Dihlatse tša Jehofa di aba Beibele ya Phetolelo ya Lefase le Lefsa ya Mangwalo a Makgethwa go yo mongwe le yo mongwe yo a nyakago go e bala.

Gaešita le ge mekgatlo e fapafapanego ya Beibele e gatišitše Dibeibele tše dibilione ka diphetolelo tše dintši, bodiidi le kgethollo tšeo di lego bodumeding di thibela batho ba bantši go hwetša Beibele ka maleme a gabo bona. Dihlatse tša Jehofa tšona di aba Phetolelo ya Lefase le Lefsa ka maleme a ka godimo ga a 115.

Ela hloko mehlala ye:

• Rwanda: Silvestre le Venantie bao ba nago le bana ba bane ba hlalosa gore: “Ka ge re diila kudu, re be re sa kgone go rekela yo mongwe le yo mongwe Beibele ka mo gae. Gona bjale, yo mongwe le yo mongwe o na le Beibele ya Phetolelo ya Lefase le Lefsa ka Sekinyarwanda gomme re e bala re le gotee letšatši le letšatši.”

  Moruti wa kereke ya Anglican nageng yeo o itše: “Ye ke Beibele yeo ke kgonago go e kwešiša. E phala Dibeibele ka moka tšeo nkilego ka di bala. Dihlatse tša Jehofa di tloga di rata batho!”

• Democratic Republic of the Congo: Dikereke tše dingwe di be di gana go rekišetša Dihlatse tša Jehofa Dibeibele tša Selingala, e lego leleme leo le bolelwago ke batho ba bantši nageng yeo.

  Ka gona, ga go makatše gore ga e sa le Phetolelo ya Lefase le Lefsa e lokolotšwe ka Selingala, Dihlatse tša Congo di ile tša diriša Beibele ye ka mafolofolo le go e aba ka phišego. Ge e le gabotse, batho ba bantši ba thabetše Beibele ye ya Phetolelo ya Lefase le Lefsa kudu moo e lego gore ge e be e lokollwa kopanong ya Dihlatse tša Jehofa, maphodisa ao a bego a le gona moo a ile a ema laeneng gore a ikhweletše Dibeibele.

• Fiji: Dibeibele tša Sefiji di tura kudu moo e lego gore nakong e fetilego Dihlatse tša Jehofa tše dintši di be di diriša Beibele ya Phetolelo ya Lefase le Lefsa ya Seisemane. Lega go le bjalo, ka 2009 batho ba Fiji ba ile ba hwetša Phetolelo ya Lefase le Lefsa ya Mangwalo a Bakriste a Segerika (Testamente e Mpsha) ka segagabo bona.

  Monna yo mongwe o be a kgahlilwe kudu ke go kwagala ga Phetolelo ya Lefase le Lefsa ka Sefiji moo a ilego a kgopela kopi. Lega go le bjalo, Dihlatse tša lefelong leo di ile tša hlalosa gore o be a swanetše go leta kgwedi pele Dibeibele di ka romelwa toropong yeo. Ka ge monna yoo a be a se a ikemišetša go leta nako e telele gore a hwetše Beibele, o ile a dumela go sepela dikhilomithara tša ka godimo ga tše 35 go yo gahlana le Hlatse e nngwe yeo e bego e tla mo nea Phetolelo ya Lefase le Lefsa. Monna yoo o itše: “Phetolelo ye e phala yeo gantši re e dirišago. E a kwagala e bile e kwešišega gabonolo.”

• Malawi: Ka morago ga gore Davide a thome go ithuta Beibele le Dihlatse tša Jehofa, ditho tša mokgatlo wa kereke ya Baptist ya lefelong leo di ile tša ya legaeng la gagwe gomme tša mo amoga Beibele yeo di bego di mo neile yona. Ka gona, go lokollwa ga Phetolelo ya Lefase le Lefsa ka Sechewa e be e le selo seo Davide e bego e le kgale a se letetše.

  Ka ge Dibeibele di tura kudu Malawi, Davide o be a ipotšiša gore a ka hwetša bjang Beibele. Eupša ge a be a newa kopi ya Phetolelo ya Lefase le Lefsa o itše: “Ga bjale ke na le Beibele e kaone go feta yeo ke bego ke na le yona!”

Nywaga ya ka godimo ga e 60 e fetilego ge karolo ya mathomo ya Phetolelo ya Lefase le Lefsa ka Seisemane e be e lokollwa kua kopanong ya New York City, batheetši ba ile ba kgothaletšwa gore: “E baleng. Ithuteng yona . . . E neeng ba bangwe.” E le go fihlelela seo, Dihlatse tša Jehofa di gatišitše dikopi tša ka godimo ga tše dimilione tše 175 tša Phetolelo ya Lefase le Lefsa. Go feta moo, gona bjale o ka bala Beibele Inthaneteng ka maleme a e ka bago a 50.