“Mo nkare wa di tshepa gore Bhayibele ke lentsu la Modimo la gore o le neyye batho, di ra gore Modimo o bolabola le rune. . . . Mo nkare o tlalele ka mo ga tso tsa sedumedi, di ka makega gore o tlwayelanne le Bhayibele.” Mantsu yawa ma ngwadiye ke ye mongwana wa go tšhutega ye ba reng Alan S. Duthie ga puku yage ya Bible Translations and How to Choose Between Them.

Bo ba gore ba kwana le Lentsu la Modimo le bona ba dumelelana le mantsu yawa. Baa di tshepa gore “Mangwalo ka mokana ga wona ma butšwelele ke Modimo fote ma gelepa ka go tšhutisa, ka go kgala, ka go wolola le ka go yetetsa ka go loka.” (2 Thimothi 3:16) Bhayibele a go fo ba puku ya botala. Ke Lentsu la Modimo la gore “le ya phela fote le na le matšhika,” la gore le yimulla batho ga tso di ba phiriketsang ka moka matšatši. (Maheberu 4:12) Gore batho ba thogo kwisisa tso di leng ga puku yowa ya go hlawolega ba boye ba di make, di nyaka yi ngwadiwe ka mmolabolo wo batho ba wo berekisang ka moka matšatši gore le batho bo ba tseyediwang fase ba kgone go yi bala.

Bhayibele ya go tloga ga Matewu go segela ga Kutullo ya gore yi hlatolliwwe ka Sepulana yi ya ga bo ba gore ba kwana le Lentsu la Modimo. Dihlatse tsa Jehova di hlayye gore hlatollo yowa yi nyoko ntshiwa ka di 7 March 2021. Hlatollo yowa ya kwagala fote yi napa yi korola, sosone se maka gore molayetsa wa Modimo wo nape wo kwagala ka Sepulana. O ka fo ba o tiputsisa gore yi hlatolliye ke mang mara?

Le mo nkare Bhayibele ya go tloga ga Matewu go segela ga Kutullo ne yi kene yi le gona go tlugisela ka 1950, mara ke la mathomo yi hlatolliwa ka Sepulana. Watch Tower Bible and Tract Society yi yi ntshiye ka Sekgowa ka mongwaga wonone—ke Mokgahlo wa go tšibega ka go ntsha Dibhayibele lefaseng ka mokana ga lona go tlugisela ku botala. Sewokamelo sa September 15 1950 se hlayye gore: “Batho bo ba welang ga komiti ya go hlatolla a ba nyake . . . go tšibiwa, ka matlamatla a ba nyake gore mabitso ya bona ma ngwadiwe ba sa phela le mo ba šele ba kgwile. Mo ba šinya ba maka gore go be le hlatollo yowa ke mo ba nyaka go maka gore go thanakiwe lebitso la Modimo wa mannete le wa go phela.”

Ka 1961 go ntshiwwe Bhayibele ya go felegelela ya New World Translation of the Holy Scriptures. Le mo nkare mabitso ya bo ba go yi hlatolla a re ma tšibi le lekgono lowa, mara re ya di tšiba gore ke mo ba nyaka go segelela ying le gore ke mo ba tineyele go segela kaye. Mantsu ya mathomo ga Bhayibele ya 2013 ma yitseri: “Ka taba la gore re ya di tšiba gore molayetsa wa Bhayibele re tshwanele re wo tseyele gedimo, re yye ra yi pombhola fote, ke mokane ra potolla hala le hala re kene re šupetsa gore tso di leng ka ho teng ga Bhayibele re di hlompa ka matla. Re kwa di re tšhofa gore re make ka mokgo re ka kgonang gore re korole mo re hlatolla molayetsa wa yona. . . . So re nyakang go se segelela ke gore tso re di hlatollang di tshepege mara di kene di kwagala fote go be lula go di bala.”

