Ke sebakanyana le ratana eupša ga bjale o thoma go belaela. Na le swanetše go tšwela pele le ratana goba le kgaogane? Sehlogo se se tlo go thuša gore o dire phetho.

Sehlogong se

•  Go lebeletšana le go belaela

•  Go dira diphetho

•  Ge o phetha ka gore le kgaogane

 Lesogana le lekgarebe ge ba dutše ba ratana ba ka lemoga gore ga ba thabele dilo tša go swana. Ka mohlala:

•   Yo mongwe o thabela go ya lewatleng, mola yo mongwe a thabela go namela dithaba

•   Yo mongwe o thabela go dula le batho, mola yo mongwe a thabela go dula ka gae.

•   Yo mongwe o fela a bolela maaka, mola yo mongwe a rata nnete.

 Maemo a ka moka ga a swane. Boemo bja mathomo ke bja go thabela dilo tša go se swane, bja bobedi ke bja go se be le mekgwa ya go swana ke moka bja boraro ke bja go se bone dilo go swana.

 Seo o ka naganišišago ka sona: Go dintlha tše tharo tšeo go boletšwego ka tšona, ke efe yeo o ka palelwago ke go e kgotlelela ge eba o ka nyalana le motho yoo? Goba ke efe yeo lena ka bobedi le ka e kgotlelelago?

 Monna le mosadi ba ka no se thabele dilo tša go swana goba ba se be le mekgwa ya go swana, eupša ba ba le lenyalo leo le thabilego. Ge le swanelana seo ga se bolele gore le ka mekgwa le tla swana. Mabakeng a mangwe monna le mosadi ba ithuta go thabela dilo tšeo molekane yo mongwe a di ratago goba go lebelela dilo ka tsela yeo molekane yo mongwe a di lebelelago ka gona. a

 Ka lehlakoreng le lengwe go bohlokwa gore motho yo o nyalanago le yena le swane ka tsela yeo le lebelelago dilo ka gona, le be le tumelo e swanago, le go gola moyeng. Ge eba motho yoo a se na dika tše, gona o ka swanela ke go kgaogana le yena.

 Ka mohlala ga re re bodumedi bja lena ga bo swane. Puku ya Fighting for Your Marriage e re: “Go ya ka nyakišišo, banyalani bao ba sego bodumeding bja go swana, gantšhi ke bona ba hlalanago.”

 Molao wa motheo wa Beibele: “Le se ke la gogišana le bahlokatumelo, gobane toka e ka sepedišana bjang le go se loke?”—2 Bakorinthe 6:14, Phetolelo ya Ditaba tše Dibotse.

  Beibele e re bao ba nyalago ba tla ba le “tlaišego nameng.” (1 Bakorinthe 7:28, Phetolelo ya Lefase le Leswa) Ka baka leo o se ke wa makala ge o kopana le ditlhohlo ge le dutše le ratana.

 Go se kwane ga dikgopolo ga go bolele gore segwera sa lena se ka se atlege. Le swanetše go ipotšiša gore na le ka kgona go rarolla mathata a lena ka khutšo? Le tlo hloka seka seo lenyalong la lena.

 Molao wa motheo wa Beibele: “Bontšhanang botho, le kwelane bohloko, le lebalelane ka pelo ka moka.”—Baefeso 4:32.

 Ka lehlakoreng le lengwe, ge le fela le eba le diphapano le go se kwane, seo se ka bolela gore ga le swanelane. Ge eba go le bjalo, gona go kaone go tseba seo e sa le ka pela go ena le go tseba ka morago ga ge le nyalane.

 Tabataba: Ge eba o belaela motho yo o ratanago le yena goba o thoma go ipotšiša ge eba o loketše gore o ka nyala goba wa nyalwa, o se ke wa hlokomologa maswao ao.

 Molao wa motheo wa Beibele: “Yo bohlale o bona kotsi gomme a ikuta, Eupša wa setlaela o sepela a lebile kotsi yeo gomme a wela mathateng.”—Diema 22:3.

 Ge le kgaogana seo se ka le kweša bohloko. Eupša ge eba yo mongwe wa lena a thoma go tshwenyega kudu goba go belaela ka tswalano ya lena, gona go ka ba kaone gore le kgaogane.

 O ka dira seo bjang? Ge eba maemo a dumela go ka ba kaone gore ge le tlo boledišana, le kgethe nako le lefelo tšeo di swanetšego go ena le gore le kgaogane ka molaetša wa founo goba email.

  Molao wa motheo wa Beibele: “Botšanang nnete.”—Sakaria 8:16.

 Na ge o kgaogana le motho yo o ratanago le yena seo se bolela gore o paletšwe? Le gatee! Gopola gore go ratana le motho yoo go swanetše go go thuša go dira phetho ya ge eba o tla nyalana le yena goba aowa. Le ge le ka kgaogana, go na le seo o ka ithutago sona tswalanong yeo.

 Ipotšiše: ‘Ke ithutile eng ka nna tswalanong yeo? Na e nthutile go bona dilo tšeo nka kaonefatšago go tšona pele nka tsena lenyalong? Nka dira eng se se fapanego ge eba ke kgetha go ratana gape?’