Bakriste ba a dumela gore Jesu o hwetše dibe tša batho. (1 Petro 3:18) Eupša seo ga se bolele gore ge ba ka no dumela feela gore Jesu ke mophološi, ba tla phologa. Batemona le bona ba a tseba gore Jesu ke “Morwa wa Modimo,” eupša seo ga se bolele gore ba tlo phološwa, ba tlo fedišwa.—Luka 4:41; Juda 6.

•  Nka dira eng gore ke tle ke phološwe?

•  Na re swanetše go rapela “Thapelo ya Modiradibe”?

•  “Thapelo ya Modiradibe” e tšwa kae?

•   O swanetše go dumela gore Jesu o gafile bophelo bja gagwe bakeng sa dibe tša rena. (Ditiro 16:30, 31;1 Johane 2:2) Se se akaretša go dumela gore Jesu e be e le motho wa kgonthe le gore dilo tšeo di ngwadilwego ka yena ka Beibeleng di nepagetše.

•   Ithute seo Beibele e se rutago. (2 Timotheo 3:15) Beibele e re Moapostola Paulo le Silase ba ile ba botša mogolegwa yo mongwe gore: “Dumela go Morena Jesu gomme o tla phološwa.” Ka morago ga moo, ba ile ba thoma go ruta mogolegwa yoo “lentšu la Jehofa.” a (Ditiro 16:31, 32) Se se bolela gore e le gore mogolegwa yoo a dumele go Jesu, o be a swanetše gore a thome pele ka go kwešiša Lentšu la Modimo le go ba le tsebo e nepagetšego ya Mangwalo.—1 Timotheo 2:3, 4.

•   Itshole. (Ditiro 3:19) O swanetše go itshola, goba go kwišwa bohloko ke dilo tše mpe tšeo o kilego wa di dira goba wa nagana ka tšona nakong e fetilego. Ge o bontšha gore o a itshola, batho ba bangwe ba tlo bona gore ga o sa dira dilo tšeo Modimo di hloilego le gore o dira “mediro yeo e swanelago boitsholo.”—Ditiro 26:20.

•   Kolobetšwa. (Mateo 28:19) Jesu o ile a re batho bao e tlago go ba barutiwa ba gagwe ba tlo kolobetšwa. Mogolegwa yoo re boletšego ka yena peleng o ile a kolobetšwa (Ditiro 16:33) Ka mo go swanago, ka morago ga gore moapostola Petro a rute batho ba bantši ditherešo ka Jesu, “bao ba amogetšego lentšu la gagwe ka pelo ka moka ba ile ba kolobetšwa.”—Ditiro 2:40, 41.

•   Ekwa ditaelo tša Jesu’. (Baheberu 5:9) Batho bao ba ‘bolokago dilo tšohle’ tšeo Jesu a di laetšego, re tla ba bona ka mediro ya bona gore ke balatedi ba gagwe. (Mateo 28:20) E ba “badiri ba lentšu, e sego bakwi feela.”—Jakobo 1:22.

•   Kgotlelela go fihla bofelong. (Mareka 13:13) E le gore barutiwa ba Jesu ba tle ba phološwe, ‘go nyakega gore ba kgotlelele.’ (Baheberu 10:36) Ka mohlala, moapostola Paulo o be a leka ka thata gore a dule a latela dilo ka moka tšeo Jesu a ilego a di ruta e bile o ile a dula a botegela Modimo. Le gona, o ile a kgotlelela go tloga ka letšatši leo e bilego Mokriste ka lona go fihla ka letšatši leo a ilego a hlokofala ka lona.—1 Bakorinthe 9:27.

 Dikerekeng tše dingwe batho ba rapela dithapelo tše bjalo ka “Thapelo ya Modiradibe” le “Thapelo ya Phološo.” Gantši batho bao ba rapelago dithapelo tšeo, ba ipobola dibe tša bona le go bontšha gore ba na le tumelo ya gore Jesu o hwile bakeng sa dibe tša bona. Le gona ba kgopela Jesu gore a be karolo ya maphelo a bona goba gore a tsene ka dipelong tša bona. Eupša Beibele ga e kgothaletše batho gore ba rapele “Thapelo ya Modiradibe” e bile ga e bolele ka yona.

 Batho ba bangwe ba nagana gore ge ba se no fetša go rapela “Thapelo ya Modiradibe,” ba tlo phološetšwa sa ruri. Eupša ga go na motho yo a ka phološwago ke gore o rapetše. Ka ge re le batho bao ba nago le sebe, re dula re dira diphošo. (1 Johane 1:8) Ke ka baka leo Jesu a ilego a ruta balatedi ba gagwe gore ka mehla ge ba rapela, ba kgopele Modimo gore a ba lebalele dibe tša bona. (Luka 11:2, 4) Go oketša moo, Bakriste ba bangwe bao ba ilego ba tlogela go hlankela Jehofa, ba ile ba lahlegelwa ke tokelo ya go tlo phela ka mo go sa felego.—Baheberu 6:4-6; 2 Petro 2:20, 21

 Boradihistori ba na le dikgopolo tša go se swane tabeng ya gore “Thapelo ya Modiradibe” e tšwa kae. Ba bangwe ba nagana gore thapelo ye e thomile ka 1517 ge batho ba bantši ba tlogela kereke ya Katholika gomme go hlongwa dikereke tše dingwe tša Bokriste. Mola ba bangwe ba dumela gore “Thapelo ya Modiradibe” e thomile nakong ya ge batho ba be ba thoma go tlwaelana le dikereke tše mpsha magareng ga ngwaga wa bo-1700 le wa bo-1800. Go sa šetšwe seo batho ba se bolelago, Beibele ga e re kgothaletše go rapela “Thapelo ya Modiradibe” e bile e re ga se ra swanela go boaboetša thapelo le ge e le efe.