Puku ya Bobedi ya Dikgoši 19:1-37
19 Ya re gateetee ge Kgoši Hesekia a ekwa ditaba tšeo, a kgeila diaparo tša gagwe, a apara diaparo tša go dirwa ka masaka gomme a tsena ka ntlong ya Jehofa.
2 Ke moka a roma Eliakima yo a bego a hlokometše ba ntlo ya kgoši, Shebana yo e bego e le mongwaledi gotee le banna ba bagolo ba baperisita go moporofeta Jesaya morwa wa Amotse. Banna bao ba bagolo ba baperisita ba be ba apere diaparo tša go dirwa ka masaka.
3 Ba re go yena: “Hesekia o re: ‘Le ke letšatši la tlalelo, letšatši la go kgalemelwa le la go gobošwa. Le tlo no swana le ge ngwana a le kgauswi le go belegwa eupša mmagwe a se na matla a go belega.
4 Mohlomongwe Jehofa Modimo wa lena o tla kwa mantšu a Rabashake, yoo mong wa gagwe e lego kgoši ya Asiria, a mo romilego gore a tlo kwera Modimo yo a phelago gomme Modimo o tla mo sekiša ka baka la mantšu ao yena Jehofa Modimo wa lena a a kwelego. Ka gona wena rapelela batho bao ba šetšego bao ba sa lego gona.’”
5 Ke moka bahlanka ba Kgoši Hesekia ba ya go Jesaya.
6 Jesaya a re go bona: “Le botše mong wa lena le re: ‘Jehofa o re: “O se ke wa tšhoga ka baka la mantšu ao o a kwelego, e lego mantšu ao bahlanka ba kgoši ya Asiria ba nkgobošitšego ka ona.
7 Ke tla dira gore a nagane ka tsela e itšego gomme o tla kwa pego a boela nageng ya gabo. Ke tla dira gore a bolawe ka sabola nageng ya gabo.”’”
8 Ka morago ga gore Rabashake a kwe gore kgoši ya Asiria e tlogile Lakishi, o ile a boela go yona gomme a e hwetša e elwa le Libina.
9 Bjale kgoši ya Asiria e ile ya kwa go bolelwa gore Kgoši Tirihaka wa Ethopia o tlile go lwa le yona. Ge a ekwa seo o ile a romela batho gape go Hesekia a re:
10 “Sepelang le yo botša Kgoši Hesekia wa Juda le re: ‘O se ke wa lesa Modimo wa gago yo o mo tshepilego a go fora ka go go botša gore: “Jerusalema e ka se newe kgoši ya Asiria gore e e fenye.”
11 Wena ka bowena o kwele seo dikgoši tša Asiria di se dirilego dinageng ka moka gore di di sentše kudu. Bjale na wena o nagana gore o tla phologa?
12 Na medimo ya ditšhaba tšeo borakgolokhukhu ba ka ba ilego ba di fediša e ile ya di phološa? E kae Gotsana, Harane, Retsefa gotee le batho ba Edene bao ba bego ba le Thele-asara?
13 E kae kgoši ya Hamathi, kgoši ya Arapadi, kgoši ya motse wa Sefarafaima, wa Hena le wa Ifa?’”
14 Hesekia a tšea mangwalo seatleng sa batho bao a bego a ba romile gomme a a bala. Ka morago ga moo o ile a ya ntlong ya Jehofa gomme a a phutholla pele ga Jehofa.
15 Ke moka Hesekia a rapela Jehofa a re: “Wena Jehofa Modimo wa Isiraele, wena yo a dutšego ka godimo* ga bakerubi, ke wena o nnoši o lego Modimo wa nnete mebušong ka moka ya lefase. Ke wena o dirilego magodimo le lefase.
16 Wena Jehofa, hlwaya tsebe gomme o kwe. Wena Jehofa, bula mahlo gomme o bone. Ekwa mantšu ao Sanheribe a a rometšego go kwera wena Modimo yo a phelago.
17 Wena Jehofa, ke nnete gore dikgoši tša Asiria di fedišitše ditšhaba le dinaga tša tšona.
18 Dikgoši tšeo di ile tša lahlela medimo ya dinaga tšeo ka mollong ka gobane medimo yeo e be e se medimo ya nnete, eupša e be e dirilwe ke batho ka dikota le maswika. Ke ka baka leo dikgoši tšeo di kgonnego go e fediša.
19 Bjale wena Jehofa Modimo wa rena, hle re phološe go kgoši ya Asiria, e le gore mebušo ka moka ya lefase e tsebe gore wena Jehofa o Modimo o nnoši.”
