo e lekanago dimilimithara tše . . . 744.8.”—AP News, August 2, 2023.

•   “Labone e be e le letšatši la bobedi leo ledimo leo le bitšwago Khanun le tlišitšego dipula tše dikgolo le moya o matla ka borwa bja Japane. Ka gona, ledimo leo le bolaile batho ba babedi. . . . Go letetšwe gore ledimo le le neše pula yeo e lekanago dimilimithara tše 600 dithabeng tša central Taiwan.”—Deutsche Welle, August 3, 2023.

•   “Mafula ao a bilego gona mafelobekeng [kua Nova Scotia] a bakilwe ke dipula tše dikgolo tša medupi tšeo di nelego tikologong ya lebopo la Atlantic kua Canada. Mafula a go swana le a a bile gona mengwaga e 50 e fetilego.”—BBC News, July 24, 2023.

 Beibele e re’ng ka ditiragalo tša go swana le tše?

 Beibele e re re phela nakong yeo e bitšwago ‘mehla ya bofelo.’ (2 Timotheo 3:1) Jesu o boletše e sa le pele gore mehleng ya rena re tlo bona “dilo tše di boifišago,” goba tšeo di tšhošago. (Luka 21:11) Phetogo ya leratadima e dirile gore go se be bonolo go bona e sa le pele gore maemo a boso a tlo ba bjang, a fetofetoge gantšhi e bile a fetiše tekano.

 Beibele e re botša gore dilo tše dintšhi tša go tšhoša tšeo di diregago mo lefaseng di re nea lebaka leo le dirago gore re be le kholofelo. Ka baka la eng? Jesu o itše: “Ge le bona dilo tše di direga, le tsebe gore Mmušo wa Modimo o batametše.”—Luka 21:31; Mateo 24:3.

 Dilo tšeo di diregago di bontšha gore e se kgale Mmušo wa Modimo o tlo laola dilo tša tlhago, tšeo di akaretšago modikologo wa meetse.—Jobo 36:27, 28; Psalme 107:29.

 Go ithuta ka mo go oketšegilego gore Mmušo wa Modimo o tlo lokiša bjang lefase gore le boele boemong bja lona bja peleng, bala sehlogo seo se rego “Who Will Save the Earth?”