Ka Beibeleng, lentšu leo le fetoletšwego e le “tsogo ya bahu” le tšwa lentšung la Segerika la a·naʹsta·sis, leo le bolelago “go tsošwa” goba “go emelela gape.” Motho yo a tsošwago o tsošwa bahung gomme a bušetšwa bophelong gore a be boemong bjoo a bego a le go bjona peleng.—1 Bakorinthe 15:12, 13.

 Le ge lentšu “tsogo ya bahu” le sa tšwelele ka Mangwalong a Seheberu, ao gantši a bitšwago Testamente ya Kgale, thuto ye e a tšwelela Mangwalong ao. Ka mohlala, ge Modimo a be a bolela ka moporofeta Hosea, o holofeditše gore: “Ke tla ba hlakodiša seatleng sa Bodulabahu; ke tla ba lopolla lehung.”—Hosea 13:14; Jobo 14:13-15; Jesaya 26:19; Daniele 12:2, 13.

 Batho ba tla tsošetšwa kae? Batho ba bangwe ba tla tsošetšwa go phela legodimong gore ba buše e le dikgoši le Kriste. (2 Bakorinthe 5:1; Kutollo 5:9, 10) Beibele e bitša tsogo ye gore ke “tsogo ya pele,” gomme polelwana yeo e ra gore go na le tsogo e nngwe yeo e tlago go latela. (Kutollo 20:6; Bafilipi 3:11) Tsogong ye ya mafelelo, batho ba tla tsošetšwa bophelong mo lefaseng, e lego moo ba bantši bao ba tlago go tsošwa ba tlago go phela gona.—Psalme 37:29.

 Batho ba tla tsošwa bjang bahung? Modimo o neile Jesu matla a go tsoša bahu. (Johane 11:25) Jesu o tla tsošetša “bohle bao ba lego mabitleng” bophelong, yo mongwe le yo mongwe a ena le dika tšeo di mo hlaolago, semelo le dikgopolo. (Johane 5:28, 29) Bao ba tsošetšwago legodimong ba hwetša mmele wa moya, mola bao ba tsošetšwago lefaseng bona ba hwetša mmele wa nama o phetšego gabotse kudu.—Jesaya 33:24; 35:5, 6; 1 Bakorinthe 15:42-44, 50.

 Ke bomang bao ba tlago go tsošwa bahung? Beibele e re “go tla ba le tsogo ya ba lokilego gotee le ba sa lokago.” (Ditiro 24:15) Ba lokilego ba akaretša batho ba botegago ba bjalo ka Noa, Sara le Aborahama. (Genesi 6:9; Baheberu 11:11; Jakobo 2:21) Ba sa lokago ba akaretša bao ba paletšwego ke go phela ka melao ya Modimo e le ka baka la ge ba sa ka ba hwetša sebaka sa go ithuta yona le go e latela.

 Lega go le bjalo, bao e bago ba kgopo kudu moo go se sa nago le kholofelo ya gore ba ka fetoga ba ka se tsošwe bahung. Ge batho ba bjalo ba ehwa, ba hwela sa ruri, ga ba sa na kholofelo ya go phela gape.—Mateo 23:33; Baheberu 10:26, 27.

 Tsogo ya bahu e tla direga neng? Beibele e boletše e sa le pele gore go tsošetšwa legodimong go be go tla direga nakong ya go ba gona ga Kriste, moo go thomilego ka 1914. (1 Bakorinthe 15:21-23) Go tsošetšwa mo lefaseng go tla direga nakong ya Pušo ya Jesu Kriste ya Mengwaga e Sekete ge lefase le tla be le fetošwa gore e be paradeise.—Luka 23:43; Kutollo 20:6, 12, 13.

 Ke ka baka la’ng go kwagala go dumela gore bahu ba tla tsošwa? Beibele e bolela ka dipego tše senyane tša batho bao ba tsošitšwego bahung, yeo e nngwe le e nngwe ya tšona e nago le dihlatse tšeo di bonego ka mahlo. (1 Dikgoši 17:17-24; 2 Dikgoši 4:32-37; 13:20, 21; Luka 7:11-17; 8:40-56; Johane 11:38-44; Ditiro 9:36-42; 20:7-12; 1 Bakorinthe 15:3-6) Taba ya gore Jesu o ile a tsoša Latsaro bahung e makatša kudu ka ge Latsaro a be a na le matšatši a mane a hwile le gona Jesu o dirile mohlolo wo pele ga lešaba la batho. (Johane 11:39, 42) Gaešita le baganetši ba Jesu ba be ba ka se kgone go ganetša taba ye, ka gona ba ile ba loga leano la go bolaya Jesu le Latsaro.—Johane 11:47, 53; 12:9-11.

 Beibele e bontšha gore Modimo o na le bokgoni bja go tsoša bahu e bile o kganyoga go dira bjalo. Ka kgopolong ya gagwe e se nago magomo, o boloka pego ya motho yo mongwe le yo mongwe yo a tlago go mo tsoša bahung ka matla a gagwe a magolo. (Jobo 37:23; Mateo 10:30; Luka 20:37, 38) Modimo o kgona go tsoša bahu e bile o nyaka go dira bjalo! Ge Beibele e hlalosa tsela yeo Modimo a ikwago ka yona ka tsogo ya bahu ya nakong e tlago, e re : “O tla hlologela modiro wa diatla tša gago.”—Jobo 14:15.

Dikgopolo tše di fošagetšego mabapi le tsogo ya bahu

 Maaka: Tsogo ya bahu ke go kopanywa gape ga moya le mmele.

 Therešo: Beibele e ruta gore moya (soul) ke motho, e sego karolo e itšego ya motho yeo e phologago lehu. (Genesi 2:7; Hesekiele 18:4) Motho yo a tsošwago bahung ga a kopanywe gape le moya wa gagwe; eupša o bopša lefsa e le moya o phelago.

 Maaka: Batho ba bangwe ba a tsošwa ke moka ba fedišwa gateetee.

 Therešo: Beibele e re “bao ba tlwaetšego go dira dilo tše mpe” ba “tla tsogela kahlolo.” (Johane 5:29) Lega go le bjalo, kahlolo ye e theilwe go seo ba tla se dirago ka morago ga gore ba tsošwe bahung, e sego pele ga moo. Jesu o itše: “Bahu ba tla kwa lentšu la Morwa wa Modimo gomme bao ba le kwelego ba tla phela.” (Johane 5:25) Maina a bao ba ‘kwago’ dilo tšeo ba ithutago tšona ka morago ga go tsošwa bahung a tla ngwalwa “[lengwalong] la go phuthwa la bophelo.”—Kutollo 20:12, 13.

 Maaka: Ge motho a tsošwa bahung, o hwetša wona mmele wola a bego a na le wona pele a ehwa.

 Therešo: Ka morago ga lehu, mmele wa motho o a bola.—Mmoledi 3:19, 20.