Kua Eritrea Dihlatse tša Jehofa di tlaišwa o šoro go feta le ge e le kae lefaseng. Ga e sa le Eritrea e thoma go ipuša ka 1993, Dihlatse di be di dula di golegwa, di tlaišwa le go nyatšwa. Di a tlaišwa ka gobane ga di tšee karolo dipolotiking e bile di gana go yo lwa le batho ba bangwe.

Gona bjale Dihlatse tša Jehofa tše 54 di kgolegong kua Eritrea. Mengwageng e 22 e fetilego, ke o tee feela yo a ilego a sekišwa goba molato wa gagwe wa theetšwa kgorong ya tsheko. Ba bararo ba bona ga e sa le ba golegwa ka 1994 ka ge ba ganne go tsenela bošole ka baka la letswalo.

Ga e sa le Dihlatse tša Jehofa kua Eritrea di thomile go tlaišwa, mekgatlo ya ditokelo tša batho le ya mmušo ya dinageng tše dingwe e be e dutše e ganetšana le go tlaišwa ga Dihlatse. Lega go le bjalo, morago bjale Commission of Inquiry on Human Rights in Eritrea (COIE), e lego sehlopha sa Ditšhaba tše Kopanego, se dirile gore dinaga tše dingwe di tshwenyege le go feta ka go tlaišwa ga Dihlatse. Pegong ya sona ya mathomo yeo e lokolotšwego ka June 2015 yeo e bego e lebišitšwe go Mokgatlo wa Ditokelo tša Batho wa Ditšhaba tše Kopanego (UN Human Rights Council [HRC]), COIE e ile ya ngwala ka go gatelelwa le go swarwa gampe ga Dihlatse tša Jehofa.

Ka di-21 tša June 2016, lekgotla la COIE le ile la iša pego ya lona ya bobedi yeo e nago le ditaba ka botlalo go HRC. Lekgotla la COIE le ile la laela Eritrea “gore e hlomphe tokologo ya bodumedi goba ya seo motho a se dumelago” le gore “e se sa golega batho ka go hloka toka ka baka la bodumedi bja bona, kudukudu ba dihlopha tše itšego tše bjalo ka Dihlatse tša Jehofa, . . . le gore gateetee e lokolle ntle le go bea mabaka batho ka moka bao ba golegilwego ka tsela e sego molaong e bile go se na mabaka a gore ba golegwe.”

Ge lekgotla la COIE le be le dira dinyakišišo le hweditše gore ge Eritrea “e tlaiša dihlopha tše itšego tša madumedi le tša merafo” e thulana le molao wo o dirišwago lefaseng ka moka e bile seo “ke go senyetša batho.” Dinaga tše dingwe lefaseng ka moka di lebelela tlaišo ye e le e nngwe ya go gatakelwa ka tsela e feteletšego ga ditokelo tša batho. Lekgotla la COIE le tla botša Lekgotlakakaretšo la Ditšhaba tše Kopanego ditlamorago ka di-27 tša October, 2016.

Dihlatse tša Jehofa lefaseng ka moka di tshwenyegile kudu ka badumedigotee le tšona ba kua Eritrea. Di ipiletša ka go tšwa pelong go mmušo wa Eritrea gore o tlogele go tlaiša Bakriste ba bao ba se nago molato gomme o ba dumelele go thabela tokelo ya bona ya motheo yeo e ka se fetogego.