Ka ge re le Dihlatse tša Jehofa, re rata go boledišana ka Beibele le batho ba madumedi ka moka, eupša ga re sware diboka tša bodumedi le dikereke tše dingwe. Beibele e re botša gore Bakriste ba therešo ba “kopantšwe gotee ka kwano,” gomme kwano ye e bonagala go seo re se dumelago. (Baefeso 4:16; 1 Bakorinthe 1:10; Bafilipi 2:2) Se se bolela gore Bakriste ga ba swanela go no bontšhana feela dika tše bjalo ka lerato, kwelobohloko le go lebalela. Ditumelo tša bodumedi bja rena di theilwe tsebong e nepagetšego ya ka Beibeleng yeo ge e ba re se na yona tumelo ya rena ke lefeela.—Baroma 10:2, 3.

Beibele e swantšha go itswaka le batho ba madumedi a mangwe le go rwala joko e boima, e lego selo seo se ka senyago tumelo ya Mokriste. (2 Bakorinthe 6:14-17) Ka baka leo, Jesu ga se a ka dumelela barutiwa ba gagwe gore ba itswake le madumedi a mangwe. (Mateo 12:30; Johane 14:6) Le gona, Molao wa Modimo woo a o neilego Moshe, o be o ganetša Baisiraele ba bogologolo go itswakanya le batho ba madumedi a mangwe. (Ekisodo 34:11-14) Ka morago, Baisiraele ba botegago ba ile ba gana ge batho ba madumedi a mangwe ba be ba nyaka go ba thuša ka ge seo se be se ka dira gore ba itswakanye le bona.—Esera 4:1-3.

Ee. Ge e le gabotse ngwageng wa 2023 re feditše diiri tše 1 791 490 713 re boledišana le batho ba madumedi a mangwe ka Modimo. Go swana le moapostola Paulo, re ipea boemong bja “batho ba bantši ka mo go ka kgonegago” ge re boledišana le bona ka Beibele. (1 Bakorinthe 9:19-22) Ge re boledišana le batho ba bangwe, re leka go diriša keletšo ya Beibele ya gore re ba bontšhe “tlhompho e tseneletšego.”—1 Petro 3:15.