Eksodusi 32:1-35
32 Abantu babona ukuthi uMosi uthethe isikhathi eside entabeni.+ Nje-ke babuthanela ku-Aroni bathi kuye: “Senzela uzimu ozokukhamba phambi kwethu+ ngombana asazi bona kwenzekeni ngoMosi lo, indoda eyasikhupha eGibhide.”
2 U-Aroni wathi: “Khuphani amacici wegolide+ ebafazini benu, emadodanenenu nemadodakazinenu niwalethe kimi.”
3 Nje-ke boke abantu bakhupha amacici wegolide ebebawafake eendlebeni zabo, bawaletha ku-Aroni.
4 Wathatha igolidelo ebantwini wabumba isithombe sekonyana ngetjhizela.+ Abantu bathi: “Lo nguZimakho Israyeli, owakukhupha eGibhide.”+
5 U-Aroni nakabona ikonyaneli, wakha i-aldara phambi kwalo, warhuwelela wathi: “Kusasa mnyanya kaJehova.”
6 Ngelanga elilandelako bavuka ekuseni benza imihlatjelo etjhiswako, baletha nemihlatjelo yetjhebiswano. Abantu bahlala phasi badla bebasela, ngemva kwalokho basikima ukuze bazithabise.+
7 Nje-ke uJehova wathi kuMosi: “Yehla ngombana abantu bakho owabakhupha enarheni yeGibhide bazisilaphazile.+
8 Baphambuke msinya endleleni engathi bakhambe ngayo.+ Bazenzele isithombe sekonyana bebaguqa phambi kwaso, basenzela umhlatjelo bathi: ‘Lo nguZimakho Israyeli owakukhupha eGibhide.’”
9 UJehova waraga wathi kuMosi: “Ngibonile ukuthi abantwaba banekani.+
10 Ngisilingekile, nje-ke ngilisa ngitjhabalalise abantwaba bese ngenza isitjhaba esikhulu ngawe.”+
11 UMosi wancenga uJehova uZimakhe+ wathi: “Maye! Jehova kubayini usilingwa babantu bakho owabakhupha eGibhide ngamandla amakhulu nangesandla sakho esinamandla?+
12 AmaGibhide azakuthi, ‘Bekaneenhloso ezimbi nakawakhupha eGibhide, bekafuna ukuyowabulalela eentabeni bekawatjhabalalise ephasini.+ Nje-ke ungasilingeki, uzisole ngesiqunto sakho sokuletha ihlekelele ebantwini bakho.
13 Khumbula iinceku zakho u-Abrahama, u-Isaka no-Israyeli owafunga kizo wathi: ‘Ngizokwenza iinzukulwana zenu zibe zinengi njengeenkwekwezi zezulwini+ begodu ngizokunikela iinzukulwana zenu yoke inarha le ukwenzela bona ibe ngeyazo unomphela.’”+
14 Nje-ke uJehova wazisola ngehlekelele ebekathe uzoyehlisela phezu kwabantu bakhe.+
15 UMosi wehla entabeni aphethe amatje amabili wobuFakazi+ asipara.+ Amatje la bewatlolwe mahlangothi womabili, bewatlolwe ngaphambili nangemva.
16 UZimu wazenzela yena amatje asipara la bewagobhodlha kiwo amezwakhe.+
17 Kwathi uJotjhuwa nakezwa itjhada labantu barhuwelela wathi kuMosi: “Kunetjhada lepi ekampeni.”
18 UMosi wathi:
“Akusilitjhada lokuthabela ukuhlulaBegodu akusilitjhada lokulilela ukuhlulaKodwana ngizwa itjhada elihlukileko lokubhina.”
19 UMosi nakatjhidela ekampeni, wabona ikonyana+ begodu abantu bagida, wasilingeka khulu, waphosela phasi amatje asipara egade awaphethe, aphadlheka ekuthomeni kwentaba.+
20 Wathatha ikonyana ebebalenzile, walitjhisa, walitshidlha laba yipuphu,+ ngemva kwalokho walirhatjha emanzini bewakatelela ama-Israyeli bona awasele.+
21 UMosi wathi ku-Aroni: “Abantwaba bakwenzeni bona ungabe ubalethele isono esikhulu kangaka?”
22 U-Aroni wathi: “Ungasilingeki kosami ngombana uyazi ukuthi abantwaba bathanda ukwenza okumbi.+
23 Bathe kimi: ‘Senzela uZimu ozokukhamba phambi kwethu ngombana asazi bona kwenzekeni ngoMosi lo, indoda eyasikhupha eGibhide.’+
24 Nje-ke ngathi kibo, ‘Nanyana ngubani onegolide, akalihlubule anginikele lona.’ Mina-ke ngaliphosela emlilweni kwaphuma ikonyaneli.”
25 UMosi wabona ukuthi abantu bone ngebanga lokuthi u-Aroni ubavumele ukuthi bone ngebanga lalokho bahlaziseka phambi kwamanababo.
26 UMosi wajama esangweni lekampa wathi: “Ngubani ongehlangothini lakaJehova? Akeze kimi!”+ Nje-ke woke amaLevi atjhidela kuye.
27 Wathi kiwo: “Nakhu uJehova uZimu wama-Israyeli akutjhwileko, ‘Omunye nomunye akahlome isabulakhe akhambe yoke ikampa, kiwo woke amasango abulale umfowabo, umakhelwanakhe nomnganakhe.’”+
28 AmaLevi enza njengombana uMosi awatjelile. Nje-ke kwabulawa amadoda angaba zii-3 000 ngelangelo.
29 UMosi wathi: “Namhlanjesi zicwengiseleni umsebenzi kaJehova ngombana omunye nomunye wenu ujikele indodanakhe nomfowabo.+ Namhlanjesi uZimu uzonibusisa.”+
30 Ngelanga elilandelako, uMosi wathi ebantwini: “Nenze isono esikhulukhulu, ngizokukhuphukela kuJehova ngibone ukuthi angeze nganibawela ukulitjalelwa na.”+
31 UMosi wabuyela kuJehova wathi: “Abantwaba benze isono esikhulu, bazenzele uzimu ngegolide!+
32 Nawuthandako balibalele isono sabo,+ nakungasinjalo ngibawa ungisule encwadinakho oyitlolileko.”+
33 UJehova wathi kuMosi: “Nanyana ngubani owonileko kimi, ngizomsula encwadinami.
34 Nje-ke khamba, udose phambili abantwaba ubase endaweni engikhulume ngayo nawe. Ingilozami izokukhamba phambi kwakho+ ngelanga engizokuhlola ngalo, ngizokujezisa abantwaba ngebanga lesono sabo.”
35 UJehova wathoma ukujezisa abantu ngebanga lekonyana abalibawa ku-Aroni bona abenzele lona.
