Nengisesemncani, umndeni wekhaya bewuhlala eduze neLeipzig, ePumalanga yeJarimani, engasikude nomkhawulo weCzech nowePoland. Nengineminyaka esithandathu, umndeni wekhaya wathutha ngebanga lomsebenzi kababa—kokuthoma saya eBrazil ngokulandelako saya e-Ecuador.

Nengineminyaka eli-14, ngasiwa esikolweni eJarimani bona ngiyokuhlala khona. Ngebanga lokokuthi ababelethi bami bebahlala kude eSouth America, bekufuze ngizitlhogomele. Ngathoma ukuzijamela. Benginganandaba nokuthi izenzo zami zibathinta njani abanye abantu.

Nengineminyaka eli-17, ababelethi bami babuyela eJarimani. Ngabuya ngayokuhlala nabo ekhaya. Kodwana ukuzibusa kwami kwangenza ngangakghoni ukuhlala ngaphasi kwegunya lababelethi bami. Nengineminyaka eli-18, ngakhamba ekhaya.

Ngathoma ngehla ngenyuka, ngifuna ipilo enomnqopho. Ngemva kokuqala iindlela zokuphila neenhlangano ezihlukahlukeneko, ngaqiniseka ukuthi into engcono khulu engingayenza ngokuphila kwami bekukukhamba ngibukele iplanethi ehle le ngaphambi kobana abantu bayitjhabalalise.

Ngakhamba eJarimani, ngathenga isithuthuthu, ngalibangisa e-Afrika. Nanyana kunjalo, msinyana ngabuyela e-Europe bona ngiyokulungisa isithuthuthu sami. Ngemva kwalokho, ngazifumana ngiselwandle lePortugal. Ngaqunta ukulisa ukukhamba ngesithuthuthu bese ngathoma ukukhamba ngesikepe.

Ngajoyina isiqhema sabantu abatjha ebesizilungiselela ukuyama iLwandle le-Atlantic ngesikepe. Hlangana nabo ngafumana udade ebengizokutjhada naye, uLaurie. Kokuthoma, saya esihlengeleni se-Caribbean ngesikepe. Ngemva kokuhlala isikhatjhana ePuerto Rico, sabuyela e-Europe. Besinethemba lokobana sizokufumana isikepe ebesingahlala kiso. Kodwana ukusifuna kwethu kwathikaziseka ngemva nje kweenyanga ezintathu. Ngathathwa libutho lemajoni wepi weJarimani.

Ngahlala iinyanga ezili-15 ebuthweni lemanzini leJarimani. Hlangana nesikhatheso, mina no-Laurie satjhada bese sazilungiselela nokuragela phambili nepilwethu yokuvakatjha.  Ngaphambi kobana ngingenele ikonzo yobujoni, besithenge isikepe esingakapheli. Nengisasebenza ebuthweni lamajoni, besisolo sisiqedelela kancanikancani isikepe sethu. Sahlela ukuvakatjhela iplanethi ehle le sisolo sihlala kiso. Kwafikelela ezingeneli—lokuthi ngemva komsebenzi webutho lamajoni singakabi ukuqeda isikepe sethu—safunyanwa boFakazi bakaJehova bese sathoma ukufunda iBhayibheli.

Ekuthomeni, bengingaboni itlhogeko yokutjhentjha ipilwami kangako. Bengihlala nomma ebengitjhade naye, besele ngilise nokubhema. (Efesu 5:5) Njengombana amaplani wethu bekukuvakatjhela iphasi, bengicabanga ukuthi ukunikela amaphilwethu sibukela iimvelo kaZimu bekuyinto efanelekako.

Nanyana kunjalo, eqinisweni akhange kutlhogeke bona ngenze amatjhuguluko angako—khulukhulu ebuntwini bami. Ukuba mumuntu ozijameleko begodu nonganandaba, bengibambelele emakghonwenami nepumelelwenami. Bengizicabangela mina kwaphela.

Ngelinye ilanga ngafunda ngetjumayelo kaJesu edumileko yentabeni. (Matewu, izahluko 5-7) Ekuthomeni, bengingalizwisisi ithabo uJesu akhuluma ngalo. Ngokwesibonelo, wathi ithabo lingelalabo abalambele nabomele ukulunga. (Matewu 5:6) Ngazibuza bona ukutlhoga kungamenza njani umuntu athabe. Njengombana bengiragela phambili nokufunda, ngakhanyelwa bona soke sinetlhogeko engokomoya kodwana kufuze sizithobe sikuvume lokho ngaphambi kobana itlhogeko leyo izaliseke. Kunjengalokha uJesu nakathi: “Babusisiwe abaswelako emmoyeni ngombana umbuso wezulu ungewabo.”—Matewu 5:3.

Ngemva kokuthoma ukufunda iBhayibheli eJarimani, sinoLaurie sathuthela eFrance, ngokukhamba kwesikhathi sathuthela e-Italy. Nanyana kukuphi lapho ebesiya khona, besifumana aboFakazi bakaJehova. Langikara khulu ithando abebatjengisana lona nobunye babo. Ngabona ukuthi aboFakazi mbala bazalwana bephasi loke. (Jwanisi 13:34, 35) Ngokukhamba kwesikhathi mina noLaurie sabhajadiswa sababoFakazi bakaJehova.

Ngemva kokubhajadiswa, ngaragela phambili nokwenza amatjhuguluko ebuntwini bami. SinoLaurie saqunta ukuyama i-Afrika sadlula ilwandle le-Atlantic sayokufika e-United States. Bekuselwandle—sisobabili kwaphela esikepeni esincani ngemanzini amanengi—kulapho ngakhanyelwa khona bona ngimncani kangangani nengimadaniswa noMbumbi omkhulu. Benginesikhathi esinengi (bekungekho ebengikwenza elwandle), ngazinikela ekufundeni iBhaybheli. Ngakarwa khulukhulu zizenzo zokuphila kwakaJesu nakasesephasini. Bekamumuntu opheleleko akghona nokwenza nanyana yini, khonapho akhenge azikhakhazise. Ipilwakhe begade ingasi ngaye kodwana beyimalungana noYise wezulwini.

Njengombana bengizindla ngesibonelo sakaJesu, ngabona ukuthi ngitlhoga ukubeka umBuso kaZimu qangi epilwenami kunokobana ngenze nanyana yini efunwa ngimi. (Matewu 6:33) Lokha nasifika e-United States sinoLaurie, saqunta ukunzinza khona, sidzimelele ekukhulekeleni kwethu uZimu.

Ipilwami yangaphambili yokuzicabangela mina kwaphela beyingenza ngingaqiniseki ngeenqunto engizithathako. Nanyana kunjalo, ngifumene umthombo welemuko lamambala eliqinisekileko elizonginqophisa. (Isaya 48:17, 18) Ngifumene nomnqopho godu epilwenami ebegade nginganawo ngaphambili—ukukhulekela uZimu nokusiza abanye bafunde ngaye.

Ngokusebenzisa iinkambisolawulo zeBhayibheli, sinoLaurie sikghone ukuqinisa umtjhadwethu. Sibusiswe godu ngendodakazi ehle, ekhule yazi begodu ithanda uJehova.

Akusikukuthi koke epilwenethu begade kukhamba kuhle. Kodwana ngesizo lakaJehova, sizimisele ukuthembela kuye.—IzAga 3:5, 6.