Genesi 32:1-32
32 Ke moka Jakobo a sepela, gomme barongwa ba Modimo ba kopana le yena.
2 Gateetee ge Jakobo a ba bona a re: “A ke madira a Modimo!” Ke ka baka leo a ilego a bitša lefelo leo a re ke Mahanaime.*
3 Ka gona Jakobo a roma batho gore ba mo ete pele ba ye go Esau ngwanabo kua nageng ya Seire, yeo gape e bitšwago Edomo.
4 Ke moka a ba botša a re: “Le botše Esau mong wa ka gore: ‘Se ke seo mohlanka wa gago Jakobo a re romilego gore re go botše sona: “Ke dutše le malome wa rena Labane ke le motšwantle nako e telele go fihla gona bjale.
5 Le gona ke bile le dikgomo, ditonki, dinku le bahlanka ba banna le ba basadi, bjale ke romela wena mong wa ka molaetša wo e le gore o nkgaugele.”’”
6 Ka morago ga moo batho bao Jakobo a bego a ba romile ba boela go yena gomme ba mmotša gore: “Re fihlile go Esau ngwaneno, gomme gona bjale o tseleng ya go go gahlanetša, e bile o sepela le banna ba 400 (makgolonne).”
7 Ka gona Jakobo a tšhoga kudu a ba a tshwenyega. Ke moka a arola batho bao a bego a na le bona, dinku le dipudi, dikgomo le dikamela ka dihlopha tše pedi.
8 Ka gobane o be a nagana gore: “Ge e ba Esau a ka hlasela sehlopha se sengwe gona sehlopha se sengwe se tla phologa.”
9 Ka morago ga moo Jakobo a rapela a re: “Wena Modimo wa Aborahama rakgolo wa ka le Modimo wa Isaka tate, wena Jehofa yo a rego go nna: ‘Boela nageng ya geno le go metswalo ya gago gomme ke tla go direla dilo tše dibotse.’
10 Botho* bja gago bjo bogolo ga bo ntshwanele e bile ga ke swanelwe ke tsela yeo o ilego wa mpotegela ka yona nna mohlanka wa gago, ka gobane ke tshetše Noka ye ya Jorodane ke swere lehlotlo feela eupša gona bjale ke kgona go arola lapa la ka ka dihlopha tše pedi.
11 Ke a go rapela hle, mphološe go ngwanešo Esau, ka gobane ke boifa gore a ka tla a hlasela nna, bana ba ka le bommago bona.
12 E bile wena o itše: ‘Ruri ke tla go direla dilo tše dibotse gomme ka dira gore bana ba gago e be ba bantši go swana le santa ya lewatleng, yeo e sa balegego ka baka la ge e le e ntši.’”
13 A fetša bošego a le moo. Ke moka a tšea tše dingwe tša dilo tšeo a bego a na le tšona gore a di nee Esau ngwanabo. Dilo tšeo e be e le:
14 Dipudi tše tshadi tše 200 (makgolopedi) le diphooko tše 20, dinku tše tshadi tše 200 (makgolopedi) dinku tše tona tše 20,
15 dikamela tše 30 tšeo di amušago, dikgomo tše 40, dipoo tše 10, ditonki tše tshadi tše 20 le ditonki tše tona tše 10.
16 A nea bahlanka ba gagwe mehlape yeo ka go latelana, gomme a bolela le bona a re: “Nketeng pele, gomme le bule sekgoba magareng ga mohlape o mongwe le o mongwe.”
17 Le gona a laela mohlanka wa pele a re: “Ge Esau ngwanešo a ka kopana le wena gomme a go botšiša a re: ‘O mohlanka wa mang? O ya kae, le gona diruiwa tše o di gapago ke tša mang?’
18 Wena o re: ‘Diruiwa tše ke tša mohlanka wa gago Jakobo. O go file tšona e le mpho wena mong wa ka Esau. Tseba gore le yena o re šetše morago.’”
19 A laela le mohlanka wa bobedi le wa boraro le badiši ka moka bao ba bego ba gapa mehlape, a re: “Ge le kopana le Esau le mmotše wona mantšu a.
20 Le gona le mmotše gore: ‘Jakobo mohlanka wa gago o re šetše morago.’” Ka gobane o be a ipoditše gore: “Ge nka mo theoša maswafo ka mpho ye ke mo romelago yona, mohlomongwe ge ke tlo kopana le yena o tla nkamogela gabotse.”
21 Ka gona bahlanka ba gagwe ba mo eta pele le dimpho tšeo, eupša yena a šala ditenteng bošegong bjoo.
22 Ka morago bjona bošegong bjoo a tsoga a tšea basadi ba gagwe ba babedi, bahlanka ba gagwe ba babedi ba basadi le barwa ba gagwe ba 11 gomme a tshela Noka ya Jaboko.
23 Ka gona a ba tšea a ba tshediša noka yeo, a tshediša le dilo ka moka tšeo a bego a na le tšona.
24 Mafelelong ge Jakobo a šetše a nnoši, monna yo mongwe o ile a tšwelela gomme a lwa le yena go fihlela ge go thoma go sa.
25 Ge monna yoo a bona gore ga se a mo fenya, a kgwatha lerapo la Jakobo leo le kopanyago serope le letheka, ke moka lerapo leo la tšwa madulong ge a be a elwa le yena.
26 Ka morago ga moo monna yoo a re: “Ntlogele ke sepele ka gobane go kgauswi le go sa.” Jakobo yena a re: “Nka se go tlogele go fihlela o ntšhegofatša.”
27 Monna yoo a mmotšiša a re: “Ke wena mang?” Yena a re: “Ke nna Jakobo.”
28 Ke moka a re go yena: “Leina la gago e ka se hlwe e sa ba Jakobo, eupša e tla ba Isiraele, ka gobane o lwele le Modimo le batho gomme wa feleletša o fentše.”
29 Ke moka Jakobo a re go yena: “Hle mpotše leina la gago.” Eupša yena a re: “Ke ka baka la’ng o nyaka go tseba leina la ka?” Ge a re’alo a mo šegofatša gona moo.
30 Ka gona Jakobo a reela lefelo leo leina a re ke Peniele,* ka gobane o itše: “Ke bone Modimo re lebantše difahlego eupša ga se ka hwa.”
31 Kapejana ge a fetile Penuele* letšatši le ile la thoma go hlaba, eupša o be a hlotša ka ge a be a gobetše letheka.
32 Ke ka baka leo go fihla le lehono le bana ba Isiraele ba sego ba tlwaela go ja mošifa wa serope wo o lego moo serope se kopanago le letheka, ka gobane monna yola o ile a kgwatha lerapo la Jakobo leo le kopanyago serope le letheka mošifeng wa serope.
Mengwalo ya tlase
^ Leina le le ra gore, “Mešaša e Mebedi.”
^ Phetolelo ya lentšu ka lentšu e re, “lerato le le botegago.”
^ Leina le le ra gore, “Sefahlego sa Modimo.”
^ Goba “Peniele.”
