Numeri 15:1-41
-
Melao ya mabapi le dibego (1-21)
-
Baisiraele le bao e sego Baisiraele ba latele molao o tee (15, 16)
-
-
Dibego tša ge Baisiraele ba dirile phošo ba sa tsebe (22-29)
-
Kotlo ya ge motho a dirile sebe ka boomo (30, 31)
-
Motho yo a sa latelego molao wa Sabatha a bolawe (32-36)
-
Baisiraele ba dire merumo ya mašaphu diaparong (37-41)
15 Jehofa a tšwela pele a bolela le Moshe a re:
2 “Botša Baisiraele o re: ‘Mafelelong ge le fihlile nageng yeo ke le neago yona gore le dule go yona,
3 le tšee phoofolo go tšwa mohlapeng wa lena wa dikgomo goba wa dinku le dipudi gomme le direleng Jehofa sebego sa go fišwa ka mollo, e le gore e be monkgo o bose wo o yago go Jehofa. E ka ba e le sebego sa go fišwa goba sebego se sengwe, e ka ba e le sa go phetha selo seo le tshepišitšego gore le tla se dira, goba sebego sa go ithaopa goba sebego seo se neelwago nakong ya menyanya ya lena.
4 Le gona yo a neelago Jehofa sebego sa gagwe a neele le folouru yeo e šitšwego gabotse ya mo e ka bago khilograma e tee, yeo e tswakilwego ka lithara ya makhura.
5 Ge a neela sebego sa go fišwa goba a dira sehlabelo se sengwe le se sengwe sa kwana e tona, a neele le lithara ya beine e le sebego sa dino.
6 Ge a neela ka nku e tona, a tliše le sebego sa mabele sa dikhilograma tše e ka bago tše pedi sa folouru yeo e šitšwego gabotse yeo e tswakilwego ka makhura a ka godingwana ga lithara.
7 A neele beine ya ka godingwana ga lithara e le sebego sa dino, e le gore a išetše Jehofa monkgo o bose.
8 “‘Eupša ge e ba a neela poo e le sebego sa go fišwa goba sehlabelo sa go phetha selo seo a tshepišitšego gore o tla se dira, goba e le sa dihlabelo tša go dira khutšo le Jehofa,
9 gona o swanetše go neela poo yeo le sebego sa mabele sa folouru yeo e šitšwego gabotse ya dikhilograma tše e ka bago tše tharo le seripa yeo e tswakilwego ka dilithara tše pedi tša makhura.
10 A neele le beine ya dilithara tše pedi e le sebego sa dino, e le sebego sa go fišwa ka mollo gore a išetše Jehofa monkgo o bose.
11 Se ke seo se swanetšego go dirwa ka poo e nngwe le e nngwe, goba ka nku e tona e nngwe le e nngwe, goba ka kwana e tona e nngwe le e nngwe goba ka pudi e nngwe le e nngwe.
12 Le dire bjalo ka phoofolo e nngwe le e nngwe go ya ka palo ya tšona go sa šetšwe gore le neela tše kae.
13 Ye ke tsela yeo Moisiraele yo mongwe le yo mongwe a swanetšego go neela sebego sa go fišwa ka mollo gore a išetše Jehofa monkgo o bose.
14 “‘Ge go ka ba le motho yo e sego Moisiraele yo a dutšego le lena nako e telele, le yena a dire sebego sa go fišwa ka mollo gore a išetše Jehofa monkgo o bose. Le yena a dire sebego seo ka mokgwa woo le se dirago ka gona.
15 Lena bao le lego Baisiraele, le tla latela molao o tee le bao e sego Baisiraele bao ba dulago le lena. Molao wo e tla ba molao wa go ya go ile melokong ya lena ka moka. Bao e sego Baisiraele ba tla swana le lena pele ga Jehofa.
16 Lena le bao e sego Baisiraele bao ba dulago le lena le tla latela molao o tee e bile la ahlolwa go swana.’”
17 Jehofa a tšwela pele a re go Moshe:
18 “Botša Baisiraele o re: ‘Ge le fihla nageng yeo ke le išago go yona,
19 gomme le eja dijo le ge e le dife tša naga yeo, le neele Jehofa moneelo.
20 Le neele ka dinkgwa tša nkgokolo tšeo di dirilwego ka folouru* ya dilo tšeo le di bunnego pele. Le di neele ka tsela yeo le neelago moneelo wo o tšwago seboeng.*
21 E nngwe ya folouru yeo e sego ya šilwa gabotse yeo e dirilwego ka dilo tšeo le di bunnego pele, le e neele Jehofa melokong ka moka ya lena yeo e sa tlago.
