Puku ya Bobedi ya Dikgoši 21:1-26
21 Manase o be a na le mengwaga e 12 ge a eba kgoši, gomme o bušitše Jerusalema ka mengwaga e 55. Leina la mmagwe e be e le Hefsiba.
2 O ile a dira dilo tše mpe pele ga Jehofa. A dira dilo tšeo di šišimišago tšeo di bego di dirwa ke ditšhaba tšeo Jehofa a ilego a di raka pele ga Baisiraele.
3 O ile a tsošološa mafelo a phagamego ao Hesekia tatagwe a bego a a sentše, a direla Baali dialetare a ba a dira le kota e kgethwa* go no swana le ge Ahaba kgoši ya Isiraele a dirile bjalo, a khunamela letšatši, ngwedi le dinaledi gomme a di hlankela.
4 O ile a ba a aga le dialetare ka ntlong ya Jehofa, yeo Jehofa a bego a boletše ka yona a re: “Ke tla bea leina la ka Jerusalema.”
5 A agela letšatši, ngwedi le dinaledi dialetare ka malapeng a mabedi ao a lego ntlong ya Jehofa.
6 O ile a dira sehlabelo ka morwa wa gagwe,* a dira maleatlana, a diriša dipheko, a hira batho bao ba rego ba bolela dilo tšeo di tlago go direga nakong e tlago le bao ba dirago dilo tša boloi. O ile a dira dilo tše mpe kudu pele ga Jehofa e le gore a mo kgopiša.
7 O ile a tšea seswantšho se se betlilwego sa kota e kgethwa yeo a bego a e dirile gomme a se bea ka ntlong yeo Jehofa a bego a boditše Dafida le morwa wa gagwe Solomone ka yona a itše: “Ke tla bea leina la ka go ya go ile ka ntlong ye le mo Jerusalema, e lego lefelo leo ke le kgethilego gare ga meloko ka moka ya Isiraele.
8 Nka se sa dira gore Baisiraele ba tloge nageng yeo ke e filego borakgolokhukhu ba bona ge feela ba ka theetša melao ya ka ka kelohloko ba ba ba dira dilo ka moka tšeo ke ba laelago tšona ba ba ba kwa melao ka moka yeo Moshe mohlanka wa ka a ba laetšego yona.”
9 Eupša ga se ba ka ba theetša. Le gona Manase o ile a ba aroša, a ba dira gore ba dire dilo tše mpe kudu go feta tšeo di bego di dirwa ke ditšhaba tšeo Jehofa a di fedišitšego pele ga Baisiraele.
10 Jehofa a dula a bolela a diriša bahlanka ba gagwe bao e lego baporofeta a re:
11 “Manase kgoši ya Juda o dirile dilo ka moka tše di šišimišago. O dirile dilo tše mpe kudu go feta tšeo di dirilwego ke Baamore ka moka bao ba bilego gona pele ga gagwe. Le gona o dirile gore Juda e dire sebe ka medingwana ya gagwe e šišimišago.*
12 Ke ka baka leo Jehofa Modimo wa Isiraele a rego: ‘Bjale ke tlišetša Jerusalema le Juda masetlapelo ao a tlago go dira gore motho yoo a kwago ka ona, ditsebe tša gagwe tše pedi di hlohlone.
13 Ke tla ahlola* Jerusalema ka tsela yeo ke ahlotšego Samaria le ba ntlo ya Ahaba gomme ka phumola Jerusalema ya hlweka go no swana le ge motho a phumola sekotlelo gomme a se ribega.
14 Ke tla lahla batho ba ka bao ba sa šetšego mo nageng gomme ka tlogela manaba a bona gore a ba fenye, le gona manaba a bona ka moka a tla ba utswetša a ba a ba thopa,
15 ka gobane ba dirile dilo tše mpe pele ga ka e bile ba be ba duletše go nkgopiša go tloga letšatšing leo borakgolokhukhu ba bona ba tšwilego ka lona Egepeta go fihla le lehono.’”
16 Le gona Manase o ile a tšholla madi a mantšhi a batho bao ba se nago molato. O ile a bolaya batho go tloga mathomong a Jerusalema go fihla mafelelong a yona, go sa balwe sebe seo a se dirišitšego Bajuda sa gore ba dire dilo tše mpe pele ga Jehofa.
17 Ditaba ka moka tša Manase, dilo ka moka tšeo a di dirilego le dibe tšeo a di dirilego di ngwadilwe ka pukung ya histori ya mehleng ya dikgoši tša Juda.
18 Mafelelong Manase o ile a hlokofala go no swana le ge borakgolokhukhu ba gagwe ba hlokofetše. O ile a bolokelwa serapeng seo se lego ka mošate e lego serapa sa Utsa. Ke moka morwa wa gagwe e lego Amone a ba kgoši legatong la gagwe.
19 Amone o be a na le mengwaga e 22 ge a eba kgoši gomme o bušitše Jerusalema ka mengwaga e mebedi. Leina la mmagwe e be e le Meshulemethe morwedi wa Harusi wa go tšwa Jotoba.
20 O ile a tšwela pele a dira dilo tše mpe pele ga Jehofa, go swana le ge tatagwe e lego Manase a ile a di dira.
21 O ile a dula a dira dilo ka moka tše mpe tšeo tatagwe a bego a di dira, a hlankela medimo e šišimišago yeo tatagwe a bego a e hlankela a ba a e khunamela.
22 Ka gona o ile a tlogela Jehofa Modimo wa borakgolokhukhu ba gagwe gomme a se ke a phela ka tsela yeo Jehofa a e amogelago.
23 Mafelelong bahlanka ba Amone ba ile ba mo logela maanomabe gomme ba mmolaela ka ntlong ya gagwe.
24 Eupša setšhaba ka moka sa mo nageng sa bolaya batho ka moka bao ba bego ba logetše Kgoši Amone maanomabe gomme ba bea morwa wa gagwe Josia gore e be kgoši legatong la gagwe.
25 Ditaba ka moka tša Amone, ke gore dilo ka moka tšeo a di dirilego di ngwadilwe ka pukung ya histori ya mehleng ya dikgoši tša Juda.
26 Ka gona o ile a bolokwa lebitleng la gagwe serapeng sa Utsa gomme morwa wa gagwe Josia a ba kgoši legatong la gagwe.
Mengwalo ya tlase
^ Bona Tlhaloso ya Mantšu.
^ Phetolelo ya lentšu ka lentšu e re, “a fetiša morwa wa gagwe mollong.”
^ Lentšu la Seheberu leo le sepedišanago le “šišimišago” le ka bolela boloko goba selo seo motho a ka se nyakego go se lebelela.
^ Seheberu se bolela ka Modimo a diriša didirišwa tša moagi tša go meta go ahlola batho ba gagwe.
