Ekwa seo baetapele ba go tuma ba bodumedi ba se bolelago ka ntwa kua Ukraine:

•   “Mopatriareka Kirill e lego moetapele wa kereke ya Orthodox kua Russia ga se a bolela selo ka ntwa yeo e lego gona. . . . Kereke ya gagwe e tšwela pele go bolela ditaba tša maaka ka Ukraine e bile Putin o diriša taba yeo go lokafatša ntwa.”—EUobserver, March 7, 2022.

•   “Mopatriareka Kirill . . . o bontšhitše gore o tšea ntwa ya Russia e le karolo ya go lwantšha sebe, ka go realo a bontšha gore o thekga seo Russia e se dirago go Ukraine le gore Russia ga e na molato.”—AP News, March 8, 2022.

•   “Moetapele wa kereke ya Orthodox kua Ukraine e lego “Metropolitan Epiphanius wa mathomo yo a dulago Kyiv, ka Mošupologo o ile a šegofatša mašole a nageng ya gabo gore a ye a lwe le mašole a Russia . . . O boletše le gore go bolaya mašole a Russia ga se sebe.”—Jerusalem Post, March 16, 2022.

•   “Rena [Ukrainian Council of Churches and Religious Organizations (UCCRO)] re thekga mašole a Ukraine le batho ka moka bao ba re lwelago, re a ba rapelela le go ba šegofatša ge ba lwela Ukraine go bao ba e hlaselago.”—UCCRO a Statement, February 24, 2022.

 O nagana’ng? Na madumedi ao a bolelago gore a latela Jesu Kriste a swanetše go kgothaletša ditho tša ona go ya ntweng? Beibele e re’ng ka taba ye?

Kamoo bodumedi bo bego bo dutše bo itshwere ka gona ditabeng tša ntwa

 Bodumedi bo be bo dutše bo thekga ntwa, bo e lokafatša e bile bo kgothaletša gore go iwe ntweng, mola bo itira eka bo kgothaletša gore go be le khutšo. Ke kgale Dihlatse tša Jehofa di bolela gore mediro e bjalo ya bodumedi ke ya boikaketši. Bona mehlala yeo e tšwago dikgatišong tša rena.

•   “The Crusades—A ‘Tragic Illusion’” e bontšha gore kereke ya Roma Khatolika e dirile gore go bolawe batho ba bantši ga sehlogo e diriša leina la Modimo le la Kriste.

•   “Kereke ya Katholika Afrika” e bontšha kamoo bodumedi bo ilego bja palelwa ke go thibela ntwa ya semorafe le go bolawa ga batho ba bantši.

•   Dihlogo tšeo di rego “Is Religion to Blame?,” “Tema Yeo e Kgathwago ke Bodumedi Dintweng tša Batho,” le “Bodumedi bo Tšea Lehlakore” di bontšha kamoo baruti ba Khatolika, ba Orthodox le ba Protestanta ba bego ba thekga dintwa tša dinaga tša bona.

Na Bakriste ba swanetše go thekga ntwa?

 Seo Jesu a se rutilego: “O rate moagišani wa gago ka mokgwa wo o ithatago ka wona.” (Mateo 22:39) “Tšwelang pele le rata manaba a lena.”—Mateo 5:44-47.

 Seo Jesu a se boletšego: “Mmušo wa ka ga se karolo ya lefase le. Ge nkabe mmušo wa ka e be e le karolo ya lefase le, bahlanka ba ka ba ka be ba lwela gore ke se ke ka gafelwa Bajuda.” (Johane 18:36) “Bohle bao ba dirišago tšhoša ba tla bolawa ka tšhoša.”—Mateo 26:47-52.

 Nagana ka se: Ge e ba Bakriste ba be ba sa swanela go lwa gore ba šireletše Jesu, na go ka ba le lebaka le lengwe leo le ka dirago gore ba lwe? Bala sehlogo seo se rego “Na Ntwa e Sepedišana le Bokriste?” go bona kamoo Bakriste ba mehleng ya pele ba ilego ba latela mohlala ya Jesu le dithuto tša gagwe.

Go tlo direga’ng ka madumedi ao a thekgago ntwa?

 Beibele e ruta gore Modimo ga a amogele madumedi ao a ipolelago gore a latela Jesu eupša a sa dire dilo tšeo Jesu a di rutago.—Mateo 7:21-23; Tito 1:16.

•   Puku ya Kutollo e bontšha gore Modimo o bona madumedi ao a ikarabelela ka mahu a “bao ka moka ba bolailwego lefaseng.” (Kutollo 18:21, 24) Gore o tsebe lebaka, bala sehlogo seo se rego “Babilona o Mogolo ke Eng?”

•   Jesu o boletše gore madumedi ka moka ao Modimo a sa a amogelego a tla fedišwa ka baka la mediro ya ona e mebe, go swana le ge sehlare se se bodilego seo se ntšhago dienywa tša go bola ‘se rengwa gomme se lahlelwa mollong.’ (Mateo 7:15-20) Bala sehlogo seo se rego “Bodumedi bja Maaka bo Kgaufsi le go Fela!” go bona gore seo se tlo direga bjang.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images