Eksodusi 34:1-35
34 Nje-ke uJehova wathi kuMosi: “Baza amatje amabili asipara anjengewokuthoma+ begodu ngizokutlola ematjeni lawo amezwi ebekatlolwe ematjeni wokuthoma+ owawaphulako.+
2 Zilungiselele ilanga lakusasa ekuseni, njengombana uzokukhuphukela eNtabeni iSinayi begodu ujame phambi kwami lapho esiqongolweni sentaba.+
3 Akunamuntu okufuze akhuphuke nawe begodu akunamuntu okufuze abonakale entabeni leyo, ngitjho neenkomo namkha izimvu akukafuzi zidle phambi kwentaba leyo.”+
4 Nje-ke uMosi wenza amatje amabili asipara afana newokuthoma, wavuka ekuseni wakhuphukela eNtabeni iSinayi aphethe amatje amabili asipara njengombana uJehova amyalile.
5 UJehova wehla+ ngelifu wajama naye lapho begodu uJehova wamemezela igama lakhe.+
6 UJehova wadlula phambi kwakhe amemezela athi: “NguJehova, nguJehova uZimu onesirhawu+ nomusa,+ ongasilingeki msinya+ begodu onethando elikhulu,*+ oneqiniso,+
7 othanda ngokuthembeka iinkulungwana zeenzukulwana,+ olibalela imitjhapho nezono+ kodwana akazumlisa angamjezisi onomlandu,+ uletha isijeziso semitjhapho yabobaba phezu kwamadodana naphezu kweenzukulwana, naphezu kwesizukulwana sesithathu nesesine.”+
8 Msinyana uMosi waguqa wahloma ihloko phasi.
9 UMosi wathi: “Nje-ke nangabe uyangamukela Jehova ngiyakubawa Jehova bona ukhambe nathi,+ ngitjho nanyana sinekani nje.+ Ulibalele umtjhaphwethu nesono sethu,+ usamukele sibe babantu bakho.”
10 UZimu wathi: “Ngenza isivumelwano phambi kwabantu bakho boke, ngizokwenza izinto ezibabazekako, ezingakhenge khezenzeke ephasini loke namkha hlangana neentjhaba zoke+ begodu boke abantu enihlala nabo bazokubona umsebenzi kaJehova ngombana into engizonenzela yona iyababazeka.+
11 “Lalelisisani enginiyala ngakho namhlanjesi.+ Ngiqotha phambi kwenu ama-Amori, amaKanana, amaRhiti, amaPerizi, amaRhivi namaJebusi.+
12 Tjhejani bona ningenzi isivumelwano nabantu benarheni eniya kiyo+ ngombana lokho kungaba sithiyo kini.+
13 Kodwana nizokugiriza ama-aldarabo, niphahlaze iinsika zabo ezicwengileko benigawule neengodo zabo ezicwengileko.*+
14 Akukafuzi ukhothamele omunye uzimu+ ngombana uJehova ufuna kulotjhwe yena yedwa. UnguZimu ofuna kulotjhwe yena yedwa.+
15 Tjhejani bona ningenzi isivumelwano nabahlali benarheni ngombana lokha nabangwadla nabozimu babo begodu babenzele imihlatjelo,+ omunye anganimema bese nidle inyama yomhlatjelwabo.+
16 Ngokuqinisekileko nizokutjhadisa amadodanenu namadodakazabo+ begodu amadodakazabo azokungwadla nabozimu bawo abangele amadodanenu bona nawo angwadle nabozimu bawo.+
17 “Ningazenzeli abozimu ngesimbi.+
18 “Kufuze nigidinge umNyanya woBurotho obunganaSibiliso.+ Nizokudla uburotho obunganasibiliso njengombana nginiyalile, nizokwenza lokhu amalanga alikhomba ngesikhathi esibekiweko ngenyanga ka-Abibi*+ ngombana yinyanga enaphuma ngayo eGibhide.
