COPENHAGEN, Denmark—Mekero ya go bega ditaba kua Denmark e begile gore dipetlele tša Denmark di thomile go amogela mokgwa o mofsa wa go diriša madi. Kuranta ya Kristeligt Dagblad, e boletše gore: “Go lemogilwe gore balwetši ba bantši ba ka kgona go alafša ntle le tšhelo ya madi.” Kuranta ye e oketša ka gore, “Dihlatse tša Jehofa ke tšona tšeo di dirilego gore mokgwa wa go dira ophareišene ntle le tšhelo ya madi o dirišwe.” Go se tšhelwe ga tšona madi mo go theilwego ditumelong tša tšona tša bodumedi, go dirile gore Dihlatse tša Jehofa tše fetago dimilione tše seswai lefaseng ka bophara, go akaretša le tše fetago 14 000 tša kua Denmark, di nyake kalafo e kaonekaone ntle le tšhelo ya madi.

Dipetlele tša Denmark di tsebega kudu lefaseng ka go diriša madi go alafa balwetši ba tšona go feta dipetlele tše dingwe tša Yuropa ka diperesente tše 50-100. Lega go le bjalo, sehlogong seo se rego: “Go Dira Ophareišene Ntle le Tšhelo ya Madi go Dirišwa Kudu,” mokero o mongwe wa ditaba wa Politiken o ile wa lemoga gore, “Dihlatse tša Jehofa di dira gore dingaka di nyake mekgwa e mengwe” ya kalafo yeo e dirwago ka ntle le go diriša madi. Ge di alafa balwetši ba Dihlatse, dingaka tše dingwe di thomile go diriša mekgwa yeo e seketšago madi, go swana le go nea molwetši erythropoietin yeo e oketšago disele tše dikhwibidu gotee le go diriša iron le dibithamine tša B-complex pele ga ge molwetši a ka dirwa ophareišene le go nea molwetši diphilisi tša antifibrinolytics tšeo di thušago gore madi a se ke a kgahla nakong ya ge molwetši a dirwa ophareišene. The Copenhagen Post, e boletše gore: “Ngwaga le ngwaga Dihlatse tša Jehofa tše hlano go ya go tše lesome di dirwa diophareišene tše di raraganego tša pelo kua sepetleleng sa Aarhus University Hospital Skejby” ntle le go diriša madi.

Lefapha la maphelo kua Denmark le lona le lemogile gore go na le bohlatse bjo bontši bja gore go tšhelwa madi go na le ditlamorago tše kotsi kudu. Rigshospitalet e lego sepetlele se sengwe kua Copenhagen se ile sa hloma lenaneo la go diriša madi ka šedi ka 2009, leo kuranta ya Berlingske e begilego ka lona gore go se sa diriša madi kudu go dirile gore balwetši ba “se be le mathata a mantši nakong ya ophareišene le go fokotša palo ya mahu.” Dipetlele tše dingwe tša Denmark e šetše e le karolo ya lenaneo le, ka gona dipetlele tša dileteng tše dingwe le tšona di nyaka go diriša mokgwa wo wa kalafo.

Kuranta ye ya Berlingske e bolela kamoo Dr. Morten Bagge Hansen, yoo e lego monyakišiši le molaodi wa blood bank kua sepetlele sa Rigshospitalet a hlalosago kamoo Denmark e fokoditšego go dirišwa ga madi ka gore: “Ke mogato o bohlokwa le woo o holago balwetši.” Go oketša moo, Denmark Radio le Kristeligt Dagblad bobedi di tsopotše seo Dr. Astrid Nørgaard, yoo e lego Molaodi wa sepetlele sa Rigshospitalet a se boletšego ge a re “Ge nkabe e se ka Dihlatse tša Jehofa, go dira ophareišene ntle le tšhelo ya madi go be go ka se dirišwe lehono.”

Ba Ditaba:

Bakeng sa Ditšhabatšhaba: J. R. Brown, Ofisi ya Boditšhabatšhaba, mogala +1 718 560 5000

Denmark: Erik Jørgensen, mogala +45 59 45 60 00