Jesaya 50:1-11
50 Jehofa o re:
“Na ke neile mmago lena lengwalo la tlhalo ge ke be ke mo raka?
Goba na ke le rekišitše ka baka la sekoloto seo ke bego ke na le sona?
Tsebang gore le rekišitšwe ka baka la melato ya lena,Gomme mmago lena o rakilwe ka baka la diphošo tša lena.
2 Bjale ke ka baka la’ng go be go se na motho mo ge ke be ke etla?
Ke ka baka la’ng go be go se na motho yo a arabago ge ke be ke bitša?
Na ruri seatla sa ka ke se sekopana mo se ka se kgonego go le phološa?Goba na ga ke na matla a go le hlakodiša?
Ge ke ntšha taelo lewatle le a oma.Ke dira gore dinoka e be lešoka.
Dihlapi tša tšona di a bola ka ge go se na meetse,E bile di a hwa ka baka la lenyora.
3 Ke apeša magodimo ka leswiswi,Gomme ka a khurumetša ka mokotla.”
4 Mmuši Morena Jehofa o nthutile go bolelaMantšu ao a lapološago bao ba lapilego.
O mphafoša mesong e mengwe le e mengwe gore a nthute,O dira gore tsebe ya ka e theetše go swana le bao ba rutilwego.
5 Mmuši Morena Jehofa o thibolotše tsebe ya ka,Ge e le nna ke be ke sa gane go mo theetša.
Ga se ka ka ka ngangabala.
6 Bao ba nkotlago ke ba neile mokokotlo wa ka,E bile ke neile bao ba tumolago ditedu marama a ka.
Ga se ka uta sefahlego sa ka ge ba nthoga le ge ba ntshwela ka mare.
7 Eupša Mmuši Morena Jehofa o tla nthuša.
Ke ka baka leo nka se kego ka ikwa ke tlontlolotšwe.
Ke ka baka leo ke thatafišitšego sefahlego sa ka go swana le leswika la legakabje,E bile ke a tseba gore nka se hlabje ke dihlong.
8 Yo a bolelago gore ke lokile o kgauswi.
Ke mang a ka mpeago molato?
Anke nna le yena re eme gotee.
Ke mang a nyakago go ntshekiša?
Anke a tle go nna.
9 Mmuši Morena Jehofa o tla nthuša.
Ke mang yo a tla rego ke na le molato?
Ka moka ga bona ba tla hlagala go swana le seaparo.
Ba tla jewa ke diboko tša ba fetša.
10 Ke mang yoo gare ga lena a boifago Jehofa,E bile a theetšago lentšu la mohlanka wa gagwe?
Ke mang yo a ilego a sepela leswiswing le lesoleso moo go se nago seetša?
Anke a tshepe leina la Jehofa, e bile a ithekge ka Modimo wa gagwe.
11 “Lena ka moka bao le gotšago mollo,E bile le thuntšhago ditlhase,Sepelang seetšeng sa mollo wa lenaLe gare ga ditlhase tšeo le di thuntšhago.
Nna ke tla le otla ka kotlo ye:
Le tla robala le ekwa bohloko bjo bogolo.
