ISIFUNDO 32
UmBuso KaZimu Uyabusa!
UmBuso kaZimu wathoma ukubusa ezulwini ngo-1914. Kulapho imihla yokuphela kokubusa komuntu eyathoma khona. Sazi njani? Cabangisisa ngeemphorofido zeBhayibheli nangendlela abantu ebebaziphatha ngayo kusukela ngo-1914.
1. IBhayibheli labikezelani?
Incwadi yeBhayibheli kaDanyela yatjengisa bona umBuso kaZimu uzokuthoma ukubusa ekupheleni ‘kweenkhathi ezilikhomba.’ (Danyela 4:16, 17) Eminyakeni eminengi eyalandelako, uJesu waqalisela kiso isikhatheso wathi, ‘ziinkhathi ezibekiweko zeentjhaba’ bewafundisa ukuthi azikapheli. (Lukasi 21:24) Njengombana sizokubona, iinkhathi ezilikhomba ziphele ngomnyaka ka-1914.
2. Khuyini eyenzeka ephasini begodu abantu bebasolo baziphatha njani kusukela ngo-1914?
Abafundi bakaJesu bambuza bathi, “Sizokuba yini isibonakaliso sokuba khona kwakho nesokuphela kwephasi?” (Matewu 24:3) Nakaphendulako, uJesu wabikezela izinto ezinengi ebezizokwenzeka nakathoma ukubusa njengeKosi yomBuso kaZimu. Lokhu bekuhlanganisa ipi, ukutlhayela kokudla nokusikinyeka kwephasi. (Funda uMatewu 24:7.) IBhayibheli labikezela nokuthi indlela abantu abaziphatha ngayo “emihleni yokuphela” izokwenza ipilo ibe “budisi.” (2 Thimothi 3:1-5) Izinto ezenzekako nendlela abantu abaziphatha ngayo kwathoma ukubonakala khulu kusukela ngo-1914.
3. Kubayini iphasi lathoma ukuba limbi khulu kusukela umBuso kaZimu wathoma ukubusa?
Ngemva kobana uJesu abe yiKosi yomBuso kaZimu, walwa noSathana namadimoni ezulwini. USathana wahlulwa epini leyo. IBhayibheli lithi ‘waphoselwa phasi ephasini, neengilozi zakhe zaphoselwa phasi naye.’ (IsAmbulo 12:9, 10,12) USathana usilingekile ngombana uyazi ukuthi uzokubhujiswa. Yeke ubanga ubuhlungu nokutlhaga ephasini loke. Kungebangelo ubujamo bephasi bubumbi kangaka. UmBuso kaZimu uzokulungisa yoke imiraro le.
FUNDA NGOKUNGENELELEKO
Hlolisisa bona sazi njani ukuthi umBuso wathoma ukubusa ngo-1914 nokuthi lokho kutjho ukuthini kithi.
4. Ukulandelana kwesikhathi seBhayibheli okuveza u-1914
UZimu wabangela iKosi yeBhabhiloni lekadeni uNebukadinetsari bona ibhudange ngesiphorofido. Ibhudangwelo nehlathululo eyanikelwa nguDanyela itjengisa bona ibhudangwelo belimalungana nokubusa kwakaNebukadinetsari nomBuso kaZimu.—Funda uDanyela 4:17. a
Funda uDanyela 4:20-26, bese usebenzisa itjhadi ekuphenduleni imibuzo elandelako:
-
(A) UNebukadinetsari wabonani ebhudangweni lakhe?—Funda ivesi 20 no-21.
-
(B) Kuzokwenzekani ngomuthi?—Funda ivesi 23.
-
(C) Kuzokwenzekani ekupheleni ‘kweenkhathi ezilikhomba’?—Funda ivesi 26.
Umuthi uhlangana njani nomBuso kaZimu?
ISIPHOROFIDO (Danyela 4:20-36)
Ukubusa
(A) Umuthi omkhulu
Ukubusa kwaphazamiseka
(B) “Quntani umuthi” bekudlule “iinkhathi ezilikhomba”
Ukubusa kuyavuselelwa
(C) “Umbuswakho uzokuba ngowakho godu”
Ukuzaliseka kokuthoma kwesiphorofidwesi . . .
-
(D) Umuthi lo bewufanekisela bani?—Funda ivesi 22.
-
(E) Ukubusa kwakhe kwaphazamiseka njani?—Funda uDanyela 4:29-33.
-
(F) Kwenzekani kuNebukadinetsari ekupheleni ‘kweenkhathi ezilikhomba’?—Funda uDanyela 4:34-36.
UKUZALISEKA KOKUTHOMA
Ukubusa
(D) UNebukadinetsari iKosi yeBhabhiloni
Ukubusa kwaphazamiseka
(E) Ngemva kwaka-606 B.C.E uNebukadinetsari wahlanganelwa yihloko wabhalelwa kubusa iminyaka elikhomba
Ukubusa kuyavuselelwa
(F) UNebukadinetsari waqaquluka, wathoma ukubusa godu
Ukuzaliseka kwesibili kwesiphorofidwesi . . .
-
(G) Umuthi bewufanekisela bani?—Funda yoku-1 yeenKronike 29:23.
