IBhayibheli eliCwengileko, elitloliweko, yindlela uZimu akhuluma ngayo nathi soke. Kufuze silifunde bona sazi uMtloli walo. (Jwanisi 17:3; 2 Thimothi 3:16) Kilo, uJehova uZimu uveza umnqophwakhe ngabantu nangekhaya labo okuliphasi.—Genesisi 3:15; IsAmbulo 21:3, 4.

Ayikho enye incwadi ethinta ukuphila kwabantu njengalo. IBhayibheli lisikhuthaza bona sitjengise ubuntu bakaJehova, ithando, umusa nesirhawu. Linikela ithemba, lisize nabantu bakghodlhelelele ukutlhaga okukhulu. Liragela phambili liveza izinto ezimbi zephaseli ezingavumelani nentando kaZimu epheleleko.—IRhubo 119:105; Hebheru 4:12; 1 Jwanisi 2:15-17.

Ekuthomeni iBhayibheli belitlolwe ngesiHebheru, isi-Aramu nangesiGirigi, kodwana nje selitjhugululelwe emalimini angaphezu kwee-3 000 liphelele namkha liyingcenye. Emlandwini woke, iBhayibheli liyincwadi etjhugululwe beyafumaneka khulu ukudlula ezinye iincwadi. Akusirari lokho. Isiphorofido seBhayibheli sithi: “Nje-ke iindaba ezimnandezi zomBuso [umlayezo oyihloko oseBhayibhelini] zizokutjhunyayelwa kilo loke iphasi bona kube bufakazi kizo zoke iintjhaba, ngemva kwalokho isiphelo sizokufika.”—Matewu 24:14.

Silemuka ukuqakatheka komlayezo weBhayibheli, umnqophwethu akusikutjhugulula kwaphela iBhayibheli elithembekileko emitlolweni yokuthoma kodwana kuyenza nokuthi izwisiseke, kube bulula nokuyifunda. Iinhloko eziseenThasiselweni ezithi, “Iinqophiso Zokutjhugulula IBhayibheli,” “Okufumaneka EBhayibhelineli” nesithi “Indlela IBhayibheli Elifike Ngayo Kithi” zikhuluma ngokuthuthukiswa kwelimi okwenziweko eBhayibhelini ebuyekeziweko le.

Labo abathanda begodu balotjhe uJehova uZimu bafisa ukuba netjhugululo yeliZwi lakaZimu enembileko nezwisisekako. (1 Thimothi 2:4) Ngebangelo senze itjhugululo le yafumaneka ngesiNdebele ngokuvumelana nehloswethu yokuyitjhugululela emalimini amanengi ngendlela okungakghonakala ngayo. Sithemba begodu sithandaza bona wena, mfundi othandekako, uzokufumana imiTlolo eCwengileko le izuzisa njengombana uzabe ‘ufuna uZimu . . . bewumfumane.’—IzEnzo 17:27.