Ga go na mo Beibele e dirišago polelwana “go ntšha mpa’’. Lega go le bjalo, ditemana tše dintši tša Beibele di bontšha kamoo Modimo a lebelelago bophelo ka gona, go akaretša le bophelo bja ngwana yo a sa hlwago a belegwa.

 Bophelo ke mpho yeo e tšwago go Modimo. (Genesi 9:6; Psalme 36:9) Bophelo bo bohlokwa go Modimo, go akaretša le bophelo bja ngwana yoo a sa bopegago ka popelong. Ka gona, ge motho a ntšha mpa, go no swana le ge a bolaile motho.

 Molao wo Modimo a bego a o file Baisiraele o be o re: “Ge batho ba elwa ke moka ba gobatša mosadi wa moimana gomme ngwana wa gagwe a belegwa eupša kotsi yeo ya se bolaye motho, gona yo a mo gobaditšego a lefišwe go ya le kamoo mong wa mosadi yoo a ka lefišago ka gona; a lefe go ya le ka phetho ya baahlodi. Ge e ba go ka direga kotsi e šoro, gona bophelo bo lefše ka bophelo.”—Ekisodo 21:22, 23. a

•  Bophelo bja motho bo thoma bjang?

•  Na go a kgonega gore Modimo a lebalele motho yoo a kilego a ntšha mpa?

•  Na ke phošo go ntšha mpa ge eba bophelo bja ngwana goba bja mma bo le kotsing?

 Go ya ka Modimo, bophelo bja motho bo thoma ge mosadi a sa tšwa go ima ngwana. Ka Lentšung la gagwe e lego Beibele, Modimo o bolela ka ngwana yoo a sa lego ka polelong ya mmagwe gore ke motho yoo a phelago. Ekwa ka e mengwe ya mehlala yeo e bontšhago gore go Modimo, ga go na phapano magareng ga bophelo bja ngwana yoo a sa lego ka popelong ya mmagwe le yoo a šetšego a belegwe.

•   Ge Kgoši Dafida a be a hlahlwa ke moya o mokgethwa, o ile a re go Modimo: “Mahlo a gago a mpone ke sa thoma go bopega.” (Psalme 139:16) Modimo o ile a tšea Dafida bjalo ka motho yoo a phelago, gaešita le ge a be a sešo a belegwa.

•   Go oketša moo, le pele moporofeta Jeremia a ka belegwa, Modimo o be a šetše a tseba gore o nyaka go mo nea kabelo e bohlokwa. Modimo o ile a botša Jeremia gore: “Ke go tsebile pele ke go bopa ka mpeng, ka go kgethagatša pele ga ge o etšwa ka popelong. Ke go dirile moporofeta ditšhabeng.”—Jeremia 1:5.

•   Mongwadi wa Beibele e lego Luka, yo e bego e le ngaka, o ile a šomiša lentšu la Segerika go hlalosa ngwana yoo a sa lego ka popelong ya mmagwe ka tsela yeo a hlalosago ngwana yoo a sa tšwago go belegwa.—Luka 1:41; 2:12, 16.

 Ee, go a kgonega gore Modimo a lebalele motho yoo a kilego a ntšha mpa. Ge eba ga bjale batho ba bao ba hlompha bophelo go swana le tsela yeo Modimo a bo hlomphago ka yona, ga go hlokagale gore ba ikwe ba le molato. “Jehofa o a gaugela e bile o a šokela . . . Go etša ge bohlabela bo le kgole le bodikela, le dikarogo tša rena o di lahletše kgole le rena ka tsela yeo.” b (Psalme 103:8-12) Jehofa o tla lebalela batho bohle bao ba tlogago ba itsholela dibe tšeo ba kilego ba di dira kgale, go akaretša le bao ba kilego ba ntšha mpa.—Psalme 86:5.

 Ka morago ga go kwa gore Modimo o ikwa bjang ka bophelo bja ngwana yoo a sa lego ka popelong, motho ga a na lebaka leo le kwagalago la go ntšha mpa le ge e ba bophelo bja ngwana goba bja motho yo a imilego bo ka ba kotsing.

 Go thwe’ng ge e ba ka letšatši le lengwe ge ngwana a belegwa, maemo a gapeletša gore gare ga mma le ngwana go swanetše go phela motho yo mo tee gomme gwa hlokofala yo mo tee? Maemong a go swana le a, bao ba lebanego le bothata bjoo, ke bona ba tla dirago phetho ya gore ba nyaka go phološa bophelo bja mang.