Tsowa di Hlatolla ke Mareka 12:1-44
-
Mošupetso wa ba go lema ba gore baa bolaya (1-12)
-
Modimo le Kesara (13-17)
-
Ba butsisa ka go tsusiwa ga bo ba gore ba kgwile (18-27)
-
Melawo ka mmedi ye megologolo (28-34)
-
Ayitsano Kreste ke morwayi wa Dafita? (35-37a)
-
Go pasopisiwa ka bomabhalane (37b-40)
-
Ditšheleta tsa tshipi ka dipedi tsa mosadi wa go tihlupegela wa gore fote o kgwele ke monna (41-44)
12 A thomisa go bolabola nabo a berekisa mešupetso, a re: “Ke mo go na le monna ye mongwana wa gore ke mo a na le tšhomo ya didhriva, fote a yi yagelele ka trata, ke mokane a maka poleke ya go makela wayini ga yona fote a yaga le poleke ya go yema ga yona mo motho a pasopa tšhomo; a šiya tšhomo yela le ba go lema gore ba šale ba yi pasopa, yene a vakaša.
2 Mo go segela nako ya go buna, a roma sebereki sage gore se ye se tseye diyengwa tse dingwana ga bala ba go lema.
3 Byalo, bala ba go lema ba tshwara sebereki sela ba se teya, sa boyela nthago se lekalekisa matsogo.
4 A romela se sengwana, le sona ba se teya hlogo yo, ba se maka tsa go tšebisa.
5 A romela se sengwana, sona ba se bolaya, ke mokane a romela tse dingwana dibereki, mone ga tsona ba teya tse dingwana fote tse dingwana ba di bolaya.
6 Ke mo go sa na le morwayi wage fote, wa gore ke mo a mo nyaka ka matla. A fetsa a romele yene, a re, ‘Morwayi waka yene ba nyoko mo hlompa.’
7 Mo banna bala ba mmona, ba kwana ba re, ‘Yewa ke yene mojalefa. Tla re mmolayeneng ke mokane lefa lowa go ko ba la rune!’
8 Ba mo tseya ba mmolaya ke mokane ba mo lahlela ka tawong ga tšhomo yone.
9 Mo mong wa tšhomo yone a segela, o nyoko ba maka ying mara bo ba go lema? O nyoko fetsa ka bona, a tseya tšhomo yela a yi neya ba bangwana.
10 Anthe a le ya bala lengwalo lowa la gore, ‘Letlapa lo bommeselane ba le ganneng go feleletsiye go ba khona ya fandhiši.*
11 Le gore letlapa lone le tšwa ga Jehova fote le ya re jabodisa’?”
12 Mo bo ba go mo phigisa ba kwa mošupetso wowa, ba f’lo kwa gore o bolabola ka bona. Ne ba nyaka go mo tshwara, mara ke mo ba tšhaba mogoba, ba fo tloga ba mo šiya.
13 Byalo ba roma Mafaraseyi ya mangwana le ba mokgahlo wa Heroda ga Jeso, gore ba make gore a bolabole dilo tsa gore ba ka mo tanya ka tsona.
14 Ke mokane ba segela ba re: “Thitšere, re ya di tšiba tsa gore o bolabola nnete, o tšhutisa nnete ka Modimo, a wo llele gore batho ba go yamogele, fote a wo yi ka gore motho ke wa mošaga mang. Nje molawo wa dumela* gore re patele tšheleta ya mothelo ga Kesara?
15 Re patele, kela re sa patele?” Ka taba la gore ke mo a di tšiba gore ba mo ramele, a re ga bona: “Ke ntaba le nreya? Leyaneng dhenariyase ke yi bone.”
16 A re ga bona: “Sethombhe sowa le lebitso lowa ke tsa mang?” Ba re: “Ke tsa Kesara.”
17 Byalo Jeso a re: “Patelaneng Kesara dilo tsa Kesara, le Modimo le mo pateleneng tsa Modimo.” Mo ba kwa tsotsone ba yye ba makala.
18 Byalo, Masadutseyi ya ne ma sa dumele gore batho ba nyoko tsusiwa ma yye ma tla gage ma mmutsisa ma re:
19 “Thitšere, Moše o ngwadiye gore mo monna a ka timela a se na bana, di nyaka bhuti wage a tseye mosadi yene fote a mmelegele bana.
20 Byalo, ke mo go na le bobhuti kašupa ya bona. Wa mathomo o yye a tseya mosadi, a fetsa a timele a se na bana.
21 Wa bobedi a tseya mosadi yela mara le yene a kgwa a se na bana, le ga wa boraro gwa fo makega ka mokgonone.
22 Ka mokana ga bona kašupa ya bona ba kgwa ba se na bana, mosadi yela le yene a feleletsa a kgwile.
23 Byalo mo batho ba tsusiwa, mosadi yewa go nyoko ba wa mang ga bala kašupa ya bona, ka taba la gore ke mo go le mosadi wa bona ka mokana ga bona?”
24 Jeso mo a ba fetola a re: “Le yi lahliye, ka gore a le kwisisi Lentsu la Modimo le gore matšhika yage ma bereka byang.
