Yesibili YamaKhosi 17:1-41
17 Ngomnyaka we-12 wokubusa kwaka-Arhazi iKosi yakwaJuda, uHotjheya+ indodana ka-Ela waba yikosi phezu kwaka-Israyeli eSamariya; wabusa iminyaka elithoba.
2 Waraga nokwenza okumbi emehlweni kaJehova kodwana ingasi ngezinga okwenza ngalo amakhosi wakwa-Israyeli ebekangaphambi kwakhe.
3 UTjhalimaneseri iKosi ye-Asiriya wakhuphuka bona azokulwa naye+ begodu uHotjheya waba sisebenzi sakho, wathoma ukubhadela umthelo kuye.+
4 Nanyana kunjalo, ikosi ye-Asiriya yezwa ukuthi uHotjheya ubandakanyeke ekulukeni amano wokuyisahlela, ngombana uthumele iinthunywa kuSo, iKosi yeGibhide+ begodu akhenge alethe umthelo ekosini ye-Asiriya njengeminyakeni egadungileko. Yeke ikosi ye-Asiriya yasolo imbambile begodu imvalele ngejele.
5 Ikosi ye-Asiriya yasahlela yoke inarha leyo, yafika eSamariya yalivimbezela iminyaka emithathu.
6 Ngomnyaka wethoba wokubusa kwakaHotjheya, ikosi ye-Asiriya yathumba iSamariya.+ Nje-ke yasa abantu bakwa-Israyeli ekudingisweni+ e-Asiriya beyabahlalisa eRhalarhi neRhabhori emlanjeni iGozani+ nemadorobheni wamaMede.+
7 Lokhu kwenzeka ngombana abantu bakwa-Israyeli bona kuJehova uZimabo, owabakhupha enarheni yeGibhide ngaphasi kwelawulo lakaFaro ikosi yeGibhide.+ Balotjha* abanye abozimu,+
8 balandela amasiko weentjhaba uJehova aziqotha phambi kwama-Israyeli, balandela namasiko abekwa makhosi wakwa-Israyeli.
9 Ama-Israyeli enza izinto ezingakalungi kuJehova uZimawo. Asolo azakhela iindawo eziphakemeko kiwo woke amadorobhawo, ukusuka esithaleni ukuya edorobheni+ elivikelekileko.*
10 Azijamisela iinsika ezicwengileko neengodo ezicwengileko*+ kiyo yoke imibundu ephakemeko nangaphasi kwayo yoke imithi ehlaza;+
11 kizo zoke iindawo eziphakemeko athunyisa intuthu yomhlatjelo njengombana kwenza iintjhaba uJehova aziqothela ekudingisweni ngaphambi kwawo.+ Asolo enza izinto ezingakalungi bona asilinge uJehova.
12 Araga nokulotjha iinthombe ezinyenyisako,*+ uJehova athi kiwo ngazo: “Ningakwenzi lokhu!”+
13 UJehova wasolo ayelelisa u-Israyeli noJuda asebenzisa boke abaphorofidi bakhe nabo boke ababona imibono,+ wathi: “Tjhugulukani eendleleni zenu ezimbi!+ Phethani imiyalo nemithethwami ngokuvumelana nawo woke umthetho engayala ngawo abokhokho benu nengiyithumele kini ngeensebenzi zami abaphorofidi.”
14 Kodwana akhenge alalele, ahlala anekani njengabokhokho bawo abangakhenge babe nokukholwa kuJehova uZimabo.+
15 Aragela phambili nokwala iinqophiso nesivumelwano+ sakhe asenza nabokhokho bawo neenkhumbuzo zakhe awayelelisa ngazo,+ asolo alandela iinthombe ezililize+ begodu nawo aba lilize,+ alingisa zoke iintjhaba eziwabhodileko lezo uJehova awayala bona angazilingisi.+
16 Asolo atjhiya yoke imiyalo kaJehova uZimawo, azenzela iinthombe zamathole amabili+ ngesimbi nesigodo esicwengileko,*+ akhothamela loke ibutho lezulwini+ begodu alotjha uBhali.+
17 Godu enza amadodanawo namadodakazawo aba mhlatjelo,*+ athukula,+ asolo azinikela* ekwenzeni okungakalungi emehlweni kaJehova bona amsilinge.
18 Nje-ke uJehova wamkwatela khulu u-Israyeli, kangangobana wamsusa phambi kwakhe.+ Akhenge atjhiye namunye ngaphandle kwekoro kaJuda kwaphela.
19 Ngitjho noJuda akhenge aphethe imiyalo kaJehova uZimakhe;+ naye walandela amasiko alandelwa ngu-Israyeli.+
20 UJehova walahla zoke iinzukulwana zaka-Israyeli, wazihlazisa bewazinikela esandleni sabadlelezeli, bekwaba kulapho aziqotha phambi kwakhe.
21 Wasusa u-Israyeli endlini kaDavida, zenza uJerobhowamu indodana kaNebathi ikosi.+ Kodwana uJerobhowamu wabangela u-Israyeli bona aphambuke ekulandeleni uJehova, wambangela nokobana enze isono esikhulu.
