Puku ya Pele ya Samuele 16:1-23
16 Mafelelong Jehofa a re go Samuele: “O tlo llela Saulo go fihla neng, mola nna ke mo tlošitše gore a se sa ba kgoši ya Isiraele? Ke tla go roma go Jese wa Betlelehema, ka gobane ke ikgethetše yoo e tlago go ba kgoši gare ga barwa ba gagwe. Tlatša lenaka la gago ka makhura gomme o sepele.”
2 Eupša Samuele a re: “Ke tla ya bjang? Ge Saulo a ka kwa ka se, o tla mpolaya.” Jehofa a re: “Gapa namane o sepele le yona gomme o re: ‘Ke tletše go direla Jehofa sehlabelo.’
3 O bitše Jese ge o dira sehlabelo, ke moka nna ke tla go tsebiša seo o swanetšego go se dira, gomme o tlotše yoo ke tlago go go bontšha yena.”
4 Samuele a dira seo Jehofa a mmoditšego sona. Ge a fihla Betlelehema, banna ba bagolo ba motse ba ile ba tšhoga ge ba mo gahlanetša, ba re go yena: “Na o tlile ka khutšo?”
5 Yena a re: “Ee, ke tlile ka khutšo. Ke tletše go direla Jehofa sehlabelo. Itokišeng* gomme le ye le dire sehlabelo le nna.” Ka morago ga gore Samuele a dire gore Jese le barwa ba gagwe ba itokiše,* o ile a ba bitša ge a dira sehlabelo.
6 Ge ba fihla, e itše ge a bona Eliaba a re: “Ruri yo e swanetše goba e le yena motlotšwa wa Jehofa.”
7 Eupša Jehofa a re go Samuele: “O se ke wa kgahlwa ke ponagalo ya gagwe goba botelele bja gagwe ka ge nna ke mo ganne. Ka gobane tsela yeo motho a bonago ka yona ga se yeo Modimo a bonago ka yona. Le gona motho o bona ponagalo ya ka ntle, eupša Jehofa yena o bona dipelo.”
8 Ke moka Jese a bitša Abinadaba gomme a mo tliša pele ga Samuele, eupša Samuele a re: “Le yena yo Jehofa ga se a mo kgetha.”
9 Ka morago Jese a tliša Shaama, eupša Samuele a re: “Le yena yo Jehofa ga se a mo kgetha.”
10 Jese a tliša barwa ba gagwe ba šupago pele ga Samuele, eupša Samuele a re go Jese: “Jehofa ga se a kgetha le ge e le ofe wa ba.”
11 Mafelelong Samuele a re go Jese: “Na ba ke bona barwa ba gago ka moka?” Jese yena a re: “Yo monyenyane go bona ga a gona, o ile go diša dinku.” Ke moka Samuele a re go Jese: “Roma motho a yo mmitša ka gobane re ka se je go fihlela ge a etla mo.”
12 Ka gona Jese a roma motho a yo mmitša. Yena e be e le yo mohwibitšwana, mošemanyana wa mahlo a mabotse le wa sebopego se sebotse. Ke moka Jehofa a re go Samuele: “Ema o mo tlotše, ka gobane yo ke yena ke mo kgethilego!”
13 Ka gona, Samuele a tšea lenaka la makhura gomme a mo tlotša pele ga bobuti’agwe. Moya wa Jehofa wa thoma go matlafatša Dafida go tloga letšatšing leo go ya pele. Ka morago Samuele a tloga a ya Rama.
14 Moya wa Jehofa o be o tlogile go Saulo gomme Jehofa a dumelela gore moya o mobe o mo tlaiše.*
15 Bahlanka ba Saulo ba re go yena: “Na o a bona gore Modimo o dumeletše moya o mobe gore o go tlaiše?
16 Anke mong wa rena a laele bahlanka ba gagwe ba mo nyakele motho yo a kgonago go letša harepa. Ge Modimo a dumelela moya o mobe gore o tle go wena, motho yoo o tla letša harepa gomme wena wa kaonefala.”
17 Ke moka Saulo a re go bahlanka ba gagwe: “Ke kgopela le nnyakeleng motho yo a kgonago go letša harepa le mo tlišeng mo.”
18 Yo mongwe wa bahlanka a re: “Ke bone kamoo morwa wa Jese wa Betlelehema a kgonago go letša harepa ka gona, yena o na le sebete e bile o na le matla. O kgona go bolela gabotse e bile o botse kudu gomme Jehofa o na le yena.”
19 Ke moka Saulo a romela batho go Jese a re: “Nthomele morwa wa gago Dafida yo a dišago mohlape.”
20 Ke moka Jese a tšea senkgwa, lepotlelo la mokgopa leo le nago le beine le putšanyana, a di nametša godimo ga tonki gomme a di romela le morwa wa gagwe Dafida go Saulo.
21 Dafida a tla go Saulo gomme a ba mohlanka wa gagwe. Saulo a mo rata kudu, Dafida a feleletša e le morwadi wa dibetša tša gagwe.
22 Saulo a romela molaetša go Jese a re: “Anke Dafida a be mohlanka wa ka, ka gobane ke mo rata kudu.”
23 Ge moya o mobe wo Modimo a o dumeletšego o etla go Saulo, Dafida o be a tšea harepa a e letša, Saulo yena o be a imologa gomme a eba kaone, ke moka moya o mobe o be o mo tlogela.
Mengwalo ya tlase
^ Goba, “Ikgethagatšeng.”
^ Goba “ikgethagatše.”
^ Goba “moya o mobe wo o tšwago go Jehofa wa mo tlaiša.”