25 Ka taba la gore mo batho ba tsusiwa, ba ka sa sa šadha kela go šadhisiwa, ba nyoko tshwana le mangeloyi ya ku legedimong.
26 Anthe a le ya bala ka tso Modimo a di hlayyeng ka go tsusiwa ga batho ba go kgwa, a le ya bala ga puku ya Moše ka taba yela ya sehlare sa go dura mollo, hala Modimo a re gage: ‘Ke nna Modimo wa Abhrahama, Modimo wa Isaka le Modimo wa Jakobo’?
27 Le yi lahliye ka taba la gore Modimo a yi Modimo wa batho ba gore ba kgwile mara ke Modimo wa batho ba go phela.”
28 Ye mongwana mo ga bona wa gore ke mo go le mabhalane, o yye a ba kraya ba phigisana fote ne a di tšiba gore Jeso o ba fetodiye gabutši, o yye a mmutsisa a re: “Thitšere, Molawo wo mogolo* ga Molawo wa Moše ke wofeng?”
29 Ke mokane Jeso a re gage: “Sa mathomo, ‘Theetsela wene Israyele, Jehova Modimo wa rune, ke yene Jehova a ntoši,
30 byalo ga Jehova Modimo wago o mo nyake ka pelo yago ka mokana ga yona, bowene* byago ka mokana ga byona, ka monagano wago ka mokana ga wona le ka matšhika yago ka mokana ga wona.’
31 Molawo wa bobedi ke wowa: ‘O nyake moyagelane wago ka mokgo o tinyakang ka gona.’ A go na melawo ya go tshwana le yowa.”
32 Mabhalane yela a re gage: “Thitšere, tso o di bolabodiyeng ke nnete, ‘Ke yene a ntoši, fote a go na wa go tshwana naye’;
33 byalo mo o mo nyaka ka pelo ka moka, ka monagano ka moka le ka matšhika ka moka, fote o nyaka le moyagelane wago go fo tshwana le ka mokgo o tinyakang ka gona, tsotsone di phala go tšhuba dihlabelo.”
34 Mo Jeso a kwa gore morenewa o hlaya tsa go ya ka tsela, a re gage: “Mara wa tšiba wene a wo kgole le Mmušo wa Modimo.” Ke mokane gwa hloka le ka wwoši wa go ba le lešiši la go mmutsisa fote.
35 Mo Jeso a kene a tšhutisa hone tempeleng o yitseri: “Anthe ke ntaba bomabhalane ba re Kreste ke morwayi wa Dafita?
36 Dafita o yye a tšhofa ke moya wa go hlawolega, a hlaya mantsu ya gore: ‘Jehova o butsiye Morena waka a re: “Dula ga letsogo laka la go ja go segela ke beya manaba yago ka fase ga mawoto yago.”’
37 Go tla byang go ba morwayi wa Dafita mo nkare yene mong o mmitsa Morena?”
Mogoba wo yye wa jabolela tso ne a di bolabola.
38 Mo a kene a ya mahlong a ba tšhutisa a re ga bona: “Le pasopeneng bomabhalane ba go kwana le go sepela-sepela ba yapere diphuraphura, ba nyaka go tamisiwa ho ba le ku memmakete,
39 ba gore mo ba le disinagogeng ba nyaka go dula ka ku mahlong* fote ba kwana le ditulo tsa mayemo mo ba le menyanyeng.
40 Ba tseyela basadi ba go kgwela ke banna dilo tso ba nang natso,* fote mo ba rapela ba lefisa ka matla gore ba bone ke batho.* Bobone ba nyoko yahludiwa go baba.”
41 Jeso a dula fase ga gore ke mo a kgona go bona mabhokisi ya go neyela ga wona, ke mokane a lebelela mogoba mo wo kene wo lahlela tšheleta ka mone teng, le bo ba go ghanya ke mo ba lahlela ditšheleta tsa tshipi tsa go tlala.
42 Gwa nyarela mosadi ye mongwana wa go tihlupegela wa gore o kgwele ke monna, a segela a tšhela ditšheleta ka dipedi tsa tshipi tsa go sa re selo.
43 Ke mokane a bitsa malata yage a re ga wona: “Ke le botsa nnete, mosadi yewa wa go tihlupegela wa gore fote o kgwele ke monna o neyele go phala batho ka mokana ga bona ba gore ba lahlele tšheleta hala mabhokising.
44 Ka taba la gore bona ba f’lo ntsha ga yo ba nang nayo ya go tlala, ba tšhela ka hala mabhokising, mara yene o lahlele yo ne a le nayo* ka mokana ga yona, ya gore ke mo a tshwanele a reke sela le sela gore a thogo phela.”
Ditwaba
^ Kela “letlapa lo ba le tseyelang gedimo ka matla.”
^ Kela “di gabutši.”
^ Kela “wa mathomo.”
^ Bala ga Dihlatollo Tsa Mantsu.
^ Kela “ga masithisithi.”
^ Kela “dintlo tsa bona.”
^ Kela “ya go timakisa.”
^ Kela “ya bošuwana.”
