IBhayibheli labikezela ukuthi “isitjhaba sizokulwa nesitjhaba” begodu kusikinyeke iphasi eendaweni ngeendawo ‘ekupheleni kwephasi’ (Matewu 24:3, 7) Siwabonile amezwi wesiphorofido la, azaliseka hlangana nomnyaka wekonzo wango-2023. a Kodwana aboFakazi bakaJehova batjengise ukuthi bayabathanda abantu ngesikhathi sezipi neenhlekelele zemvelo eenarheni ezingaba li-100. Njani?

 Hlangana nomnyaka wekonzo wango-2023, abafowethu nabodadwethu behlelwa ziinhlekelele zemvelo namkha iinhlekelele ezibangelwa babantu ezingaba ma-200. Ihlangano yaboFakazi bakaJehova isebenzise imali engaphezulu kwamamiliyoni alitjhumi wama dola, b okumnikelo ovela ephasini mazombe bona kuhlangatjezwane neendleko zokuhlangula. Lokhu kuhlanganisa neminikelo abafowethu nabodadwethu abanikele ngayo bona kusizwe abatlhagileko eenarheni zemakhabo. Tjheja bona iminikelwenu yasetjenziswa njani bona kusizwe abafowethu nabodadwethu abehlelwe ziinhlekelele.

 Ezinye iindawo zeNigeria zihlala zineenkhukhula. Kodwana iinkhukhula ezaba khona enarheni le ngo-Oktoba 2022, zaba zimbi khulu ukudlula ekhezaba khona eminyakeni elitjhumi edlulileko. Amasimu amakhulu angaphezulu kwamahekthara azii-676 000 atjhabalala, kwathi abantu abangaphezulu kwamamiliyoni amabili babaleka batjhiya amakhaya wabo. Igatja leNigeria lahloma iKomidi yokuHlangula ngokurhabako bona iqale ukuthi abafowethu nabodadwethu bangasizwa njani begodu bahlale batjhidelene noZimu.

•   Abarhuweleli abazii-7 505 kwatlhogeka batjhiye amakhaya wabo

•   Izindlu ezima-860 zabhidlika

•   AmaWolo womBuso ama-90 neWolo lomHlangano linye kwarhurhulwa mamanzi

 Kusetjenziswe amadola angaphezulu kwee-250 000 emsebenzini wokuhlangula, okuhlanganisa:

•   Ukudla okufaka hlangana irayisi, amabhontjisi nomagaroni

•   Izinto zangendlini njengamamatrasi nezinto eziqotjha abonompopoloza

•   Ukulungusa nokwakha kabutjha imakhiwo eyonakeleko

 Abafowethu baqinisekisa njani bona iminikelo isetjenziswa ngendlela efanaleko? Enye indlela, bebahlolisisa umakhiwo ngamunye ukuthi utlhoga ukulungiswa namkha ukwakhiwa kabutjha. Nange umakhiwo utlhoga ukwakhiwa kabutjha, bewakhiwa ngendlela elula nejayelekileko endaweni leyo.

 Abafowethu nabodadwethu abafumana isizo abawuvali umlomo. Omunye udade wathi: “Iinkhukhula zahlangahlanganisa ukuphila kwethu ngombana woke amasimethu amotjheka begodu sasala singanazo neendawo zokufihla ihloko. Sazizwa sitjhaphuluka nasibona abafowethu nabodadwethu bafika ngelangelo bona bazosisiza, basinikela nendawo yokulala evikelekileko. Sathokoza khulu nasifumana nokudla okuthunyelwe ligatja. Saphelelwa mamezwi nasibona umtlolo kaJwanisi 13:34, 35 uzaliseka kithi. . . . Ithando lamambala lisesekhona. Mina nomndenami, sibawa ukutjho ngokusuka ehliziyweni ukuthi sibathokoza kwamambala abafowethu nabodadwethu ngokusisiza ngesikhathi esibatlhoga ngaso.”

