Jobo 38:1-41
38 Ke moka Jehofa a araba Jobo a le ledimong a re:
2 “Ke mang yena yo, yoo a belaelago diphetho tšeo ke di dirilegoKa go bolela dilo tšeo a sa di tsebego?
3 Hle itokiše gomme o dire senna,Ke tla go botšiša dipotšišo wena wa nkaraba.
4 O be o le kae ge ke be ke dira lefase?
Mpotše ge e ba o a kwešiša.
5 Ge e ba o tseba, mpotše gore ke mang yo a le metilego,Goba ke mang yo a dirišitšego thapo go le meta?
6 Diphilara tša lefase di hlometšwe godimo ga eng,Goba ke mang yo a beilego leswika la lona la bohlokwa la motheo?
7 Ke mang yo a dirilego gore dinaledi tša mesong di goeletše gotee ka lethabo,Le gona ke mang yo a dirilego gore barwa ba Modimo ba goeletše ba mo tumiša?
8 Ke mang yo a tswaleletšego lewatle,Ke mang a beetšego lewatle mellwane ge le be le belegwa?*
9 O be o le kae ge ke be ke khupetša lewatle ka maru,Gomme ke le khupetša ka maru a masomaso?
10 O be o le kae ge ke be ke le beela mo le swanetšego go goma gona,E bile ke le tswalelela ka ditšhipi le mabati a lona?
11 Ke moka ka re: ‘O tla goma mo gomme o ka se fetele pele,Maphoto a gago a magolo a tla felela mo.’
12 Na o kile wa ntšha taelo ya gore e be mesong,Goba wa botša mahube gore a tšwelele kae?
13 Na ke wena o boditšego seetša sa mesong gore se ye mafelelong a lefase,Gomme se fediše batho ba babe?
14 Seetša se fetoša lefase go no swana le letsopa leo le kgatlilwego ka setempe,Gomme se kgabišitšwe go swana le seaparo se sebotse.
15 Eupša batho ba babe ga ba hwetše seetša,E bile ba ka se sa kgona go kweša batho ba bangwe bohloko.
16 Na o kile wa fihla kua fasefase mo lewatle le thomago gona,Goba wa sepelasepela o bona seo se lego ka garegare ga lona?
17 Na go na le yo a go bontšhitšego dikeiti tša mo go dulago bahu,Goba na o kile wa bona dikeiti tša lefelo la go ba le leswiswi le lesoleso?
18 Na o kwešiša kamoo lefase e lego le legolo ka gona?
Mpotše ge e ba o tseba dilo tše ka moka.
19 Na o a tseba gore seetša se dula ka thoko efe,
Le gore leswiswi lona le dula kae?
20 Na o ka di iša mo di dulago gonaLe go kwešiša ditsela tša go ya mo di dulago gona?
21 Na o tseba se ka gobane ka nako yeo o be o šetše o belegwe,Le ka gobane o na le mengwaga e mentšhi o le gona?
22 Na o kile wa tsena mafelong ao kapoko e bewago gona,Goba na o kile wa bona mafelo ao sefako se bewago go ona?
23 Ke beile kapoko le sefako gore ke tle ke di diriše mohlang wa tlalelo,Le gore ke tle ke di diriše letšatšing la ntwa.
24 Seetša se hlaba se etšwa kae,Le gona moya wa ka bohlabela wo o fokago lefaseng o tšwa kae?
25 Ke mang yo a buletšego pula ya matlorotloro lešoba,Le gona ke mang yo a botšago maru a pula ya matlakadibe gore a sepele kae,
26 E le gore pula e ne mo go sa dulego batho,E ne lešokeng moo go se nago batho,
27 Gore e kolobiše mafelo a senyegilego le ao a se nago selo,Le go dira gore bjang bo mele gape?
28 Na pula e na le tate,Goba tatago marothodi a phoka ke mang?
29 Ke mang yo a tlišitšego lehlwa lefaseng?Ke mang yo a belegego phoka ya legodimo?
30 Ke mang yo a dirago gore meetse a kgahle a be bjalo ka ge eka ke leswika?Ke mang yo a dirago gore karolo ya ka godimo ga bodiba e kgahle?
31 Na o ka tlema sehlopha sa dinaledi seo se bitšwago Kima ka dithapo,Goba wa tlemolla sehlopha sa dinaledi seo se bitšwago Kesile?
32 Na o ka eta pele sehlopha sa dinaledi seo se bitšwago Matsarothe ka nako ya sona,Goba wa hlahla sehlopha sa dinaledi seo se bitšwago Ashe gotee le barwa ba sona?
33 Na o tseba melao yeo e laolago magodimo,Goba na o ka diriša melao yeo e laolago magodimo mo lefaseng?
34 Na o ka goeletša gomme lentšu la gago la fihla marung,E le gore pula ya matlorotloro e go nele?
35 Na o ka bitša magadima?
Na a ka tla go wena gomme a re: ‘Ke rena ba’?
36 Ke mang yo a beago bohlale marung,Goba yo a dirilego gore dilo tšeo di lego magodimong di kwešiše?
37 Ke mang yo a lego bohlale kudu yo a ka kgonago go bala maru,Goba ke mang yo a ka kgonago go tšholla meetse a ona magodimong?
38 Ke mang a dirago gore lerole le fetoge leraga gomme la tšhologa,A ba a dira gore makwate* a mmu a kgomarelane?
39 Na o ka tsomela tau dijo,Goba wa fa ditawana dijo gore di je go fihlela di khora?
40 Na o ka di fepa ge di robetše mo di dulago gona,Goba ge di ikutile?
41 Ke mang yo a fago legokobu dijo tša lonaGe mafotwana a lona a llela Modimo gore a a thuše,Gomme a ya godimo le fase ka ge go se na seo a ka se jago?
