Morokami wa Seisemane wa June 1, 1912 o itše: “Babadi ba rena ba bantši ba tlwaelane le batho bao ba sa bonego. Ba ka ikhweletša dikgatišo tšeo di phrinthilwego tša mongwalo wa Braille mahala, tšeo batho bao ba sa bonego ba ka kgonago go di bala.” Morokami woo o ile wa tšwela pele ka gore: “Batho ba bantši bao ba sa bonego ba thaba kudu ge ba ekwa molaetša wa gore go tlo ba le ditšhegofatšo nakong e tlago.”

 Ge mantšu ao a lego ka mo godimo a be a ngwalwa, dinaga tše dintši tšeo di bolelago Seisemane di be di na le mekgwa ya go fapana ya go ngwala mongwalo wa Braille. Le ga gole bjalo, Dihlatse tša Jehofa di be di šetše di dirile gore ditherešo tša Beibele di ngwalwe ka mongwalo wa Braille. Le gona bjale re sa tšwela pele re dira bjalo! Ga bjale re na le dikgatišo tša Braille ka maleme a fetago a 50. Mošomo woo o dirwa bjang?

 Mogato wa pele wa go dira dikgatišo tša Braille, ke go fetoša mantšu ao a ngwadilwego ka leleme le itšego gore a ngwalwe ka mongwalo wa Braille. Michael Millen yo a šomago lefapheng la Text Processing Services kua Patterson, New York o hlalosa gore: “Nakong e fetilego re be re diriša mekgwa e mengwe ya thekinolotši yeo ba bangwe ba bego ba e diriša go tšweletša dikgatišo tša Braille, eupša mekgwa yeo e be e sa re thuše go tšweletša dikgatišo tša Braille ka maleme a mangwe ao re bego re a hloka.” O tšwela pele ka gore: “Ga bjale re diriša Watchtower Translation System, go tšweletša dikgatišo tša Braille ka maleme a mantši mo lefaseng. Ke dumela gore ga go na sedirišwa sa go swana le se.”

 Dikgatišo tša Braille di na le ditlhaloso tša diswantšho. Ka mohlala, seswantšho sa ka ntle sa puku ya Braille ya O ka Thabela Bophelo go ya go Ile! se hlaloswa ka gore: “Monna o sepela tseleng ya manyokenyoke yeo e dikologilego ke matšoba a mabotse, mehlare, meboto le dithaba tše dibotse.” Jamshed yo a sa bonego yo e lego mohlanka wa bodiredi e bile e le mmulamadibogo o re: “Ditlhaloso tša diswantšho tše di bohlokwa kudu go nna.”

 Ka morago ga gore dikgatišo tša mongwalo wa batho ba go bona di ngwalwe ka mongwalo wa Braille, di romelwa makaleng ao a dirago dikgatišo tša Braille. Dipuku tšeo di dirwa ka matlakala a makoto gore ge mongwalo wa Braille o gatišwa godimo ga ona a se ke a phulega. Le gona seo se dira gore puku yeo e se ke ya senyega kapela. Ka morago ga moo matlakala a kopanywa ke moka a dira puku yeo e feletšego, ke moka dipuku tšeo di romelwa diphuthegong le dikgatišo tše dingwe. Eupša ge e ba posong ba dumela go romela dikgatišo tša batho ba go se bone mahala, dipuku tšeo di romelwa mahala. Ge e ba go nyakega, diofisi tša makala di tla rulaganya gore di romele dikgatišo tšeo kapelapela go bana babo rena bao ba sa bonego goba bao ba sa bonego gabotse gore ba kgone go di diriša dibokeng tša bona.

 Mošomo woo ka moka o nyaka nako le tšhelete e ntši. Ge e le gabotse motšhene wa rena wa go gatiša wa kua Wallkill, New York, o gatiša di Beibele tše 50 000. Nako yeo e fetšwago go gatišwa di Beibele tšeo, go gatišwa tše pedi fela tša mongwalo wa Braille. Beibele e nngwe le e nngwe ya Braille ya seisemane ya Grade-two e na le di bolumo tše 25. Go nyakega tšhelete e ntši go reka pampiri le dilo tše dingwe go tšweletša di bolumo tšeo, go feta yeo e dirišwago ge go gatišwa di Beibele tša batho ba go bona. a Matlakala a kantle fela a di bolumo tše 25 di ja tšhelete e ka bago R2 300,00.

