Ge mengwaga e dutše e eya lenyalong, banyalani ba bangwe ga ba sa bontšhana gore ba a ratana. Ge e ba seo se direga lenyalong la gago, na o swanetše go tshwenyega?

•  Seo o swanetšego go se tseba

•  Seo o ka se dirago

 Go bontšhana lerato go dira gore lenyalo le tie. E le gore mebele ya rena e tie le gore re se ke ra lwala, re swanetše go dula re eja dijo tša phepo le go nwa meetse. Ka mo go swanago, e le gore lenyalo le tie banyalani ba swanetše go dula ba bontšhana lerato. Gaešita le ge e le kgale batho ba nyalane, molekane yo mongwe le yo mongwe o nyaka go ikwa a ratwa.

 Motho yo a nago le lerato la nnete o naganela molekane wa gagwe. Motho yo bjalo o rata go bona molekane wa gagwe a thabile. Motho yo a tshwenyegago ka molekane wa gagwe ga a no mmontšha lerato ge yena a ikwa a nyaka go dira bjalo, eupša o nyaka go tseba gore molekane wa gagwe o nyaka go bontšhwa lerato bjang, ke moka a mmontšha lona ka tsela yeo a e nyakago.

 Gantši basadi ba nyaka go bontšhwa lerato kutšwanyana go feta banna. Monna a ka ba a rata mosadi wa gagwe kudu. Eupša ge a no bontšha mosadi wa gagwe lerato mesong le thapama feela goba pele ba eba le thobalano, mosadi a ka ipotšiša ge e ba monna wa gagwe a tloga a mo rata. Ke mo gobotse gore banyalani ba bontšhane lerato gantšinyana mo letšatšing.

 Bontšha lerato ka mantšu. Go bolela mantšu ao a bonagalago a sa re selo a go swana le gore “Ke a go rata” goba “O bohlokwa go nna” a ka dira gore molekane wa gago a ikwe a ratwa.

 Molao wa motheo wa Beibele: “Molomo o bolela go tšwa go se se tletšego pelong.”—Mateo 12:34.

 Keletšo: Ga se wa swanela go bontšha molekane wa gago gore o a mo rata ka go no bolela feela. Eupša o ka leka mekgwa ya go fapafapana. O ka mo ngwalela mantšu a lerato pampišaneng, wa mo romela e-mail, goba wa mo romela molaetša ka founo.

 Bontšha lerato ka mediro. O ka bontšha molekane wa gago gore o tloga o mo rata ka go mo gokarela, go mo khisa goba go mo swara ka letsogo. Dilo tše dingwe tšeo di ka bontšhago gore o rata molekane wa gago ke go no mo kgoma, go fela o mo lebelela goba o mo rekela dimpho. Gape o ka bontšha mosadi wa gago gore o a mo rata ka go mo rwalela merwalo, go mmulela lebati, go hlatswa dibjana, go hlatswa diaparo goba go apea. Basadi ba bantši ge ba bona banna ba bona ba ba direla dilo tše, ga ba tšee gore ba no ba thuša feela eupša ba bona seo e le go ba bontšha lerato ka mediro.

 Molao wa motheo wa Beibele: “Ga se ra swanela go ratana feela ka lentšu goba ka leleme, eupša a re rataneng ka tiro.”—1 Johane 3:18.

 Keletšo: Swara molekane wa gago ka tsela e lerato go swana le ge le be le sa thoma go ratana.

 Ipheng nako ya go ba gotee. Go ipha nako ya go ba le molekane wa gago le le ba babedi go tiiša lenyalo e bile go bontšha molekane wa gago gore o thabela go ba le yena. Ke nnete gore go ka ba thata gore le hwetše nako ya go ba babedi ge e ba le na le bana goba go na le dilo tše dintši tše bohlokwa tšeo le swanetšego go di dira letšatši le letšatši. Mohlomongwe le ka boledišana ka go dira dilo tšeo di ka bonalago di sa re selo, go swana le go no fela le itshepelela le le ba babedi.

 Molao wa motheo wa Beibele: “Le kgonthišetše dilo tše bohlokwa kudu.”—Bafilipi 1:10.

 Keletšo: Banyalani ba bangwe bao ba sa hwetšego nako ya go ba gotee ba kgetha matšatši a itšego goba mafelobeke a itšego gore ba be gotee.

 Tseba molekane wa gago. Motho yo mongwe le yo mongwe o nyaka go bontšhwa lerato ka tsela ya gagwe. Boledišanang ka taba ya gore yo mongwe le yo mongwe wa lena a ka nyaka go bontšhwa lerato bjang le gore le ka kaonefatša kae. Ke moka, o ikemišetše go dira seo molekane wa gago a se nyakago. Gopola se: E le gore lenyalo le tie, banyalani ba swanetše go bontšhana lerato.

 Molao wa motheo wa Beibele: “Lerato ... ga le nyake tša go ikhola.”—1 Bakorinthe 13:4, 5.

 Keletšo: Go e na le gore o gapeletše molekane wa gago gore a go bontšhe lerato, ipotšiše gore: ‘Nka dira’ng gore molekane wa ka a mpontšhe lerato?’