19 “Woke amazibulo aduna ngewami+ nayo yoke ifuywenu, kungaba lizibulo lekunzi eliduna namkha lemvu.+
20 Izibulo lakadumbana, kufuze ulihlenge ngemvu kodwana nawungalihlengiko kufuze uliphule intamo, kufuze uhlenge woke amazibulo wamadodanakho.+ Akunamuntu okufuze avele phambi kwami angakaphathi litho.
21 “Kufuze nisebenze amalanga asithandathu kodwana elangeni lekhomba kufuze niphumule.*+ Ngitjho nanyana kungaba sikhathi sokulima nesokuvuna kufuze niphumule.
22 “Kufuze nigidinge umNyanya weemVeke ngeenthelo zokuthoma zesivuno sekoroyi nomNyanya wokuButhelela* ekupheleni komnyaka.+
23 “Kathathu ngomnyaka, woke amadoda kufuze avele phambi kweKosi yeqiniso, uJehova uZimu ka-Israyeli.+
24 Ngizokuqotha iintjhaba phambi kwenu+ begodu ngizokwenza indawenu ibe yikulu, akunamuntu ozokukhanukela inarhenu lokha nanisakhuphukile niyokubona ubuso bakaJehova uZimenu kathathu ngomnyaka.
25 “Naninikela iingazi zomhlatjelwami, akukafuzi zikhambisane nananyana yini enesibiliso.+ Umhlatjelo womnyanya wePhasika akukafuzi uhlale ubusuku boke bekube sekuseni.+
26 “Iinthelo zenu zokuthoma zehlabathi ezikhethekileko kufuze nizilethe endlini kaJehova uZimenu.+
“Akukafuzi nibilise inyama yembuzana ngebisi lakanina.”+
27 UJehova waraga wathi kuMosi: “Kufuze utlole amezwi la phasi+ ngombana ngenza isivumelwano nawe nama-Israyeli ngokuvumelana namezwi la.”+
28 Wahlala noJehova lapho amalanga ama-40 nobusuku obuma-40. Akhenge adle uburotho namkha asele amanzi.+ Watlola amezwi wesivumelwano la, imiYalo eliTjhumi ematjeni asipara.+
29 Nje-ke uMosi wehla eNtabeni iSinayi aphethe amatje amabili asipara wobuFakazi.+ Njengombana ehla entabeni, bekangaboni ukuthi ubuso bakhe bukhupha imisebe ngombana bekakhuluma noZimu.
30 U-Aroni nama-Israyeli woke nababona uMosi, babona ubuso bakhe bukhupha imisebe basaba nokutjhidela kuye.+
31 UMosi wababiza, nje-ke u-Aroni nawo woke amakhosana wehlangano eza kuye, wakhuluma nabo.
32 Ngemva kwalokho woke ama-Israyeli atjhidela kuye, wawanikela yoke imiyalo uJehova amnikele yona eNtabeni iSinayi.+
33 Bekuthi uMosi nakaqeda ukukhuluma nabo athathe itjhila azigubuzese ngalo.+
34 Kodwana bekuthi lokha uMosi nakavela phambi kwakaJehova bona akhulume naye, asuse itjhila azigubuzese ngalo bekube kulapho aphuma.+ Nasele aphumile, bekatjela ama-Israyeli yoke imiyalo ayifumeneko.+
35 Ama-Israyeli abona ukuthi ubuso bakaMosi bukhupha imisebe, nje-ke uMosi wavala ubuso bakhe ngetjhilela bekwaba kulapho ayokukhuluma noZimu.+
Imitlolo Ephasi
^ Namkha “ithando elithembekileko.”
^ Qala Ihlathululo.
^ Qala Isith. B15.
^ Namkha “nigidinge iSabatha.”
^ Waziwa nangokuthi mNyanya wemiTlhatlhana (wamaThaberinakeli).
