Jesaya 24:1-23
24 Bonang! Jehofa o senya naga gomme o e dira gore e se sa ba le batho.
O a e hlakahlakanya, e bile o phatlalatša badudi ba yona.
2 Batho ka moka ba tla diragalelwa ke se se swanago.
Dilo tše di welago setšhaba di tla wela le baperisita,Tšeo di welago bahlanka di tla wela le beng ba bona,Tšeo di welago bahlanka ba basadi, di tla wela le basadi bao ba ba hirilego,Tšeo di welago bareki di tla wela le barekiši,Tšeo di welago bao ba adingwago, di tla wela le bao ba ba adimago,Tšeo di welago bao ba kolotago tšhelete, di tla wela le bao ba ba kolotišago.
3 Ruri naga e tla senywaYa ba ya šala e se na motho,Ka gobane se ke seo se boletšwego ke Jehofa.
4 Naga e a lla, e omile.
Naga yeo e enywago e ponne, e sehlefetše.
Batho ba maemo a godimo mo nageng ga ba sa na matla.
5 Ge e le naga yona e šilafaditšwe ke badudi ba yona,Ka gobane ba tshetše melao,Ba fetoša le ditaelo,E bile ba senya le kgwerano yeo e bego e swanetše go ba gona go ya go ile.
6 Ke ka lebaka leo naga e fetogilego marope ka ge e rogakilwe,Gomme bao ba dulago go yona ba bonwa molato.
Ke ka baka leo badudi ba naga ba fokotšegilego,Gomme go šetše batho ba sego kae.
7 Beine e mpsha e fedile, mehlare ya meterebe e ponne,Gomme batho ka moka ba dipelo tše di thabilego ba nyamile.
8 Batho ga ba sa letša meropa ba thabile,Lešata la bao ba thabilego kudu le ile,Gomme lethabo la bao ba letšago harepa le fedile.
9 Ba nwa beine go se na koša,Gomme bjala bo galakela bao ba bo nwago.
10 Motse wo o tlogetšwego o se na batho o phušotšwe,Dintlo ka moka di tswaletšwe gore go se be le motho yo a ka kgonago go tsena.
11 Diterateng go a lliwa ka baka la ge go se na beine.
Ga go sa na lethabo.Nageng ka moka lethabo le fedile.
12 Motse o tlogetšwe e le marope,Gomme keiti ya wona e sentšwe ka mo go feletšego.
13 Mo nageng le mo gare ga ditšhaba,
Batho ba ka ba tla swana le dienywa tšeo di šetšego ka morago ga gore mohlare wa mohlware o hlohlorwe,E bile ba tla swana le diterebe tšeo di šetšego tšeo di topiwago ka morago ga gore batho ba fetše go buna.
14 Ba tla hlaboša mantšu a bona,Ba goeletša ba thabile.
Ba tla bolela ka bogolo bja Jehofa go tloga lewatleng.
15 Ke ka baka leo ba tlago go tumiša Jehofa ba le ka bohlabela,*Ba tumiša leina la Jehofa Modimo wa Isiraele ba le dihlakahlakeng tša lewatle.
16 Re kwa dikoša go tšwa mafelelong a lefase, di re:
“A go tumišwe Modimo yo a lokilego!”
Eupša nna ke re: “Ke fedile, ke fedile!
Ke wa madimabe! Baradia ba ropile batho.Baradia ba dirile tša boradia.”
17 Wena modudi wa naga, o lebanwe ke letšhogo, melete le melaba.
18 Mang le mang yo a tšhabago modumo wo o tšhošago, o tla wela ka moleteng,Gomme mang le mang yo a tšwago ka moleteng o tla tanywa ke molaba.
Mašoba a legodimo a tla bulwa gwa ba le mafula,Gomme metheo ya naga e tla šikinyega.
19 Naga e pšhatlagane,E šikinyegile,E bile e a thekesela.
20 Naga e thekesela go swana le motho yo a tagilwego,E akgaakgwa go swana le mokutwana wa mahlaka wo o tšewago ke phefo.
E imelwa ke melato ya yona,Gomme e tla wa, moo e ka se tsogego ya ema gape.
21 Letšatšing leo Jehofa o tla ahlola madira ao a lego godimo sebakabakeng,Le dikgoši tša lefase tšeo di lego lefaseng.
22 Ba tla kgoboketšwa go swana le batho bao ba golegilwegoBao ba tswalelelwago ka moleteng,Gomme ba tla tswalelelwa ka teronkong,Ke moka ka morago ga matšatši a mantšhi ba tla ahlolwa.
23 Jehofa wa madira ke Kgoši Thabeng ya Tsione le Jerusalema,O tla buša ka letago pele ga batho ba bagolo ba setšhaba sa gagwe.Gaešita le ngwedi wo o tletšego o ka se tage,Gomme letšatši le le phadimago le tla swifala.
Mengwalo ya tlase
^ Goba “tikologong ya seetša.”
