MANILA, Philippines—Ledimo le matla la Haiyan (leo le bitšwago Yolanda ka se Sephilippine), e lego ledimo le matla kudu leo le wetšego naga yeo, le hlasetše Philippines ka November 8, 2013.

Go tloga ka November 13, 2013, ofisi ya lekala ya Dihlatse tša Jehofa ya Philippines e lego kua Manila e begile gore go hlokofetše Dihlatse tše 27. Magae a Dihlatse a 100 le mafelo a mahlano a borapedi a sentšwe ke ledimo.

Sehlopha se Bušago sa Dihlatse tša Jehofa kua ntlokgolo ya sona ya Brooklyn, New York, se lokišetša modiro wa lefase ka bophara wa go thuša dinakong tša dikotsi. E le karolo ya ditokišetšo tše, ofisi ya lekala ya Philippines e dutše e leka go išetša mafelo ao a kgomilwego ke kotsi dijo, meetse, dihlare tša kalafo le dilo tše dingwe tšeo di nyakegago. Ka Sontaga November 10, ke ge go tlile dilori tše ka bago tše lesome tšeo di tletšego ditlabakelo tša tlhakodišo gomme letšatšing le le latelago gwa tla dilori tše dingwe gape.

Batho ba tikologo yeo ga se ba ka ba ba le sebaka sa go lokiša tshenyo yeo e bakilwego ke tšhišinyego ya lefase ya bogolo bja 7.2 yeo e hlasetšego Philippines ka October 15, 2013, yeo e bolailego batho ba 218. Dipego di bontšha gore tšhišinyego ye e kgolo ya lefase e bolaile Dihlatse tša Jehofa tše tharo, e nngwe e bolailwe ke go kgerega ga maswika le go elela ga maraga mola tše dingwe tše pedi di wetšwe ke magae a tšona. Tšhišinyego ye e tlile ka moragonyana ga Ledimo le matla la Nari, leo le hlasetšego Philippines ka October 12, 2013, leo le bolailego batho ba 13.

Sehlopha se Bušago sa Dihlatse tša Jehofa se hlokomela ditshenyagalelo tša go hlakodiša ka go diriša meneelo ya lefase ka bophara. Sehlopha se Bušago gape se nyaka baithaopi bao ba nago le bokgoni gomme se dirišana le diofisi tša makala lefaseng ka moka go hwetša batho bao ba nago le bokgoni go thuša ka modiro wa go hlakodiša ba dirišana le balaodi le mekgatlo e mengwe ya naga.

Dean Jacek, e lego mmoleledi wa Dihlatse tša Jehofa kua Philippines, o itše: “Re tloga re kwele bohloko kudu ka baka la go hlokofalelwa moo go bakilwego ke masetlapelo ao a sa tšwago go direga. Ka baka la tshenyo ye le go huduega maikwelo ga bao ba kgomilwego ke kotsi go tloga go na le tlhokagalo e kgolo ya go ba homotša. Re tla tšwela pele re dira sohle seo re ka se kgonago go nea tlhakodišo le go thuša moyeng bagwera ba rena le baagišani.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Philippines: Dean Jacek, mogala +63 2 411 6090