Jobo 1:1-22
1 Go be go na le monna yo mongwe nageng ya Utsi yo a bego a bitšwa Jobo. O be a lokile e bile a tshepega, le gona o be a hlompha Modimo kudu e bile a tšhaba go dira dilo tše mpe.
2 O be a na le barwa ba šupago le barwedi ba bararo.
3 O be a na le dinku tše 7 000 (dikete tše šupago), dikamela tše 3 000 (dikete tše tharo), dikgomo tše 1 000 (sekete) le ditonki tše 500 (makgolo a mahlano), le gona o be a na le bahlanka ba bantši kudu. Monna yo o be a hlomphega kudu go feta batho ka moka ba ka Bohlabela.
4 Barwa ba gagwe ba be ba tlwaetše go memana gore ba thabele go ja le go nwa ba le mmogo. Yo mongwe le yo mongwe o be a ba memela ntlong ya gagwe ka letšatši leo a le kgethilego, e bile ba be ba mema le dikgaetšedi tša bona tše tharo.
5 Ka morago ga ge bana ba Jobo ba feditše go bokana mmogo, o be a ba bitša gore ba tle go yena gore a tle a dire gore ba hlweke pele ga Modimo. O be a tsoga e sa le ka masa a direla yo mongwe le yo mongwe sehlabelo sa go fišwa ka gobane Jobo o be a ipotša a re: “Mohlomongwe bana ba ka ba dirile sebe e bile ba rogile Modimo ka dipelong tša bona.” Jobo o be a dira se ka mehla.
6 Bjale ka letšatši le lengwe ge barongwa* ba be ba tlile gomme ba eme pele ga Jehofa, Sathane le yena o ile a tsena a ema moo gare ga bona.
7 Jehofa a botšiša Sathane a re: “O tšwa kae?” Sathane a araba Jehofa a re: “Ke tšwa go itshepelela le lefase ke eya kua le kua.”
8 Jehofa a re go Sathane: “Na o bone mohlanka wa ka Jobo, gore ga go na motho yo a swanago le yena lefaseng le gore ke monna yo a lokilego le yo a tshepegago, yo a ntlhomphago kudu* le yo a tšhabago go dira dilo tše mpe?”
9 Ke moka Sathane a araba Jehofa a re: “Na o ra gore ge nkabe Jobo a be a sa hwetše selo o be a tlo no tšwela pele a go hlompha?
10 Na ga se wena o mo šireleditšego, gwa ba bjalo ka ge eka o ageleditše yena, lapa la gagwe le dilo ka moka tšeo a nago le tšona ka leboto? O šegofaditše dilo tšeo a di dirago gomme diruiwa tša gagwe di tletše gohle mo nageng.
11 Eupša, wena otlolla seatla sa gago o tšee selo se sengwe le sengwe seo a nago le sona, gomme o tla go roga mo pele ga gago.”
12 Ke moka Jehofa a re go Sathane: “O ka dira se sengwe le sengwe seo o se nyakago ka dilo tša gagwe ka moka. Eupša yena o se ke wa mo dira selo!” Ka gona Sathane a tloga pele ga Jehofa.
13 Bjale ka letšatši le lengwe ge barwa le barwedi ba Jobo ba be ba eja le go nwa beine ntlong ya buti wa bona yo mogolo,
14 go ile gwa tla mohlanka yo mongwe wa Jobo, a re go yena: “Dikgomo di be di lema gomme ditonki di fula kgauswi le tšona,
15 ke moka gwa tla Baseba ba re hlasela gomme ba tšea diruiwa tšeo, ba ba ba bolaya bahlanka ba gago ka sabola. Ke nna feela ke phologilego, bjale ke tlile mo gore ke tle ke go botše ka taba ye.”
16 Ge mohlanka yoo a sa bolela gwa tla yo mongwe gomme a re: “Go tlile mollo wa Modimo o etšwa magodimong wa tšhuma dinku le badiši. Ke nna feela ke phologilego, bjale ke tlile mo gore ke tle ke go botše ka taba ye.”
17 Ge yoo le yena a sa bolela, gwa tla yo mongwe a re: “Bakaladea ba tlile mo e le dihlopha tše tharo ba hlasela dikamela ba di tšea, gomme ba bolaya bahlanka ba gago ka sabola. Ke nna feela ke phologilego, bjale ke tlile mo gore ke tle ke go botše ka taba ye.”
18 Ge yoo le yena a sa bolela, gwa tla mohlanka yo mongwe gape a re: “Barwa le barwedi ba gago ba be ba eja e bile ba enwa beine ntlong ya buti wa bona yo mogolo.
19 Kapejana go ile gwa tla phefo e etšwa lešokeng, ya šikinya ntlo yeo ka matla gomme ntlo yeo ya wela bana ba gago ba hwa. Ke nna feela ke phologilego, bjale ke tlile mo gore ke tle ke go botše ka taba ye.”
20 Ge Jobo a se na go kwa dilo tšeo a ema a gagola seaparo sa gagwe, a kota hlogo, a wela fase a khunama
21 gomme a re:
“Ke belegwe ke se na selo,E bile nka se sepele le selo ge ke eya lebitleng.*
Jehofa o nneile, e bile Jehofa o ntšeetše.
Anke leina la Jehofa le tšwele pele le retwa.”
22 Le ge Jobo a diragaletšwe ke dilo tše ka moka ga se a ka a dira sebe goba a bea Modimo molato.
Mengwalo ya tlase
^ Phetolelo ya lentšu ka lentšu e re, “barwa ba Modimo.”
^ Phetolelo ya lentšu ka lentšu e re, “yo a mpoifago.”
^ Phetolelo ya lentšu ka lentšu e re, “Ke tšwile popelong ya mma ke se ka apara selo, e bile ke tla boela gona ke se ka apara selo.”
