Jesaya 40:1-31
40 Modimo wa lena o re: “Homotšang batho ba ka, ba homotšeng.”
2 “Bolelang le batho ba Jerusalema ka botho,Gomme le ba botšeng gore nako ya bona ya go šoma ka boima e fedile,Le gore molato wa bona o lebaletšwe.
Jehofa o otlile batho ba Jerusalema ka mo go feletšego bakeng sa dibe tša bona ka moka.”
3 Go na le motho yo a goeletšago a le lešokeng, o re:
“Kgorang tsela ya Jehofa!
Kgorelang Modimo wa rena tsela e kgolo yeo e fetago leganateng.
4 Anke meedi ka moka e tlatšwe,Gomme dithaba le meboto ka moka di lekalekanywe.
Moo go nago le makgwakgwa go batalatšwe,Le moo go sa lekalekanego go lekanywe.
5 Ke moka letago la Jehofa le tla bonagala,Gomme batho ka moka ba tla le bona,Ka gobane Jehofa o boletše seo.”
6 Theetša! Go na le motho yo a rego: “Goeletša!”
Ke moka yo mongwe o re: “Ke goeletše ke re’ng?”
“Batho ka moka ba swana le bjang bjo botala.
Gomme botho* bja bona ka moka bo swana le mapolomo a naga.
7 Bjang bjo botala bo a oma,Mapolomo wona a a pona,Ka gobane Jehofa o di hemela ka moya wa gagwe.
Ruri batho ba swana le bjang bjo botala.
8 Bjang bjo botala bo a oma,Mapolomo wona a a pona,Eupša ge e le lentšu la Modimo wa rena lona, le tla dula le le gona go ya go ile.”
9 Rotogela thabeng e telele,Wena mosadi yo a tlišetšago Tsione ditaba tše dibotse.
Goeletša ka matla,Wena mosadi yo a tlišetšago Jerusalema ditaba tše dibotse.
Goeletša, o se ke wa boifa.
Botša metse ya Juda o re: “Modimo wa lena šo.”
10 Mmuši Morena Jehofa o tla tla, gomme a bontšha matla a gagwe,O tla buša ka letsogo la gagwe.
Ke yena a nago le moputso wa gagwe,Gomme moputso wo a o patelago o mo pele ga gagwe.
11 O tla hlokomela mohlape wa gagwe go swana le modiši.
O tla kgoboketša dikwana ka letsogo la gagwe,Gomme a di bea sehubeng sa gagwe.
Tšeo di amušago o tla di gapa ka go di hlekesetša.
12 Ke mang yo a kadilego meetse ka seatla sa gagwe,A ba a meta magodimo ka go atlalatša seatla sa gagwe?
Ke mang a ilego a kgoboketša mobu wa lefasengGomme a o kala,Goba a kala dithaba le meboto ka dikala?
13 Ke mang yo a ka kgonago go kala moya wa Jehofa,Le yo a ka kgonago go mo eletša a ba a mo ruta se sengwe?
14 Modimo o botšišitše mang gore a be le kwešišo,Goba ke mang yo a mo rutago tsela ya toka,Goba yo a mo rutago gore a be le tsebo,Goba yo a mmontšhago tsela ya kwešišo ya nnete?
15 Ditšhaba di swana le lerothi la meetse ka paketeng,E bile di swana le lerojana leo le lego sekaleng.
Ruri Modimo o kuka dihlakahlaka bjalo ka ge eka ke lerojana feela.
16 Gaešita le mehlare ya Libanoni ga se yeo e lekanego gore e ka dira gore mollo o dule o tuka,Le diphoofolo tša yona ga se tšeo di lekanego go ka dira dihlabelo.
17 Ditšhaba ka moka di no ba bjalo ka ge eka ga di gona pele ga gagwe,O di lebelela e le lefeela, e se selo.
18 Le ka swantšha Modimo le mang,
Le gona le ka mo swantšha le eng?
19 Setsebi sa mošomo wa diatla se bopa modimo wa seswantšho,Ke moka motho yo a šomago ka tšhipi a se penta ka gauta,Gomme a se kgabiša ka ditšhaene tša silifera.
20 Motho o kgetha mohlare wo o ka se kego wa bola,Gore a neele ka wona.
Ka morago ga moo, o nyaka setsebi sa mošomo wa diatlaGore se dire seswantšho sa go betlwa seo se ka se wego.
21 Na ga le tsebe?
Na ga se la kwa?
Na ga se la botšwa go tloga mathomong?
Na ga se la kwešiša go tloga ge lefase le be le thewa?
22 Go na le yo a dulago ka godimo ga lefase la nkgokolo,Gomme bao ba dulago go lona ba no swana le ditšie.
O otlolla magodimo go swana le lešela leo le phurolotšwego,E bile o a ala bjalo ka tente yeo batho ba dulago go yona.
23 Yena yo a theošago dintona maemong a tšona,Gomme a dira gore baahlodi ba lefase ba hloke mohola.
24 Ba no swana le dibjalo tšeo di sa tšwago go bjalwa,Ga se ba tielela,Kutu ya bona ga se ya tsema fase ka medu.Motho o fo ba butšwetša ka moya gomme ba omelela,E bile ba tla tšewa ke phefo go swana le ge e tšea mahlaka.
25 Modimo yo Mokgethwa o re: “Le ka ntshwantšha le mang yoo a ka lekanago le nna?”
26 “Lebelelang godimo gomme le bone.
Ke mang yo a dirilego dinaledi tše ka moka?
Ke yoo a di etelelago pele bjalo ka mašole, e bile o di bala ka e tee ka e tee.O di bitša ka moka ka maina.
Ka baka la matla a gagwe a magolo kudu le ao a boifišago,Ga go le e tee yeo e sego gona.
27 “Ke ka baka la’ng wena Jakobo, wena Isiraele,O bolela gore: ‘Jehofa ga a bone tsela yeo ke bego ke phela ka yona,Le gore Modimo ga a na taba le ge ke sa bontšhwe toka’?
28 Na ga le tsebe? Goba na ga se la tšwa le ekwa?
Jehofa, yena yo a bopilego dilo ka moka mo lefaseng, ke Modimo wa go ya go ile.
A ka se tsoge a lapile e bile ga a felelwe ke matla.
Ga go na motho yo a ka tsebago dilo tšeo a di kwešišago.
29 Yo a lapilego o mo nea matla,Gomme bao ba se nago matla o ba nea matla a magolo.
30 Bašemane ba tla lapa le go felelwa ke matla,Masogana ona, a tla kgopša gomme a wa,
31 Eupša bao ba tshepilego Jehofa ba tla hwetša matla gape.
Ba tla fofela godimo bjalo ka ge eka ba na le diphego tša dintšhu.
Ba tla kitima, eupša ba ka se felelwe ke matla,Ba tla sepela, eupša ba ka se lape.”
Mengwalo ya tlase
^ Phetolelo ya lentšu ka lentšu e re, “lerato le le botegago.”
