Batho ba bantšhi ga ba sa bontšhana mekgwa e mebotse. Balwetši ba kgadimola dingaka, bao ba lego mabenkeleng a go jela ga ba sware bao ba ba neago dijo gabotse, banamedi ba difofane ga ba sware bao ba ba thušago ka botho, bana ba go se kwe ba kwera barutiši e bile ba a ba tšhošetša le go ba hlasela mola bo radipolitiki ba dira dilo tša go šiiša dinama tša mmele e bile ba bangwe ba bona ba itira eka ba lokile.

 Beibele e ka re thuša go tseba gore ke eng seo re ka se dirago gore re be le mekgwa e mebotse. E bile e re botša gore ke ka lebaka la eng batho ba se sa bontšhana botho.

 Go molaleng gore lefaseng ka moka batho ba bantšhi ga ba sa bontšhana botho, elego mekgwa e mebotse yeo e amogelegago.

•   Nyakišišo e nngwe e bontšha gore batho ba bantšhi bao ba dulago Amerika ga ba sa na mekgwa go feta le ge e le neng pele ga e sa le go tloga ka morago ga mengwaga e 22 e fetilego.

•   Ge go be go bolelwa le batho ba ka godimo ga 32 000 ba go tšwa dinageng tše 28, diperesente tše 65 tša batho bao, ba bolela gore, batho lehono ga ba sa bontšhana botho go feta le ge e le neng pele.

 Beibele e boletše e sa le pele ka tsela yeo batho ba itshwarago ka gona lehono.

•   “Mehleng ya bofelo go tla ba le dinako tše di hlobaetšago. Batho e tla ba baithati, barati ba tšhelete, ba go ikgantšha, ba ikgogomošago, barogaki, ba go se kwe batswadi, ba go se leboge, ba go se botege, . . .  ba ba se nago lerato la tlhago, [le] ba bogale.”—2 Timotheo 3:1-3, Phetolelo ya Lefase le Leswa.

 Go hwetša boitsebišo bjo bo oketšegilego gore boporofeta bjo bo phethagala bjang, bala sehlogo seo se rego “Did the Bible Predict the Way People Think and Act Today?”

 Lefaseng leo batho ba se sa bontšhanago mekgwa e mebotse, batho ba dimilione ba hweditše Beibele e le selo seo se ba thušago gore ba bontšhe ba bangwe botho. Dikeletšo tša Beibele “di dula di tshepega gona bjale le go ya go ile.” (Psalme 111:8) Bona mehlala e mmalwa yeo e latelago:

•   Seo Beibele e se bolelago: “Dilo tšohle . . . tše le nyakago batho ba le dira tšona, le lena le ba dire tšona.”—Mateo 7:12.

   Tlhaloso: Re swanetše go swara batho ba bangwe ka botho le ka tlhompho, go etša ka moo le rena re nyakago go swarwa ka gona.

•   Seo Beibele e se bolelago: “Ka gona ka ge bjale le lahlile maaka, yo mongwe le yo mongwe wa lena a bolele therešo le moagišani wa gagwe.”—Baefeso 4:25.

   Tlhaloso: Re swanetše go ba le nnete ka seo re se bolelago le seo re se dirago.

 Go hwetša boitsebišo bjo bo oketšegilego ka taba ye, hle bala:

•   Kgatišo ya Morokami yeo e nago le sehlogo seo se rego “O ka Thušwa ke Eng Gore o Dire Diphetho tše Dibotse?”

•   Le sehlogo seo se rego “Beibele e ka re Thuša Bjang go Kgotlelelana?.”