Aowa, Beibele ka moka e a dumelelana. Le ge go ka bonagala eka dikarolo tše dingwe tša Beibele di a ganetšana, di ka kwešišwa gakaone ge go ka dirišwa e tee goba e mengwe ya mekgwa e latelago:

1.   Ela hloko taba ka kakaretšo. Mongwadi yo mongwe a ka bonagala eka o a ikganetša ge e ba taba ya gagwe e sa hlahlobje ka kakaretšo.

2.   Ela hloko pono ya mongwadi. Dihlatse tšeo di bonego ka mahlo di ka hlalosa taba ka moo go nepagetšego eupša tša se diriše mantšu a swanago goba go se akaretše dilo tše di swanago.

3.   Ela hloko histori le metlwae.

4.   Bona ge e ba mantšu a dirišitšwe ka tsela ya kgonthe goba ya seswantšhetšo.

5.   Ela hloko gore go ka thwe selo se dirilwe ke motho yo a itšego—le ge se se sa dirwa ke yena ka go lebanya. a

6.   Diriša phetolelo e nepagetšego ya Beibele.

7.   Phema go tswalanya seo Beibele e se bolelago le dikgopolo tše di fošagetšego tša bodumedi goba metlwae.

    Mehlala e latelago e bontšha kamoo mekgwa ye e ka thušago go hlalosa seo go thwego ke go se dumelelane ga Beibele.

Mokgwa wa Pele: Taba ka kakaretšo

Ge e ba Modimo a ile a ikhutša ka letšatši la bošupa, ke ka baka la’ng go ka thwe o ile a tšwela pele a šoma? Taba e akaretšwago pegong ya Genesi ya tlholo e bontšha gore taba ya gore ‘ka letšatši la bošupa Modimo o ile a khutša modirong wa gagwe wohle wo a o dirilego’ e bolela feela ka mošomo wa gagwe mabapi le go bopa lefase. (Genesi 2:2-4) Lega go le bjalo, Jesu o be a sa ganetšane le se ge a be a bolela ka gore Modimo “o tšwetše pele a šoma go fihla mo nakong ye,” ka baka la gore o be a bolela ka mediro e mengwe ya Modimo. (Johane 5:17) Mediro ya Modimo e akaretša go budulelwa ga Beibele, go nea tlhahlo le go hlokomela moloko wa batho—Psalme 20:6; 105:5; 2 Petro 1:21.

Mokgwa wa Bobedi le wa Boraro: Pono ya mongwadi le histori

Jesu o ile a foufolla monna wa sefofu kae? Puku ya Luka e re Jesu o foufollotše monna wa sefofu ge a be “a batamela Jeriko,” mola pego yona yeo go Mateo e bolela ka banna ba babedi ba difofu gomme yona e re tiragalo ye e diregile ge Jesu a “etšwa Jeriko.” (Luka 18:35-43; Mateo 20:29-34) Le ge dipego tše tše pedi di ngwadilwe go ya ka dipono tše fapanego, ge e le gabotse di a tlaleletšana. Mateo o boletše ka go lebanya palo ya banna bao gore e be e le ba babedi, mola Luka yena a bolela kudu ka monna yoo Jesu a ilego a bolela le yena. Mabapi le lefelo, baepi ba marope ba hweditše gore mehleng ya Jesu Jeriko e be e na le metse e mebedi e megolo, o mongwe e be e le motse wa kgale woo o bego o dulwa ke Bajuda o mongwe e le motse o mofsa wa Baroma, metse yeo e bego e šiana ka mo e ka bago khilomithara e tee le seripa. Go ka direga gore ge Jesu a be a dira mohlolo wo o be a le gare ga metse yeo e mebedi.

