Jobo 16:1-22
16 Jobo a araba a re:
2 “Ke lapišitšwe ke go kwa dilo tše.
Go e na le gore le nkhomotše, le mpakela mathata le go feta!
3 Na le tla ka la fetša go araba ka mantšu a se nago mohola?
Ke eng seo se dirago gore le arabe ka tsela ye?
4 Ge nkabe le be le le mathateng go swana le nna,
Le nna ke be nka kgona go bolela go swana le lena.Ke be ke tla bolela dilo tše dintšhi tše mpe ka lena,E bile ka le šišinyetša hlogo ka go kodutla.
5 Ke be ke tla le matlafatša ka dilo tšeo ke di bolelago,E bile mantšu a ka a le homotša a ba a le imolla.
6 Ge ke bolela, bohloko bjo ke bo kwago ga bo be kaone,Le ge nka kgaotša go bolela, ke no tšwela pele ke ekwa bohloko.
7 Bjale gona Modimo o mpheditše matla,O fedišitše batho ka moka bao ba dulago ntlong ya ka.
8 Le gona ke a tlaišega ka diatleng tša gagwe, le batho le bona ba bona seo.Ka ge ke otile, seo se dira gore batho ba nagane gore ke na le molato.
9 Bogale bja gagwe bo dira gore ke rathagane, e bile o ntlhoile.
Ge a mpona o ntomagantšhetša meno.
O ntebelela ka mahlo a bogale, bjalo ka ge eka ke lenaba la ka.
10 Batho ba ahlamišitše melomo ya bona gore ba mmetše,Ba mphasotše marama ka go nkwera,Ba nkgobokanela e le ba bantšhi gore ba lwe le nna.
11 Modimo o dumeletše gore ke hlaselwe ke bašemanyana,Gomme a dumelela gore batho ba babe ba nkweše bohloko.
12 Ke be ke iketlile, eupša a ntshenyetša bophelo,A ntshwara ka morago mo molaleng a mpšhatlaganya,Gomme a ntšhetša bogale bja gagwe go nna.
13 Batho ba gagwe bao ba betšago mesebe ba ntikaneditše,O hlaba dipshio tša ka gomme a se nkwele bohloko,O tšholletše sabohloko sa ka fase.
14 Ke fo swana le leboto leo a duletšego go le ntšha mašoba,O nkitimela go swana le lešole.
15 Ke rokagantše mašela a lesaka gore ke khupetše letlalo la ka,Ka phumphanya seriti sa ka mobung.
16 Sefahlego sa ka se hubaditšwe ke go lla,Mahlo a ka a gohlometše ka baka la bohloko bjo ke bo kwago,
17 Ga se ka ka ka kweša motho bohloko,E bile ke rapela go tšwa pelong.
18 Wena lefase, o se ke wa khupetša madi a ka!
Le gona a go se be le lefelo leo dillo tša ka di khutago go lona.
19 Go na le yo a lego magodimong yo a ka hlatselago gore ga ke na molato,E lego yo a nkemelelago a le magodimong.
20 Bagwera ba ka ba a nkweraGe ke dutše ke llela Modimo.
21 Anke go be le motho yo a ahlolago ka toka magareng ga ka le Modimo,Go no swana le ge motho a ahlola batho ba babedi ka toka.
22 Ka gobane ke šaletšwe ke mengwaga e sego kae feela gore ke phele,E bile ke tla sepela gomme nka se boe.
