Jesaya 19:1-25
19 Molaetša wo o lego mabapi le go ahlola Egepeta šo:
Bonang! Jehofa o nametše leru leo le kitimago ka lebelo, gomme o tla Egepeta.
Medimo e se nago mohola ya Egepeta e tla thothomela pele ga gagwe,Gomme dipelo tša Baegepeta di tla tšhoga kudu.
2 “Ke tla dira gore Baegepeta ba tsogelane matla,Gomme ba tla lwa seng sa bona.Motho o tla lwa le ngwanabo le moagišane wa gagwe,Motse o tla lwa le motse, gomme mmušo wa lwa le mmušo.
3 Baegepeta ba tla gakanega,Gomme ka hlakahlakanya maano a bona.
Ba tla ya medimong ya bona yeo e se nago mohola,Ba ya go batho ba maselamotse, le go batho bao ba lekago go boledišana le bahu gotee le bao ba rego ba kgona go bolela dilo tšeo di sa tlago go direga.
4 Ke tla dira gore Baegepeta ba bušwe ke mmuši yo sehlogo,E bile ba tla bušwa ke kgoši e šoro.” Morena wa nnete, yena Jehofa wa madira, ke yena a bolelago se.
5 Meetse a lewatleng a tla pšha,Gomme noka yona e tla gopa ya omelela.
6 Ke moka dinoka di tla nkga,Gomme dinokana tša Nile ya Egepeta di tla gopa e bile tša omelela.
Mahlakanoka le mahlaka a tla bola.
7 Dibjalo tšeo di lego kgauswi le Noka ya Nile, moo go thomago noka,Le naga yeo e lemilwego kgauswi le Noka ya Nile, di tla omelela.
Di tla tšewa ke phefo gomme tša se sa ba gona.
8 Barei ba dihlapi ba tla lla,Le batho ka moka bao ba lahlelago dihuku tša go rea dihlapi Nokeng ya Nile ba tla kwa bohloko,Gomme bao ba alago dinete tša bona tša go rea dihlapi ka meetseng, ba tla nyama.
9 Bao ba dirago mašela ka folakese,*Le bao ba dirago mašela a mašweu, ba tla hlabja ke dihlong.
10 Balogi ba Egepeta ba tla kwa bohloko kudu,Gomme batho ka moka bao ba hirilwego ba tla nyama.
11 Baetapele ba Tsoane ke ditlaela.
Ge e le baeletši ba bohlale ba Farao, ba fa keletšo ya go se re selo.
Le ka botša bjang Farao la re:
“Nna ke setlogolo sa batho ba bohlale,Ke setlogolo sa dikgoši tša kgale”?
12 Gona ba kae banna ba gago ba bohlale?
Anke ba go botše ge e ba ba tseba seo Jehofa wa madira a šetšego a phethile gore o tlo se dira Egepeta.
13 Baetapele ba Tsoane ba dirile tša bošilo,Baetapele ba Nofe bona ba forilwe,Gomme dikgošana tša meloko ya Egepeta di dirile gore setšhaba se aroge.
14 Jehofa o dirile gore Baegepeta ba gakanege,Gomme baetapele ba dira gore setšhaba sa Egepeta se hlahlathe dilong ka moka tšeo di se dirago,Go no swana le motho yo a tagilwego yoo a thekeselago godimo ga mahlatša a gagwe.
15 Egepeta go ka se be le mošomo wo o dirwago ke motho yo mogolo goba yo monyenyane,Motho wa maemo a godimo goba a tlasana.*
16 Letšatšing leo Egepeta e tla swana le basadi, gomme e tla tšhoga ya ba ya thothomela ka baka la ge Jehofa wa madira a e emišeditše letsogo la gagwe.
17 Naga ya Juda e tla tšhoša Baegepeta. Ba tla tšhoga le ge ba ekwa go bolelwa ka yona, ka baka la phetho yeo Jehofa wa madira a šetšego a e dirile mabapi le bona.
18 Letšatšing leo go tla ba le metse e mehlano nageng ya Egepeta yeo e bolelago leleme la Kanana, e bile e tla direla Jehofa wa madira keno ya gore e tla mmotegela. Motse o tee go yeo e mehlano o tla bitšwa Motse wa go Phušola.
19 Letšatšing leo go tla ba le aletare ya Jehofa gare ga naga ya Egepeta, e bile go tla ba le philara ya go tumiša Jehofa kgauswi le mollwane wa naga yeo.
20 Dilo tšeo e tla ba bohlatse bja gore batho ba gopole Jehofa wa madira nageng ya Egepeta, ka gobane ba tla llela Jehofa ka baka la batho bao ba ba gateletšego gomme yena o tla ba romela mophološi yo mogolo yo a tlago go ba phološa.
21 Jehofa o tla dira gore Baegepeta ba mo tsebe, gomme Baegepeta ba tla tseba Jehofa letšatšing leo. Ba tla mo direla dihlabelo, e bile ba mo fa dimpho, ba direla Jehofa dikeno ba ba ba di phetha.
22 Jehofa o tla otla Egepeta. O tla otla batho ba naga yeo a ba a ba fodiša, ba tla boela go Jehofa e bile o tla ba kwa ge ba mo rapela gomme a ba fodiša.
23 Letšatšing leo go tla ba le tsela e kgolo e tšwago Egepeta e eya Asiria. Ke moka Asiria e tla tla Egepeta, gomme Egepeta yona ya ya Asiria. Dinaga tše di tla hlankela Modimo di le gotee.
24 Letšatšing leo Isiraele e tla kopana le Egepeta le Asiria gomme ya ba ya boraro, ke moka seo ya ba tšhegofatšo lefaseng ka moka,
25 ka gobane Jehofa wa madira o tla šegofatša dinaga tšeo, a re: “A go šegofatšwe Egepeta, bona batho ba ka, a go šegofatšwe Asiria, wona modiro wa diatla tša ka, e bile a go šegofatšwe Isiraele, bjona bohwa bja ka.”
Mengwalo ya tlase
^ Folakese ke sebjalo seo se bego se bjalwa kua Egepeta gore go dirwe diaparo tša mašela a linene.
^ Phetolelo ya lentšu ka lentšu e re, “Egepeta go ka se be le mošomo wo o dirwago ke hlogo goba mosela, lekala goba lehlaka.”