Mokgwa wa Bone: Seswantšho goba selo sa kgonthe

Na lefase le tla fedišwa? Go Mmoledi 1:4, Beibele e re “lefase le dula le le gona go iša mehleng ya neng le neng,” mola go ba bangwe e ka bonagala eka e a ikganetša ge e re “dikarolo tša lona ditla senywa ke mollo—gotee le lefase.” (2 Petro 3:10, Beck) Lega go le bjalo, ka Beibeleng, “lentšu lefase” le dirišitšwe ka tsela ya kgonthe le ya seswantšhetšo, ge e bolela ka tsela ya kgonthe e bolela ka polanete ya rena gomme ka tsela ya seswantšhetšo e bolela ka batho. (Genesi 1:1; 11:1) Go fedišwa ga lefase moo go bolelwago ka gona go 2 Petro 3:10 ga go bolele ka go fsa ga polanete ya rena eupša go bolela ka “tshenyego ya batho ba sa boifego Modimo.”—2 Petro 3:7

Mokgwa wa Bohlano: Selo go ka thwe se dirilwe ke motho le ge a se a se dira ka go lebanya

Kua Kaperenaume, ke mang yo a tlišitšego tona ya madira go Jesu? Mateo 8:5, 6 e re tona ya madira e ile ya itliša go Jesu, mola Luka 7:3 e re tona ya madira e ile ya kgopela banna bagolo ba Bajuda go mo kgopelela go Jesu. Ge e le gabotse pego ye ya Beibele yeo e bonagalago e ikganetša e ka hlaloswa ka gore tona ya madira ke yena a ntšhitšego kgopelo yeo, eupša o ile a romela banna bagolo.

Mokgwa wa Botshelela: Phetolelo e nepagetšego

Na ka moka re dira sebe? Beibele e re ka moka ga rena re abetše sebe go monna wa pele, Adama. (Baroma 5:12) .Diphetolelo tše dingwe di ganetšana le se ka gore motho yo a lokilego “ga a dire sebe.” (1 Johane 3:6, The Bible in Basic English; King James Version) Lega gole bjalo, lelemeng la mathomo, lediri la Segerika la “sebe” leo le lego go 1 Johane 3:6 le ka lebaka la bjale, seo se bolelago gore ka leleme leo le šupa go selo seo se tšwelago pele. Go na le phapano magareng ga sebe sa leabela seo re ka se se efogego, le sebe sa ka boomo seo motho a tšwelago pele a se dira sa go se kwe melao ya Modimo. Ka gona, diphetolelo tše dingwe di leka go fapanya mantšu a a mabedi ao a ganetšanago ka go diriša dipolelwana tše bjalo ka “ga a tlwaele go dira sebe” goba “ga a dire sebe ka boomo.”​—Phetolelo ya Lefase le Lefsa; Phillips.

Mokgwa wa Bošupa: Beibele, e sego metlwae

Na Jesu o lekana le Modimo goba ke yo monyenyane go yena? Jesu o kile a re: “Nna le Tate re batee,” mantšu ao a bonagala a ganetšana le ao a a boletšego ge a re: “Tate o mpheta ka bogolo.” (Johane 10:30; 14:28) E le gore re kwešiše ditemana tšeo gabotse, re swanetše go hlahloba seo Beibele e se bolelago ka Jehofa le Jesu go e na le go tswalanya ditemana tšeo le motlwae wa Borarobotee, woo o sa thewago Beibeleng. Beibele e bontšha gore Jehofa ga se Tatago Jesu feela eupša gape ke Modimo wa Jesu, Yoo Jesu le yena a Mo rapelago. (Mateo 4:10; Mareka 15:34; Johane 17:3; 20:17; 2 Bakorinthe 1:3) Jesu ga a lekane le Modimo.

 Taba e dikologilego mantšu a Jesu a rego: “Nna le Tate re batee,” a bontšha gore botee bjo a bego a bolela ka bjona ke bja go ba le morero o tee le Tatagwe, e lego Jehofa Modimo. Jesu ka morago o ile a re: “Tate o boteeng le nna gomme le nna ke boteeng le Tate.” (Johane 10:38) Jesu o be a na le morero o swanago le balatedi ba gagwe, ke ka baka leo a ilego a bolela ka bona ge a rapela Modimo, a re: “Le gona ke ba neile letago leo o nneilego lona, e le gore e be batee go etša ge rena re le batee. Nna ke be boteeng le bona gomme wena o be boteeng le nna.”—Johane 17:22, 23.