 Bana babo rena le dikgaetšedi bao ba thušago go tšweletša dikgatišo tša Braille ba ikwa bjang ka mošomo wa bona? Nadia yo a hlankelago lekaleng la Afrika Borwa, o re: “Bana babo rena le dikgaetšedi bao ba sa bonego goba bao ba sa bonego gabotse ba phela boima, ka gona ke bona e le tšhegofatšo gore ke dire se sengwe gore ke ba thuše. Se ke bohlatse bja gore Jehofa o ba rata kudu.”

 Bjale go direga’ng ge e ba motho a sa kgone go bala mongwalo wa Braille? Mengwaga e mmalwa e fetilego, re ile ra tšweletša kgatišo yeo e rego Learn to Read Braille e lego yeo e nago le mongwalo wa Braille le mongwalo woo o tlwaelegilego. E diretšwe gore e dirišwe ke motho yo a sa bonego le yo a bonago. Poroutšha ye ke e nngwe ya didirišwa tšeo di dirišwago ke batho ba go se bone ge ba ngwala mongwalo wa Braille. Batho bao ba ithutago Braille ba diriša didirišwa tše gore ba kgone go ingwalela dihlaka tša Braille. Ge motho yo a ithutago Braille a dutše a ithuta dihlaka tša Braille, se se mo thuša gore a se ke a di lebala le go di tseba ka go di tshwara ka matsogo.

 Bana babo rena le dikgaetšedi bao ba sa bonego gabotse goba bao ba sa bonego ba hotšwe bjang ke dikgatišo tše? Ernst yo a dulago Haiti o be a rata go ya dibokeng, eupša a se na dikgatišo tša mongwalo wa Braille. Ka ge a be a se na tšona, o be a swanetše go gopola dintlha ka moka tša dikabelo tšeo a di neilwego le ge a be a swanetše go nea dikarabo dibokeng. Eupša ga bjale, o re: “Nako e nngwe le e nngwe nka kgona go araba dibokeng. Ke ikwa ke le karolo ya bana babo rena le dikgaetšedi. Ka moka ga rena re hwetša molaetša wa go swana, wa go re kgothatša le woo o tšwago go Jehofa.”

 Jan yo a sa bonego ga botse e bile e le mogolo yo a dulago Austria, yo a swarago Thuto ya Morokami le Thuto ya Beibele ya Phuthego o re: “Dikgatišo tša rena tša Braille di ngwadilwe gabotse, go feta dikgatišo tša Braille tšeo nkilego ka di bala. Ka mohlala, dikgatišo di na le dinomoro tša matlakala, mengwalo ya tlase yeo go lego bonolo go e hwetša le ditlhaloso tša diswantšho tšeo di kwešišegago ga bonolo.”

 Seom-ok, yo e lego mmulamadibogo kua South Korea, ga a kgone go bona le go kwa. Nakong e fetilego o be a diriša polelo ya diatla dibokeng, eupša ga bjale o kgona go ipalela dikgatišo tša Beibele ka mongwalo wa Braille. O re: “Go thata go bala dikgatišo tše dingwe tša Braille ka gore dihlaka tša mongwalo wa Braille ga di kwagale gabotse, letlakala la gona ke le le sesane e bile methaladi ya gona ga se ya lebana. Eupša dikgatišo tša Braille tšeo di gatišitšwego ke Dihlatse tša Jehofa, dihlaka tša tšona di bonolo go di bala le letlakala la gona le tiile.” O tšwela pele ka gore: “Nakong e fetilego ke be ke kgona go ithuta dikgatišo tša Beibele ke thušwa ke batho ba bangwe feela, eupša gona bjale ke kgona go ipalela. Ke thabišwa ke gore ke kgona go lokišeletša diboka tša gare ga beke le go tšea karolo go tšona. Ke thabela go bala dikgatišo ka moka tša Braille. Le ka no re ga ke kgone go tlogela go di bala.”

 Go swana le dikgatišo tša rena tšeo di gatišitšwego, dikgatišo tša Braille le tšona di na le mantšu ao a latelago: “Kgatišo ye ga e rekišwe. E newa batho e le karolo ya modiro wa go ruta ka Beibele wo o dirwago lefaseng ka moka. Modiro wo o thekgwa ka meneelo ya boithatelo.” Re a leboga ge le diriša ditsela tša go fapafapana tšeo di lego go donate.isa4310.com go ntšha meneelo ya lena. Meneelo ya lena e thuša gore go be le di kgatišo tšeo di theilwego Beibeleng go akaretša le tša batho bao ba sa bonego gabotse le ba go se bone.