Ke ga tlhago go ipotšiša lebaka leo batho ba hwago, kudukudu ge re hwelwa ke motho yo re mo ratago kudu. Beibele e re: “Lebolela le le tšweletšago lehu ke sebe.”—1 Bakorinthe 15:56.

Ke ka baka la’ng batho ka moka ba dira dibe le go hwa?

 Batho ba pele e lego Adama le Efa, ba lahlegetšwe ke maphelo ka gobane ba diretše Modimo sebe. (Genesi 3:17-19) Lehu e bile ditlamorago tša go rabela ga bona go Modimo, ka gobane yena ke “mothopo wa bophelo.”—Psalme 36:9; Genesi 2:17.

  Adama o fetišeditše bogole bja sebe go ditlogolwana tša gagwe ka moka. Beibele e re: “Ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” (Baroma 5:12) Batho ka moka ba hwa ka gobane ka moka ba dira sebe.—Baroma 3:23.

Kamoo lehu le tlago go fedišwa

 Modimo o holofetša nako yeo ka yona a tlago go “metša lehu ka mo go sa felego.” (Jesaya 25:8) E le gore a fediše lehu, o swanetše go fediša sebaki sa lona se segolo, e lego sebe. E le gore a phethe se, Modimo o tla diriša Jesu Kriste yoo a “tlošago sebe sa lefase.”—Johane 1:29; 1 Johane 1:7.