Ka letšatši le lengwe ge Eliso, e lego mosadi yo mongwe yo e lego Hlatse ya Jehofa, a be a etetše mosadi yo mongwe go yo bala le yena Beibele, go ile gwa tsena baeng bao mosadi yo a bego a sa tsebe gore ba tlo tla. Baeng bao e be e le moruti le mosadi wa gagwe. Eliso o be a kwele gore banyalani ba ba be ba sa tšwa go hlokofalelwa ke morwa a nnoši wa bona.

 Ge Eliso a be a ba kgothatša le go ba homotša, moruti yoo le mosadi wa gagwe ba ile ba thoma go lla gabohloko. Ke moka moruti yoo o ile a bolela a kwatile a re: “Ga ke kwešiše gore go re’ng Modimo a re leka ka tsela ye! Go re’ng a nkamoga morwa wa ka yo e lego yena a nnoši? Ke na le mengwaga e 28 ke tsena kereke, ke dira dilo tše dintši tše dibotse, bjale o tlo mpatela ka yona tsela ye! Ke ka baka la’ng Modimo a bolaile morwa wa ka?”

 Eliso o ile a hlalosetša banyalani bao gore Modimo ga se a tšea morwa wa bona. Le gona o ile a ba ruta ka sehlabelo sa Jesu sa topollo, gore go tlo ba le tsogo ya bahu le gore ke ka baka la eng Modimo a dumelela dilo tše mpe di direga. Moruti yoo le mosadi wa gagwe ba ile ba botša Eliso gore o ba neile dikarabo tša dipotšišo tšeo ba bego ba rapela Modimo gore a ba nee tšona.

 Bekeng e latelago moruti yoo le mosadi wa gagwe ba ile ba boa gape ge Eliso a be a bala Beibele le mosadi yoo. Eliso le mosadi yoo ba be ba bala kgaolo yeo e rego “Kholofelo ya Kgonthe Bakeng sa Baratiwa ba Gago ba ba Hwilego,” ka pukung ya Ke Eng Seo ge e le Gabotse Beibele e se Rutago? Banyalani bao ba ile ba tšea karolo poledišanong yeo.

 Ka morago moruti yoo le mosadi wa gagwe ba ile ba ba gona kopanong e kgethegilego ya Dihlatse tša Jehofa toropong ya Tbilisi kua Georgia. Ba ile ba kgahlwa kudu ke lerato le botee tšeo ba ilego ba di bona kopanong yeo, e lego selo seo e lego kgale ba leka go se ruta batho ba kerekeng ya bona eupša go no pala.