-
(H) Ukubusa kwabo kwaphazamiseka njani? Sazi njani bona ukubusokhu bekusaphazamisekile uJesu nakasephasina?—Funda uLukasi 21:24.
-
(I) UmBuso lo wavuselelwa nini begodu kuphi?
UKUZALISEKA KWESIBILI
Ukubusa
(G) Amakhosi wakwa-Israyeli ajamiselele ukubusa kwakaZimu
Ukubusa kwaphazamiseka
(H) IJerusalema latjhatjalaliswa, okuphazamisa irhelo lokubusa kwamakhosi wakwa-Israyeli iminyaka ezii-2 520
Ukubusa kuyavuselelwa
(I) UJesu wathoma ukubusa ezulwini njengeKosi yomBuso kaZimu
Iinkhathi ezilikhomba zide kangangani?
Ezinye iingcenye zeBhayibheli zisisiza bona sizwisise ezinye. Ngokwesibonelo, incwadi yeBhayibheli isAmbulo ithi iinkhathi ezintathu nesiquntu zilingana namalanga ayi-1 260. (IsAmbulo 12:6, 14) Iinkhathi ezilikhomba, ziyinomboro leyo kabili namkha amalanga azii-2 520. Ngezinye iinkhathi iBhayibheli lisebenzisa ilanga ukufanekisela umnyaka. (Hezekiyeli 4:6) Kuyafana nangeenkhathi ezilikhomba okukhulunywa ngazo encwadini kaDanyela, zijamele iminyaka ezii-2 520.
5. Iphasi latjhuguluka kusukela ngo-1914
UJesu wabikezela bona iphasi lizokuba njani ngemva kobana abe yiKosi. Funda uLukasi 21:9-11, bese nicoca ngombuzo lo:
-
Kilokho esifunde ngakho, ngikuphi okubonileko namkha ozwe ngakho?
Umpostoli uPowula wahlathulula bona abantu bazokuba njani emihleni yokuphela yokubusa komuntu. Funda yesi-2 kaThimothi 3:1-5, bese nicoca ngombuzo lo:
-
Ngimiphi imikghwa oyibonileko ebantwini namhlanjesi kileyo esifunde ngayo?
6. Ukubusa komBuso kaZimu kufuze kusikhuthaze
Funda uMatewu 24:3, 14, bese nicoca ngemibuzo le:
-
Ngimuphi umsebenzi oqakathekileko otjengisa bona umBuso kaZimu uyabusa nje?
-
Ungahlanganyela njani emsebenzini lo?
UmBuso kaZimu uyabusa nje begodu ilanga lokuthi ubuse ngokupheleleko ephasini litjhidele. Funda amaHebheru 10:24, 25, bese nicoca ngombuzo lo:
-
Khuyini soke ekufuze siyenze njengombana ‘sibona ilanga litjhidela’?
Nawazi into engasindisa amaphilo wabantu, khuyini ongayenza?
OMUNYE ANGABUZA: “Kubayini aboFakazi bakaJehova bakhuluma ngo-1914 kangaka?”
-
Ungathini?
ISIRHUNYEZO
Iimphorofido zeBhayibheli, irhelo lokulandelana kwazo nezinto ezenzeka ephasini zitjengisa bona umBuso kaZimu uyabusa. Sitjengisa bona siyakukholelwa lokhu ngokutjhumayela ngakho nokuya emihlanganweni yebandla.
Buyekeza
-
Khuyini eyenzekako ekupheleni kweenkhathi ezilikhomba okwakhulunywa ngazo encwadini yeBhayibheli kaDanyela?
-
Khuyini ekuqinisekisako bona umBuso kaZimu uthome ukubusa ngo-1914?
-
Ungatjengisa njani bona uyakholelwa ukuthi umBuso uyabusa nje?
HLOLA OKUNGENZASI
Funda indlela isiphorofido esikuMatewu 24:14 esathinta ngayo ipilo yenye indoda.
“Bengithanda I-Baseball Ukudlula Nanyana Yini!” (IsiThala No. 3 2017)
Sazi njani bona isiphorofido esitlolwe kuDanyela isahluko 4 sikhuluma ngomBuso kaZimu?
“UmBuso KaZimu Wathoma Nini Ukubusa? (Ingcenye 1)” (IsiThala, Oktoba 1, 2014)
Yini etjengisa bona iinkhathi ezilikhomba okukhulunywa ngazo kuDanyela isahluko 4 zaphela ngo-1914?
“UmBuso KaZimu Wathoma Nini Ukubusa? (Ingcenye 2)” (IsiThala, Novemba 1, 2014)
a Qala iinhloko ezimbili zokugcina engcenyeni ethi “Hlola okungenzasi” esifundwenesi.
Okhunye Ongakuthabela
OKUBUZWAKO
Siyini Isifundo SeBhayibheli Esinikelwa BoFakazi BakaJehova?
Ehlelweneli lesifundo sasimahla esinikelwa boFakazi bakaJehova, ungasebenzisa nanyana ngiyiphi itjhugululo yeBhayibheli. Zizwe utjhaphulukile ukumema woke umndenakho nabangani bakho bona bahlanganyele nawe.
