Leina la Segerika la puku ya Beibele ya Kutollo, e lego A·po·kaʹly·psis (apocalypse), le bolela go “Bipolla” goba go “Utolla.” Leina le le hlalosa gabotse seo se bolelwago ke Kutollo—go bipolla ditaba tšeo di fihlilwego le ditiragalo tše di utilwego tšeo di tlago go direga nako e telele ka morago ga ge di ngwadilwe. Bontši bja diporofeto tše di sa tlo phethega.

Kakaretšo ya puku ya Kutollo

•   Matseno.—Kutollo 1:1-9.

•   Melaetša e tšwago go Jesu e yago go diphuthego tše šupago.—Kutollo 1:10–3:22.

•   Modimo o bontšhwa a le sedulong sa gagwe sa bogoši kua legodimong.—Kutollo 4:1-11.

•   Lelokelelo la dipono, moo pono e nngwe le e nngwe e lebišago go e latelago:

  •   Mahuto a šupago.—Kutollo 5:1–8:6.

  •   Diphalafala tše šupago, tše tharo tša mafelelo di tsebatša madimabe a mararo.—Kutollo 8:7–14:20.

  •   Meruswi e šupago, o mongwe le o mongwe o swere kotlo yeo e emelago kahlolo e tšwago go Modimo yeo e swanetšego go tšhollelwa lefaseng.—Kutollo 15:1–16:21.

  •   Dipono tša go fedišwa ga manaba a Modimo.—Kutollo 17:1–20:10.

  •   Dipono tša kamoo Modimo a tlago go šegofatša legodimo le lefase.—Kutollo 20:11–22:5.

•   Phetho.—Kutollo 22:6-21.

Ditsela tša go go thuša go kwešiša puku ya Kutollo

1.   Molaetša wa yona ke wo o kgahlišago, ga se o boifišago goba o tšhošago go bao ba hlankelago Modimo. Gaešita le ge ba bantši ba tswalanya lentšu “apocalypse” le kotsi e kgolo, puku ya Kutollo e thoma le go phetha ka mantšu ao a dirago gore bao ba e balago, le bao ba e kwešišago le go diriša molaetša wa yona ba tla thabišwa ke go dira seo.—Kutollo 1:3; 22:7.

2.   Kutollo e diriša “dipontšho,” goba maswao a mantši, ao a sa swanelwago go kwešišwa ka tsela ya kgonthe.—Kutollo 1:1.

3.   Pukung ya Kutollo go na le dipego tše dintši tše dikgolo le maswao ao go boletšwego ka ona pejana ka Beibeleng:

   •   Jehofa—“Modimo wa therešo ... magodimong” le Mmopi wa dilo ka moka.—Doiteronomio 4:39; Psalme 103:19; Kutollo 4:11; 15:3.

   •   Jesu Kriste—“Kwana ya Modimo.”—Johane 1:29; Kutollo 5:6; 14:1.

   •   Sathane Diabolo—lenaba la Modimo—Genesi 3:14, 15; Johane 8:44; Kutollo 12:9.

   •   Babilona yo Mogolo—go swana le Babilona ya bogologolo (Babele), ke lenaba la Modimo le batho ba gagwe e bile ke mothopo wa maaka ka moka a bodumedi.​—Genesi 11:2-9; Jesaya 13:1, 11; Kutollo 17:4-6; 18:4, 20.

   •   “Lewatle”—batho ba kgopo bao ba ganetšago Modimo.—Jesaya 57:20; Kutollo 13:1; 21:1.

   •   Dilo tšeo di sepedišanago le tabarenakele ya bogologolo yeo e bego e dirišetšwa go rapela Modimo—go akaretša areka ya kgwerano, lewatle le le etšago galase (sebjana sa go hlapela), mabone, dibego tša diorelo gotee le aletare ya dihlabelo.—Ekisodo 25:10, 17, 18; 40:24-32; Kutollo 4:5, 6; 5:8; 8:3; 11:19.

   •   Sebata—se emela mebušo ya batho.—Daniele 7:1-8, 17-26; Kutollo 13:2, 11; 17:3.

   •   Dipalo di dirišitšwe ka tsela ya seswantšhetšo.—Kutollo 1:20; 8:13; 13:18; 21:16.

4.   Dipono di šoma “letšatšing la Morena,” leo le thomilego ge Mmušo wa Modimo o be o hlongwa ka 1914 gomme Jesu a thoma go buša e le Kgoši. (Kutollo 1:10) Ka gona, re ka letela gore phethagalo e kgolo ya Kutollo e direge mehleng ya rena.

5.   E le gore re kwešiše puku ya Kutollo, go nyakega dilo tšeo di re thušago go kwešiša dikarolo tše dingwe tša Beibele, go akaretša bohlale bjo bo tšwago go Modimo le thušo ya bao ba šetšego ba e kwešiša.—Ditiro 8:26-39; Jakobo 1:5.