Gana byalo go šele go na le Dibhayibele tsa New World Translation tsa go teya ka ku ga 240 000 000 tsa gore di felele kela dikopa tsa tsona ka mebolabolo ya go teya ka ku ga 190. Ba go tlala ba gore baa yi bala ba krayye ying?

Jeso o tšhutisiye malata yage gore ma rapele ka mokgo: “Papa wa rune wa magedimong, lebitso lago le hlawolege.” (Matewu 6:9) Bhayibele yi bitsa Modimo ka lebitso lage la gore ke Jehova, le nyarela gana hala ga 7 000. (Eksoda 3:15; Pisalema 83:18) Mo mapostola ya Jeso ma šele ma kgwile, phutego ya Sekreste yi thomisiye go latelela mokgwa wa go befa wa Majuda wa go sa nyake go berekisa lebitso la Modimo. (Mebereko 20:29, 30; 1 Thimothi 4:1) Bo ba go kopolla Dibhayibele tsa Segerika ba yye ba ntsha lebitso la Jehova ke mokane ba tšhela mantsu ya gore ma rela “Modimo” le “Morena” sekaleng sa lona.

Komiti ya go Hlatolla Bhayibele ya Lefase la Nyuwane yi busetsiye lebitso la Jehova la gore le nyarela ga 237 ga Mangwalo ya Sekreste ya Segerika. a Bo ba go hlatolla a baa fo kwa ba nabela go busetsa lebitso lowa mara ba thomisiye ka go nyakolla mo ba soko le busetsa. Mo re beyisa, Luka 4:18 yi berekisiye mantsu ya ma leng ga Jesaya 61:1. Ga Bhayibele ya mathomo ya Seheberu, lebitso la Jehova ke mo le nyarela ga temanyana yowa ya Jesaya. Nka taba lo New World Translation ga Luka 4:18 yi yi beyyeng ka mokgo: “Moya wa Jehova wo ho gaka, ka taba la gore o nhlawodiye gore ke sabalatse ditaba tsa go bafala ga bo ba go tihlupegela.”

Ka mokgo yi beyiwweng ka gona yi maka gore bo ba balang ba kgone go bona gore Jehova Modimo o fapana ka ying le Morwayi wage ka wwoši ye ba reng ke Jeso Kreste. Mo re beyisa, dihlatollo tsa go tlala ga Matewu 22:44 di re: “Morena o butsiye Morena waka a re.” (Bhayibele ya King James) Gabutšibutši mang o bolabola le mang? Gabutšibutši temanyana yowa yi berekisiye mantsu ya mangwana ya ma nyarelang ga Pisalema 110:1, ya gore ga Bhayibele ya mathomo ya Seheberu ne go na le lebitso lowa la Modimo la go hlawolega. New World Translation ga Matewu 22:44 yi re: “Jehova o butsiye Morena waka a re.” Jehova Modimo le Morwayi wage a ba lekane. (Mareka 13:32; Johane 8:17, 18; 14:28) Di nyaka re di kwisisa gore Modimo le Jeso a ba tshwane gore re thogo phonisiwa. Mebereko 2:21 yi re: “Ye mongwana le ye mongwana ye a bitsang lebitso la Jehova o nyoko phonisiwa.”

