Jesaya 52:1-15
52 Tsoga, tsoga, tia matla, wena Tsione!
Apara diaparo tša gago tše dibotse, wena Jerusalema, motse o mokgethwa!
Ka gobane motho yo a sa bollago le yo a sa hlwekago a ka se sa tsena go wena.
2 Itlhohlore lerole gomme o eme o dule setulong sa bogoši wena Jerusalema.
Tlemolla dithapo molaleng wa gago, wena morwedi wa Tsione yeo e thopilwego.
3 Jehofa o re:
“Le rekišitšwe mahala,Gomme le tla rekollwa ka ntle le tšhelete.”
4 Mmuši Morena Jehofa o re:
“Batho ba ka ba thomile pele ka go ya Egepeta ba dula nageng yeo e sego ya gabo bona.Ka morago Asiria e ile ya ba gatelela ka ntle le lebaka.”
5 Bjale Jehofa o re: “Ke swanetše go dira’ng
Ka gobane batho ba ka ba tšerwe mahala?”
Le gona Jehofa o re: “Batho bao ba ba bušago ba duletše go goeletša ba itheta,Gomme ba dulela go nyatša leina la ka letšatši ka moka.”
6 Ka baka leo batho ba ka ba tla tseba leina la ka,E bile ka lona lebaka leo, letšatšing leo ba tla tseba gore ke nna ke bolelago.
Bonang! Ke nna ke bolelago se.”
7 Go botse gakaakaang go bona maoto a yo a tlišago ditaba tše dibotse dithabeng,Yena yo a phatlalatšago ditaba tša khutšo,Yo a tlišago ditaba tše dibotse tša dilo tše kaone,Yo a tsebatšago molaetša wa phološo,Le yo a rego go Tsione: “Modimo wa gago ke Kgoši!”
8 Theetša! Batho ba gago bao ba letago motse ba hlaboša mantšu.
Ba goeletša gotee ba thabile,Ba tla bona gabotse ge Jehofa a kgoboketša gape bao ba lego Tsione.
9 Thabang, goeletšang gotee le thabile lena marope a Jerusalema,Ka gobane Jehofa o homoditše batho ba gagwe, o rekolotše Jerusalema.
10 Jehofa o dirile gore ditšhaba ka moka di bone matla a gagwe a makgethwa,Batho ka moka lefaseng ba tla bona seo Modimo a se dirilego go phološa batho ba gagwe.
11 Lena bao le rwalago dibjana tša Jehofa,
Tlogang, tlogang, e tšwang moo, le se ke la kgwatha selo sa go se hlweke,Etšwang lefelong leo, gomme le dule le hlwekile.
12 Le ka se tšwe le gakanegile,E bile go ka se nyakege gore le tšhabe.Ka gobane Jehofa o tlo le eta pele,Gomme yena Modimo wa Isiraele o tla le šireletša a le šetše morago.
13 Bonang! Mohlanka wa ka o tla dira dilo ka temogo.
O tla newa maemo a godimo,A phagamišwa gomme a hlomphiwa kudu.
14 Batho ba bantšhi ba ile ba mo lebelela ba maketše,Ka gobane ponagalo ya gagwe e be e fetogile go feta ya motho le ge e le ofe,Gaešita le sebopego sa gagwe se be se fetogile go fetiša sa batho.
15 Ka gona o tla tšhoša ditšhaba tše dintšhi.
Dikgoši di tla homola ge di mmona,Ka gobane di tla bona seo di sa kago tša se botšwa,Gomme di tla nagana ka seo di sa kago tša se kwa.