22 Abantu bakwa-Israyeli basolo bakhamba kizo zoke izono ezenziwe nguJerobhowamu.+ Akhenge bazitjhiye
23 bekwaba kulapho uJehova asusa u-Israyeli phambi kwakhe njengombana amemezela asebenzisa zoke iinsebenzi zakhe abaphorofidi.+ Nje-ke u-Israyeli wasuswa enarhenakhe wasiwa ekudingisweni e-Asiriya,+ lapho ahlala khona bekube kunamhlanjesi.
24 Yeke ikosi ye-Asiriya yaletha abantu abavela eBhabhiloni, eKhutha, e-Ava, eRhamathi, neSefarivayimu+ yabahlalisa emadorobheni weSamariya esikhundleni sama-Israyeli; bathatha iSamariya begodu bahlala emadorobhenayo.
25 Nabathoma ukuhlala lapho, akhenge basabe* uJehova. Nje-ke uJehova wathumela amabhubezi hlangana nabo,+ abulala abanye babo.
26 Kwabikelwa ikosi ye-Asiriya kwathiwa: “Iintjhaba ozise ekudingisweni begodu wazihlalisa emadorobheni weSamariya aziyazi ikolo kaZimu wenarha leyo. Usolo athumela amabhubezi hlangana nazo begodu ayazibulala, ngombana akekho namunye wazo owazi ikolo kaZimu wenarha leyo.”
27 Khonokho ikosi ye-Asiriya yakhupha umyalo othi: “Yalani omunye wabaphristi wenarheni leyo enamusa ekudingisweni bona abuyele lapho ayokuhlala khona bonyana ayokufundisa iintjhabezo ikolo kaZimu wenarha leyo.”
28 Nje-ke omunye wabaphristi owasiwa ekudingisweni avela eSamariya wabuya bona azokuhlala eBhetheli,+ wathoma ukufundisa iintjhabezo indlela yokusaba* uJehova.+
29 Nanyana kunjalo, esinye nesinye isitjhaba sazenzela uzimaso,* sambeka eendlini zokulotjha eendaweni eziphakemeko ebezenziwe maSamariya; esinye nesinye isitjhaba senza okufanako emadorobheni ebesihlala kiwo.
30 Nje-ke amadoda weBhabhiloni azenzela uSukothi-Bhenothi, amadoda weKhutha azenzela uNerigali, amadoda weRhamathi+ azenzela u-Atjhima,
31 ama-Ava azenzela uNibhirhazi noTaritakhi. AmaSefarivayimu bewatjhisa amadodanawo emlilweni ku-Adrameleki no-Anameleki, abozimu bamaSefarivayimu.+
32 Nanyana bebasaba uJehova, bazibekela abaphristi eendaweni eziphakemeko babakhetha eentjhabeni zabo, abaphristabo bebasebenzela eendlini zokulotjha eendaweni eziphakemeko.+
33 Nje-ke basaba uJehova kodwana balotjha abozimu babo ngendlela yekolo yeentjhaba ababuya kizo.+
34 Bekube kunamhlanjesi balandela ikolwabo yaphambilini. Akekho namunye wabo olotjha uJehova, akekho namunye wabo olandela imithethwakhe, izahlulelo zakhe, umThetho nomyalo uJehova awuphe amadodana kaJakopo, loyo igama lakhe alitjhugulula laba ngu-Israyeli.+
35 UJehova nakenza isivumelwano nabo,+ wabayala wathi: “Ningasabi abanye abozimu, ningabakhothameli namkha nibalotjhe namkha nibenzele umhlatjelo.+
36 Kodwana uJehova, owanikhupha enarheni yeGibhide ngamandla amakhulu nangesandla esilulekileko,+ nguye ekufuze nimsabe,+ nguye ekufuze nimkhothamele begodu nguye ekufuze nimenzele umhlatjelo.
37 Yeke iinqophiso, izahlulelo, umThetho nomyalo anitlolela wona,+ kufuze nihlale niwulandela ngokutjhejisisa begodu kufuze ningasabi abanye abozimu.
38 Kufuze ningasikhohlwa isivumelwano engasenza nani+ begodu kufuze ningasabi abanye abozimu.
39 Kodwana kufuze nisabe uJehova uZimenu njengombana kunguye ozonisindisa esandleni sawo woke amanabenu.”
40 Kodwana akhenge balalele, balandela ikolwabo yaphambilini.+
41 Nje-ke iintjhabezi zathoma ukusaba uJehova,+ kodwana bezilotjha neenthombe zazo ezibaziweko. Amadodanazo neenzukulwana zazo zenza njengombana kwenza abokhokho bazo, bekube kunamhlanjesi.
Imitlolo Ephasi
^ NgesiHebheru, “Basaba.”
^ Kutjho kiyo yoke indawo, ngitjho nanyana inezakhamuzi ezimbalwa namkha ezinengi.
^ Qala Ihlathululo.
^ Ibizo lesiHebheru elisetjenziswe la lingahlobana nebizo elithi “ubulongwe” begodu lisetjenziselwe ukuveza ukunyenya.
^ Qala Ihlathululo.
^ NgesiHebheru, “adlulisa amadodana namadodakazawo emlilweni.”
^ NgesiHebheru, “azithengisela.”
^ Namkha “balotjhe.”
^ Namkha “yokulotjha.”
^ Namkha “abozimu baso.”