 Abanye emphakathini wekhethu bawubona umsebenzi owenziwa yikomidi yezokuhlangula. Ikosi yesitjhaba seSabagreia, uBayelsa State, yathi: “Zinengi iinhlangano namkha amasondo ephasineli kodwana boFakazi bakaJehova kwaphela abenze into efana nale. . . . Ihlangano yenu ikhamba phambili ephasini mazombe.”

 NgoFebheribari 2023, kwaqubuka imililo engaphezulu kwama-400 begodu yabangela umonakalo omkhulu eChile. Amasimu angaba mahekthara azii-430 000, kuhlanganise nezinye izinto eziqakathekileko zeChile zamotjheka. Pheze abantu abalinganiselwa kwaba zii-8 000 bafuduswa eendaweni abahlala kizo. Msinyana ngemva kwehlekelele, i-ofisi legatja lathoma ukwenza amalungiselelo wokuhlangula.

•   Abarhuweleli abama-222 bafuduswa

•   Amakhaya ama-20 amotjheka

 Kwasetjenziswa imali engaphezulu kwamadola azii-200 000 emsebenzini wokuhlangula, okuhlanganisa:

•   Ukudla namanzi

•   Iimbaseli, izinto zokuhlwengisa nemitjhoga

•   Ukwakha kabutjha imakhiwo emotjhekeliko

 Omunye umndeni watshwenyeka khulu nawufumana bona ulahlekelwe ngiyo yoke into, okuhlanganisa indlu nawo woke amarhwebo. Lokhu kwatjhiya umndeni lo unganalitho ongaziphilisa ngakho. Hlangana namalanga wokuthoma, umndeni lo bewuzwa ubuhlungu khulu nawuqala indawo lapha bekunomuzawo khona. Kodwana bathi nababona indlwabo yakhiwa kabutjha, bathoma ukuzizwa bangcono khulu. Ukubona indlela amavolontiya abathanda ngayo kwabenza bakghona ukukghodlhelela. Umndeni lo wathinteka khulu nawubona okwenzekako kangangobana nawo wasiza nakwakhiwa kabutjha indlu yomunye umfowethu.

 Inengi labafowethu nabodadwethu lathinteka khulu nalibona umsebenzi owenziwa yikomidi yezokuhlangula. Omunye umfowethu wathi: “Ihlelo lakaJehova lekomidi yezokuhlangula lihle khulu. Ngemva kwelanga kuvele ihlekelele, abafowethu besele bafikile basisiza ngezinto esizitlhogako. Kuyakhuthaza ukufunda ngomsebenzi owenziwa yikomidi yezokuhlangula kwezinye iinarha. Kodwana nakwenzeka kuwe kuba ngenye into. Uthokoza ihlangano kaZimu ukudlula ngaphambilini. Kuyakhuthaza ukubona indlela abafowethu nabodadwethu abalingisa ngayo ubuntu bakaJehova, indlela abasebenza ngayo ngokuzimisela bona sifumane esikutlhogako, sihlale sitjhidelene noZimu begodu sehlise umoya. Lokhu kuyatjengisa bona uJehova uyasithanda.”

 Njengombana iphaseli sele liseduze nokuphela, sizokuragela phambili sibona iinhlekelele. (Lukasi 21:10, 11) Nanyana kunjalo, iKosethu ethandekako uJesu Krestu, isebenzisa ibandla lobuKrestu bona isitjengise ukuthi inathi “imihla yoke bekube sekupheleni kwephasi.” (Matewu 28:20) Iminikelo yenu esuka ehliziyweni, esekela umsebenzi wephasi loke eniyifaka ku-donate.isa4310.com neminye eminengi, ehlanganisa amandla nesikhathi senu, itjengisa ukuthi nisekela umBuso nekosayo esithandako. Sinithokoza kwamambala ngokuragela phambili ninikela.