Bo ba go hlatolla ba makiye so ba ka se kgonang gore ba ngwale tso ne di hlaya ke Bhayibele ya mathomo ya Segerika ka mokgo ne di le ka gona ba berekisa mmolabolo wa gana byalo wa go sa thathafe. Mo re beyisa, New World Translation yi berekisiye mantsu ya gore ma thina ka matla le ya Segerika. Ga mebolabolo ya go tlala ya matšatši yawa, mantsu ya gona ma šupetsa gore selo se šele se makegiye, se sa makega kela se sa nyoko makega ku mahlong. Mantsu ya ba ma berekisang ka Segerika ma šupetsa le gore selo so se makiwang se makiwa byang—gore ke sa senakonyana, se šele se makegiye kela se fo ya mahlong se makega. Tseya ka mantsu ya Jeso ya ma leng ga Matewu 6:33. Lentsu la Segerika la gore “nyaka” le šupetsa selo sa gore se fo dula se makega. Sosone re napa re se kwisisa gabutši ga mantsu ya gore ma hlayye ke Jeso mo a re: “Byalo le sa lisetseneng go thomisa ka go nyaka tso tsa Mmušo wa Modimo le go loka gage, ke mokane Yene o nyoko le yeketsela ka tso tse dingwana ka moka.” Le Matewu 7:7 yi re: “Ariyeneng mahlong le kgopela, ba ko le neyeng, ariyeneng mahlong le nyaka, le ko kraya; ariyeneng mahlong le kokota, ba nyoko le bulela.”—Maroma 1:32; 6:2; Magalata 5:15.

Mo go šinya go ntshiwa Bhayibele yowa ya Sepulana ya Mangwalo ya Sekreste ya Segerika, a di re gore go felela gana howa. Go makiwwe dipolane tsa gore go hlatolliwe Bhayibele ka mokana ga yona ka nako ya gona. Ayitsano bo ba balang ba ka di tshepa tsa gore hlatollo yowa ya Sepulana yi nyoko kwagala ya boya ya korola go tshwana le ya Sekgowa?

Eya. Ka taba la gore mmereko wo wa go hlatolla wo wokamela ke Mogoba wa go Lawola wa Dihlatse tsa Jehova. Go yye gwa makiwa sepheto sa gore mmereko wo wa go hlatolla Bhayibele wo sa make ke motho ka wwoši. (Diyema 11:14) Taba yo ya gore go sa hlatolle motho ka wwoši yi makiwa lefaseng ka mokana ga lona. Ku Ntlokgolo ya Dihlatse tsa Jehova ba makiye gore go be le Mogoba wa bo ba go Bereka ka tsa go Hlatolla gore wo thogo gelepa bo ba go maka mmereko wa go hlatolla ka tso ba di gayelang, wo fetole diputsiso tsa bona fote wo make le gore dihlatollo tsa New World Translation ka mebolabolo ya go sa tshwane di sipidisane. Go tokegela gana hone, go na le Watchtower Translation System ya gore ba yi tšhediye mo dikhomphyuteng gore yi gelepe bo ba go hlatolla Bhayibele. Tse dingwana tsa dilo tso Watchtower Translation System yi kgonang go di maka ke gore yi šupetsa ka mokgo mantsu ya Seheberu le Segerika ba ma ngwadiyeng ka gona ka Sekgowa, sosone se gelepa bo ba go hlatolla gore ba berekise mantsu ya gabutši. Le sa di tseyele fase: Mmereko wo wa go hlatolla wo nyaka gore motho a karakare. Mara go berekisa khomphyuta go makiye gore tso bo ba go hlatolla Bhayibele ba nyoko di segelelang di be lula, gore tso ba di hlatollang ga New World Translation di korole fote di kwagale go tshwana le ga Sekgowa.

Re kgopela gore o nyakolle Bhayibele ya go tloga ga Matewu go segela ga Kutullo. O ka yi bala inthaneteng, ga JW Layibhrari kela o ka yi kgopela ga phutego ya Dihlatse tsa Jehova ya gore yi thina le mo o dulang gona. Fote go na le dilo tsa go tlala tsa gore di nyoko go jabodisa: ya kwagala fote ya balega, yi na le tsa ka teng tsa gore di go lekisa gore puku ye nngwana le nngwana yi tshwere ying fote di maka gore o yakgoswe o kraya ditemanyana tso o di tlwayeleng, le tsa go jabodisa tsa gore re di kraya ka mo mafelelong ga yona. Sa go napa se di phala ka moka ke gore Bhayibele yowa yi napa yi korola mo yi hlaya dilo tsa go tšwa ga Modimo yi kene yi berekisa mmolabolo wo re wo berekisang ka moka matšatši.