20 Jesaya morwa wa Amotse a romela molaetša go Hesekia a re: “Jehofa Modimo wa Isiraele o re: ‘Ke kwele thapelo ya gago mabapi le Kgoši Sanheribe wa Asiria.
21 Se ke seo nna Jehofa ke se boletšego mabapi le yena, ke ile ka re:
“Kgarebe yeo e lego morwedi wa Tsione e a go nyatša, e a go kwera.
Morwedi wa Jerusalema o šišinya hlogo ge a go bona.
22 Ke mang yo o mo kwerilego le yo o mo rogilego?
Ke mang yo o mo hlabetšego mašataLe go mo lebelela gampe?
Ke Modimo yo Mokgethwa wa Isiraele!
23 O kwerile nna Jehofa o diriša baromiwa ba gago wa re:‘Ke tla rotogela godimo ga dithabaKa dikariki tše dintšhi tša ntwa,Dikarolong tša kgolekgole tša Libanoni.
Ke tla rema mehlare ya yona e metelele ya metsedara le mehlare ya yona e mebotse ya mejunipere.
Ke tla fihla dintlheng tša dithaba, sethokgweng sa yona se se bofaganego.
24 Ke tla epa didiba le go nwa meetse,Ke tla omiša dinokana tša Egepeta ka moka ke diriša maoto a ka.’
25 Na ga se wa kwa gore, se ke seo ke bego ke dutše ke nyaka go se dira go tloga mehleng ya kgale?
Se ke seo ke bego ke nyaka go se dira go tloga le mehleng e fetilego.
Bjale ke tla se phetha.
Wena o tla dira gore metse e šireleditšwego e fetoge mekgobo ya marope.
26 Badudi ba yona ba ka se kgone go itirela selo,Ba tla tšhoga e bile ba hlabja ke dihlong.
Ba tla swana le dimela tša naga le bjang bjo botala,Ba swana le bjang bjo bo šomišitšwego go rulela bjo bo tšhungwago ke phefo ya ka bohlabela.
27 Ke tseba gabotse ge o dula, ge o etšwa le ge o tsena,E bile ke tseba le ge o nkgalefetše,
28 Ka gobane ke kwele gore o nkgalefetše e bile ke kwele le mokgoši wo o o hlabilego.
Ka gona ke tla tsenya huku ka nkong ya gago le tomo ya ka molomong wa gago,Ka go gomišetša morago ka tsela yeo o tlilego ka yona.”
29 “‘Se e tla ba leswao go wena:* Ngwageng wo le ngwageng wa bobedi le tla ja mabele ao a metšego a se a bjalwa ke motho, eupša ngwageng wa boraro le tla bjala peu gomme la buna, le gona le tla bjala dirapa tša meterebe gomme la ja dienywa tša tšona.
30 Batho ba Juda bao ba phonyokgilego, e lego bao ba šetšego ba tla swana le mohlare wo o tsemilego medu fase, woo o enywago dienywa tše dintšhi.
31 Ka gobane Jerusalema go tla tšwa batho bao ba šetšego gomme Thabeng ya Tsione gwa tšwa bao ba phologilego. Jehofa wa madira o tla dira se ka mafolofolo.
32 “‘Ka gona Jehofa o bolela ka kgoši ya Asiria o re:
“E ka se tsene motseng woGoba ya thuntšha mosebe go wona.E ka se tle go wona e swere kotseGoba ya aga leboto la go o ageletša.
33 Jehofa o re: “ E tla gomela morago ka tsela yeo e tlilego ka yona,Gomme e ka se tsene motseng wo.
34 Ke tla lwela motse wo ka ba ka o phološa ka baka la leina la kaLe ka baka la Dafida mohlanka wa ka.”’”
35 Bošegong bjoo morongwa wa Jehofa o ile a ya a bolaya banna ba 185 000 (dikete tše lekgolo-masomeseswai-hlano) ditenteng tša Baasiria. Mesong ge batho ba tsoga ba ile ba hwetša ditopo tša banna bao ka moka.
36 Ka gona Kgoši Sanheribe wa Asiria a sepela, a boela Ninife gomme a dula moo.
37 Ya re ge a khuname ntlong ya Nisiroko modimo wa gagwe, barwa ba gagwe e lego Adirameleke le Sharetsere ba mmolaya ka sabola gomme ba tšhabela nageng ya Ararate. Ke moka morwa wa gagwe Esara-hadoni a buša legatong la gagwe.
