Mongwadi wa Beibele e lego Luka o boletše mabapi le pego ya bophelo bja Jesu gore: “Ke latišišitše dilo ka moka go tloga mathomong ka mo go nepagetšego.”—Luka 1:3.

 Batho ba bangwe ba bolela gore dipego tša bophelo bja Jesu go etša ge di begilwe ka Diebangeding—ke gore dingwalwa tša batho bao ba phetšego mehleng ya gagwe e lego Mateo, Mareka, Luka le Johane—di ile tša fetošwa ka bo-300 C.E.

 Lega go le bjalo, seripa se bohlokwa sa sengwalwa sa Ebangedi ya Johane se ile sa hwetšwa kua Egipita mathomong a bo-1900. Ga bjale se tsebja e le Papyrus Rylands 457 (P⁵²) gomme se bolokilwe Bokgobapukung bja John Rylands, Manchester, Engelane. Se hupere seo Dibeibeleng tša mehleng yeno e lego Johane 18:31-33, 37, 38.

 Se ke seripa sa kgale kudu sa sengwalwa sa Mangwalo a Bakriste a Segerika. Diithuti tše dintši di dumela gore se ngwadilwe mo e ka bago ka 125 C.E., e lego feela nywaga e ka bago e 25 goba ka godimo ga moo ka morago ga sengwalwa sa mathomothomo seo se ngwadilwego ke Johane. Dikagare tša sengwalwa seo di nyakile di dumelelana tlwaa le dikagare tša dingwalwa tša ka morago.