22 “‘Bjale ge le ka dira phošo gomme la se latele ditaelo tše ka moka tšeo Jehofa a di boditšego Moshe,
23 e lego dilo ka moka tšeo Jehofa a le laetšego tšona a diriša Moshe go tloga letšatšing leo Jehofa a di boletšego le go iša melokong ya lena yeo e sa tlago,
24 le gona ge e ba le dirile phošo le sa tsebe, ka moka ga lena le neele powana ya sebego sa go fišwa gore le išetše Jehofa monkgo o bose. Le se neele le sebego sa sona sa mabele le sebego sa sona sa dino go ya ka mokgwa woo dibego tša go fišwa di dirwago ka gona. Le gona le neele le putšanyana e tee ya sebego sa sebe.
25 Moperisita a neele dibego tše ka moka gore Modimo a lebalele setšhaba ka moka sa Baisiraele sebe ka ge se dirile phošo. Se tlišetše Jehofa sebego sa go fišwa e bile se neele Jehofa sebego sa sebe ka ge se dirile phošo.
26 Modimo o tla lebalela setšhaba ka moka sa Baisiraele le batho bao ba dulago le bona bao e sego Baisiraele, ka ge e le setšhaba ka moka se dirilego phošo.
27 “‘Ge e ba motho le ge e le ofe a ka dira sebe ka phošo, gona a neele pudi ya tshadi ya ngwaga o tee e le sebego sa sebe.
28 Moperisita a neele pudi yeo gore Jehofa a lebalele motho yoo sebe seo sa gagwe.
29 Baisiraele le batho bao e sego Baisiraele bao ba dulago le bona, ba diriše molao wa go swana ge motho a dirile sebe ka phošo.
30 “‘Eupša ge e ba motho a ka dira sebe ka boomo, a bolela gampe ka Jehofa, e ka ba e le Moisiraele goba e se Moisiraele, motho yoo a bolawe.
31 Ka ge motho yoo a nyaditše Jehofa e bile a se a kwa molao wa gagwe, gona o swanetše go bolawa. Yena o tla ikarabela ka molato wa gagwe.’”
32 Bjale ge Baisiraele ba be ba le lešokeng, ba kile ba hwetša motho yo mongwe a topelela dikgong ka letšatši la Sabatha.
33 Bao ba mo hweditšego a topelela dikgong ba ile ba mo tliša go Moshe le Arone gotee le go setšhaba ka moka.
34 Ke moka ba mo swara ka gobane go be go se gwa tšwa go tsebja gore go dirwe eng ka yena.
35 Ka morago Jehofa a re go Moshe: “Motho yoo o swanetše go bolawa gomme setšhaba ka moka se mo kgatle ka maswika ka ntle ga ditente.”
36 Ka gona setšhaba ka moka sa mo ntšhetša ka ntle ga ditente gomme sa mo kgatla ka maswika a hwa, feela bjalo ka ge Jehofa a be a laetše Moshe.
37 Jehofa a tšwela pele a re go Moshe:
38 “Botša Baisiraele gore ba itirele merumo ya mašaphu* diaparong tša bona melokong ya bona ka moka le yeo e tlago, gomme ba rokelele thapo e talalerata ka godimo ga morumo wa mašaphu wa diaparo tša bona.
39 ‘Le dire merumo yeo gore e le gopotše melao ka moka ya Jehofa gomme le e latele. Le se ke la dira dilo tšeo dipelo tša lena di di kganyogago goba mahlo a lena a di dumago, tšeo di ka dirago gore le se sa mpotegela.*
40 Taelo ye e tla le thuša gore le dule le gopola melao ya ka ka moka gomme le e latele, ke moka le be ba bakgethwa go nna Modimo wa lena.
41 Ke nna Jehofa Modimo wa lena yo a le ntšhitšego nageng ya Egepeta e le gore ke bontšhe gore ke Modimo wa lena. Ke nna Jehofa Modimo wa lena.’”
Mengwalo ya tlase
^ Phetolelo ya lentšu ka lentšu e re, “folouru yeo e sego ya šilwa gabotse.”
^ Bona Tlhaloso ya Mantšu.
^ Goba “matšhakga.”
^ Goba “le hlankele medimo e mengwe.”
