Ee. Melao ya motheo ya Beibele e mene e latelago e ka go thuša ge o na le mathata a ditšhelete le a dikoloto:

1.   Rulaganya mokgwa wa go diriša tšhelete. “Maano a motho yo mafolofolo a a mo hola, eupša mang le mang yo a akgofago o wela bohloking.” (Diema 21:5) O se ke wa fo kitimela go reka selo e le feela ka gobane theko ya sona e theošitšwe. Rulaganya mokgwa woo o tlago go diriša tšhelete ya gago ka wona gomme o o kgomarele.

2.   Phema go dira dikoloto go sa hlokagale. “Moadimi ke mohlanka wa moadimiši.” (Diema 22:7) Ge e ba o šetše o na le dikoloto gomme o sa kgone go di lefa, leka go boledišana le bao o ba kolotago gore o rulaganye mokgwa o mofsa wa go ba lefa. O se ke wa langwa. Diriša keletšo ye ya Beibele go yoo ka go hloka bohlale a go adimilego tšhelete gomme bjale o mo kolotago: “Eya o ikokobetše go wa geno o phophothe go yena. O se ke wa lesa mahlo a gago a robala goba a otsela.” (Diema 6:1-5) Gaešita le ge kgopelo ya gago ya mathomo e ka se amogelwe, tšwela pele o kgopela mokgwa o mofsa wa go lefa sekoloto.

3.   E ba le pono e nepagetšego ka tšhelete. “O se ke wa ba le boithati gomme wa fagahlela go huma—o tla diila wa hloka le pudi ya leleme le letala.” (Diema 28:22, Contemporary English Version) Lehufa le megabaru di ka dira gore motho a be le mathata a ditšhelete e bile a se be le nako ya dilo tša moya.

4.   Kgotsofala. “Ge re na le dijo le diaparo re tla kgotsofala ka tšona.” (1 Timotheo 6:8) Tšhelete e ka se reke lethabo goba kgotsofalo. Bontši bja batho bao ba thabilego kudu lefaseng ga ba na tšhelete. Ba thabišwa feela ke go ratwa ke malapa a gabo bona le bagwera le go ba le tswalano e botse le Modimo.—Diema 15:17; 1 Petro 5:6, 7.