Diema 5:1-23
5 Morwa wa ka, theetša mantšu a ka a bohlale,
O be o theetše gabotse seo ke go rutago sona gore o be le temogo.
2 Ke moka o tla kgona go nagana gabotseGomme leleme la gago la bolela nnete feela.
3 Mantšu a go foraforetša a mosadi wa go hloka boitshwaro* ke a mabose go swana le todi ya dinose,Gomme molomo wa gagwe o boreledi go feta makhura.
4 Eupša mafelelong o tla go kweša bohloko tše e kego o jele lengana,*Le tše e kego o hlabja ke tšhoša ya magale a mabedi.
5 Maoto a gagwe a theogela lehung.
Dikgato tša gagwe di swere tsela ya go ya Lebitleng.*
6 Ga a na taba le tsela yeo e išago bophelong.
O a sepela eupša ga a tsebe gore o ya kae.
7 Bjale wena morwa wa ka, ntheetšeGomme o se ke wa tlogela dilo tšeo ke go rutago tšona.
8 O se ke wa batamela mosadi wa mohuta woo.Le gona, o se ke wa batamela kgauswi le mojako wa ntlo ya gagwe,
9 E le gore o se ke wa nyatšwa ke batho ba bangweGoba wa tlaišega bophelo bja gago ka moka,
10 E le gore batho bao o sa ba tsebego ba se ke ba ikhola ka mahumo a gago,Le gore dilo tšeo o di šometšego ka thata di se ke tša tšewa ke batho ba bangwe.
11 Ge o ka se dire bjalo, o tlo kwa bohloko ge o felelwa ke matla,E bile o se sa phela gabotse mmeleng.
12 Ke moka wa re: “Ruri ke be ke hloile tayo
E bile ke hloile kgalemelo!
13 Ga se ka theetša bahlahli ba ka,E bile ke ile ka ithiba ditsebe ge ba be ba nkeletša.
14 Ke sentše bophelo bja kaE bile ke lewa ke dihlong pele ga batho ba Modimo.”
15 Enwa meetse a sediba sa gagoLe meetse ao a elelago a etšwa sedibeng sa gago.
16 Ke ka baka la’ng o nyaka gore didiba tša gago di tšhollele meetse ka ntle,Gomme dinokana tša gago di elelele mafelong a batho bohle?
17 A e be tša gago feela,E bile o se ke wa di hlakanela le batho ba bangwe.
18 Anke Modimo a šegofatše sediba sa gagoGomme o thabe le mosadi yo o mo nyetšego o sa le moswa,
19 Yena yoo a swanago le kgama* e tshadi le pudi e botsana ya thaba.
Anke matswele a gagwe a go kgotsofatše ka dinako ka moka.
Anke o dule o kgotsofatšwa ke lerato la gagwe.
20 Bjale morwa wa ka, ke ka baka la’ng o swanetše go thabišwa ke mosadi yo a se nago boitshwaro?Goba wa gokarela mosadi wa go hloka boitshwaro wa ba wa kgomarela kgara ya gagwe?
21 Jehofa o lebeletše dilo tšeo batho ba di diragoE bile o lebeledišiša ditsela tša bona ka moka.
22 Motho yo mobe o tanywa ke melato ya gagwe.Dibe tša gagwe di tla ba bjalo ka dithapo tšeo di mo tlemilego.
23 O tla hwa ka gobane ga a amogele tayo.Le gona, bošilo bja gagwe bjo bogolo bo tla mo timetša.
Mengwalo ya tlase
^ Goba, “semela sa go galaka.”
^ Bona Tlhaloso ya Mantšu.
^ Kgama ke phoofolo ye e nyakilego go swana le phala.
