Yesibili YamaKhosi 22:1-20
22 UJosiya+ bekaneminyaka ebunane nakaba yikosi begodu wabusa iminyaka ema-31 eJerusalema.+ Igama lakanina bekunguJedida indodakazi ka-Adaya weBhotsikhathi.+
2 Wenza okuhle phambi kwakaJehova, wakhamba emtlhaleni kaDavida ukhokhwakhe+ begodu akhenge aphambukele ngesidleni namkha ngesinceleni.
3 Ngomnyaka we-18 wokubusa kweKosi uJosiya, ikosi yathumela uTjhafani unobhala, indodana ka-Atsaliya indodana kaMetjhulamu endlini kaJehova,+ yathi:
4 “Khuphukela kuRhilikhiya+ umphristi ophakemeko, umtjele bona abuthelele yoke imali elethwe endlini kaJehova,+ leyo abalindisango abayibuthelele ebantwini.+
5 Bayinikele labo ababekwe bona batlhogomele umsebenzi owenziwa endlini kaJehova bese bona bayinikele iinsebenzi zendlu kaJehova ezilungisa umonakalo kiyo,+
6 okuziinsebenzi zobukghwari, abakhi nalabo abakha ngamatje; imali leyo kufuze isetjenziselwe ukuthenga iingodo namatje abaziweko bona kulungiswe indlu.+
7 Kodwana akukafuzi babuzwe bona benzeni ngemali abanikelwe yona ngombana bathembekile.”+
8 Ngokukhamba kwesikhathi uRhilikhiya umphristi ophakemeko wathi kuTjhafani unobhala:+ “Ngifumene incwadi yomThetho+ endlini kaJehova.” Nje-ke uRhilikhiya wathatha incwadi leyo wayinikela uTjhafani, wathoma ukuyifunda.+
9 Ngemva kwalokho, uTjhafani unobhala waya ekosini wathi kiyo: “Iinsebenzi zakho zithethe imali efunyenwe ngendlini, zayinikela labo ababekwe bona batlhogomele umsebenzi endlini kaJehova.”+
10 Godu uTjhafani unobhala wathi ekosini: “Kunencwadi+ engiyinikelwe nguRhilikhiya umphristi.” Ngemva kwalokho, uTjhafani wathoma ukuyifunda phambi kwekosi.
11 Kuthe ikosi nayizwa amezwi wencwadi yomThetho, yarathula izambatho zayo.+
12 Ikosi yakhupha umyalo yawunikela uRhilikhiya umphristi, u-Arhikhamu+ indodana kaTjhafani, u-Akibori indodana kaMikaya, uTjhafani unobhala no-Asaya isisebenzi sayo yathi:
13 “Khambani niyongibuzela kuJehova, nibuzele nabantu, nibuzele noJuda woke malungana namezwi wencwadi efunyenweko le; ngombana uJehova usilingeke khulu+ ngathi nangebanga lokuthi abokhokho bethu akhenge balalele amezwi wencwadi le ngokwenza koke okutloliweko malungana nathi.”
14 Nje-ke uRhilikhiya umphristi, u-Arhikhamu, u-Akibori, uTjhafani no-Asaya baya kuRhulda umphorofidikazi.+ Bekamfazi kaTjhalumu indodana kaTikhiva indodana kaRharirhasi, umtlhogomeli wekumba yokubeka izambatho, bekahlala engcenyeni etja yedorobho leJerusalema; bakhuluma naye lapho.+
15 Wathi kibo: “UJehova uZimu ka-Israyeli uthi, ‘Tjelani indoda enithume kimi ukuthi:
16 “UJehova uthi, ‘Ngizokuletha ihlekelele endaweni le nezakhamuzini zayo, woke amezwi wencwadi ikosi yakwaJuda ewafundileko azokuzaliseka.+
17 Ngombana bangilahlile, bathunyisela abanye abozimu+ imihlatjelo bona bangisilinge ngemisebenzi yoke yezandla zabo,+ ilaka lami lizokuvuthela indawo le begodu angekhe licime.’”+
18 Kodwana ekosini yakwaJuda enithumele bona nizokubuza uJehova, nakhu ekufuze niyitjele khona, “UJehova uZimu ka-Israyeli uthi: ‘Malungana namezwi owezwileko,
19 ngebanga lokuthi ihliziywakho yathamba bese wazithoba+ phambi kwakaJehova nawuzwa lokho engakukhuluma ngokujamelene nendawo le nezakhamuzi zayo ukuthi zizokwehlakalelwa yinto esabekako begodu ziqalekiswe, warathula izambatho zakho+ walila phambi kwami, nami ngikuzwile, kutjho uJehova.
20 Kungebangelo-ke ngizokubuthela kibokhokho bakho* begodu uzokulaliswa ethuneni lakho ngokuthula, amehlwakho angekhe ayibone ihlekelele engizoyiletha endaweni le.’”’” Nje-ke bathatha umlayezo loyo bayowutjela ikosi.
Imitlolo Ephasi
^ Le yikulumo esakondlo etjho ukuhlongakala.
