Gatee ngwageng o mongwe le o mongwe, Dihlatse tša Jehofa le ba dimilione bao di ba laleditšego go dikologa lefase ka moka ba kopana go ba gona Segopotšong sa lehu la Jesu, bjalo ka ge a laetše. (Luka 22:19) Tiragalo ye e re thuša gore re kwešiše bohlokwa bja seo Jesu a se dirilego ge a be a hwela batho. E laetša gape seo sehlabelo sa gagwe se se bolelago go rena—gona bjale le nakong e tlago.—Johane 3:16.

 Go sa šetšwe ge e ba o bile gona Segopotšong ngwageng wo goba go se bjalo, o ka holwa bjang ke lehu la Jesu la sehlabelo? Jesu o rutile gore re swanetše go dira dilo tše pedi tše bohlokwa:

1.  1. Ithute ka Modimo le Jesu. Thapelong ya gagwe go Tatagwe wa legodimong, Jesu o itše: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.”—Johane 17:3.

2.  2. Diriša seo o ithutago sona. Jesu o gateletše gore re swanetše go diriša dithuto tša gagwe maphelong a rena. Ka mohlala, o phethile Thuto ya gagwe yeo e tumilego ya Thabeng ka go reta yo mongwe le yo mongwe yo ‘a kwago mantšu a [gagwe] gomme a a dira.’ (Luka 6:46-48) Ka mo swanago, lebakeng le lengwe o itše a re: “Ge e ba le tseba dilo tše, le a thaba ge e ba le di dira.”—Johane 13:17.

 Na o ka rata go tseba ka mo go oketšegilego ka Modimo le Jesu? Na o nyaka go tseba gore o ka diriša bjang seo o ithutago sona? Ditsela tše dingwe tšeo di ka go thušago ke tše.

 Thuto ya rena ya mahala ya Beibele e thušitše batho ba bantši go hlahloba seo se lego ka Beibeleng gomme ba se šomiša maphelong a bona.

•   Etela letlakala la Ithute Beibele o Thušwa ke Motho yo Mongwe gore o kwe ka mo go oketšegilego ka thuto ye.

•   Bona bidio ya Re a go Amogela Thutong ya Gago ya Beibele go bona gore go ithuta Beibele le Dihlatse tša Jehofa go dirwa bjang.

 Dihlatse tša Jehofa di kopana gabedi bekeng e nngwe le e nngwe lefelong la bona la borapedi leo le bitšwago Holo ya Mmušo. Dibokeng tše, re ahlaahla Beibele le kamoo re ka dirišago dithuto tša yona maphelong a rena.

 Dibokeng tše batho bohle ba a amogelwa; ga o gapeletšege go ba Hlatse gore o be gona. Go ithekgile ka maemo a lefelong la geno, o ka kgetha go tla holong goba go ba gona ka bidio.

•   Bogela bidio ya Ke Eng Seo se Diregago Holong ya Mmušo? go bona ka boripana seo o ka se letelago dibokeng tše.

•   Hwetša seboka sa kgauswi le mo o lego gona ka go etela letlakala la Diboka tša Phuthego tša Dihlatse tša Jehofa.

 Dingwalwa le dibidio tše dintši mo wepesaeteng ye di ka go thuša go ithuta ka mo go oketšegilego ka dithuto tša Jesu le ka bohlokwa bja lehu la gagwe leo e bilego sehlabelo.

 Ka mohlala, go ithuta kamoo go ka kgonegago gore lehu la motho o tee le hole ba dimilione, bala dihlogo tše di rego, “Jesu o Phološitše Batho Bjang?” le se se rego “Ke ka Baka la Eng Jesu a Ile a Tlaišega le go Hwa? goba o bogele bidio yeo e rego Ke ka Baka la Eng Jesu a Ile a hwa?