Njengombana kutjhiwo esihlokweni esidlulileko, into ebeyiqakatheke khulu kuJesu ‘bekukutjhumayela iindaba ezimnandi zomBuso.’ (Lukasi 8:1) Wazimisela, akhamba amabanga amade enarheni yakwa-Israyeli afundisa abantu ngomBuso kaZimu. Umsebenzi kaJesu wokutjhumayela utlolwe emaVangelini amane, aneenkhombo ezingaphezu kwe-100 ezikhuluma ngomBuso. Iinkhombo ezinengi zifumaneka emezwini kaJesu begodu zijamele okuncani kilokho akutjho ngomBuso kaZimu.—Jwanisi 21:25.

Kubayini umBuso bewuqakatheke khulu kuJesu nakasephasini? UJesu bekazi ukuthi uZimu umkhethile bona abeMbusi. (Isaya 9:6; Lukasi 22:28-30) UJesu bekangakadzimeleli ekuzifumaneleni amandla namkha idumo. (Matewu 11:29; Markosi 10:17, 18) Akhange akhulume ngomBuso bona azizuzise yena. UJesu bekasolo anekareko emBusweni kaZimu a bekube nje ngebanga lalokho ozokwenzela abantu abathandako, uBabakhe wezulwini nabalandeli bakhe abathembekileko.

UJesu umthanda khulu uBabakhe wezulwini. (IzAga 8:30; Jwanisi 14:31) Uyabuthanda ubuntu bakaBabakhe obuhle njengethando lakhe, isirhawu nobulungiswa. (Duteronomi 32:4; Isaya 49:15; 1 Jwanisi 4:8) Siyaqiniseka ukuthi uJesu uyakuhloya ukuzwa amala akhulunywa ngoBabakhe, amala anjengokuthi uZimu akanandaba nabantu nabatlhagako nokuthi ufuna sitlhage. Leli ngelinye ibanga elenza uJesu wakhuthalela ukutjhumayela “iindaba ezimnandi zomBuso,” bekazi ukuthi ngesikhathi esifaneleko umBuso uzokucwengisa igama lakaBabakhe. (Matewu 4:23; 6:9, 10) Uzokwenza njani lokho?

Asebenzisa umBuswakhe, uJehova uzokwenza amatjhuguluko amanengi azokuzuzisa abantu. “Uzokusula zoke iinyembezi” emehlweni wabantu abathembekileko. UJehova uzokususa koke okubangela abantu balile, aqinisekise ukuthi “ukufa angekhe kusaba khona namkha isizi namkha ukulila namkha ubuhlungu angekhe kusaba khona.” (IsAmbulo 21:3, 4) Asebenzisa umBuswakhe uZimu uzokususa ukutlhaga ebantwini. b

Akusirari ukuthi uJesu bekazimisele ukutjela abantu ngomBuso kaZimu. Bekazi ukuthi lokho kuzokuveza bona uBabakhe unamandla begodu unomusa kangangani. (Jakopo 5:11) UJesu bekazi nokuthi umBuso uzokuzuzisa nabantu abathandako, okubabantu abathembekileko.

Ngaphambi kokuthi eze ephasini, uJesu bekahlala ezulwini noBabakhe. UBaba wasebenzisa iNdodana ukwenza zoke izinto, kusukela ezintweni ezikarisako ezisezulwini ezihlanganisa iinkwekwezi ezinengi nemithalazo bekufikele eplanethinethu ehle neenlwana ezikiyo. (Kolose 1:15, 16) Kikho koke okudaliweko uJesu ‘wabathanda khulu’ abantu.—IzAga 8:31.

Indlela uJesu athanda ngayo abantu yabonakala ekonzwenakhe. Wakwenza kwakhanya kwekuthomeni ukuthi bekeze ephasini bona azokutjhumayela “iindaba ezimnandi” kilabo abazitlhogako. (Lukasi 4:18) UJesu wenza okungaphezu kokukhuluma kwaphela ngokusiza abantu. Bekenza izinto ebezitjengisa ukuthi uyabathanda abantu. Ngokwesibonelo, lokha isiqubuthu sihlangene bona simlalele, uJesu “wasirhawukela, walapha abagulako kiso.” (Matewu 14:14) Lokha indoda enokugula okubuhlungu nayiveza ukuthi iyakholelwa bona uJesu angayilapha nakafunako, uJesu watjengisa ukuthi uyayithanda. Walapha indoda le, ngokuyitjela ngomusa wathi “ngiyathanda! Hlambuluka.” (Lukasi 5:12, 13) UJesu nakabona umnganakhe uMariya ezwa ubuhlungu ngebanga lokuhlongakalelwa ngumfowabo uLazaru, “wathinteka khulu ehliziyweni” “watshwenyeka” begodu “walila.” (Jwanisi 11:32-36) UJesu wenza into ebeyingacabangeki wavusa uLazaru nanyana besele ahlongakele amalanga amane.—Jwanisi 11:38-44.

UJesu bekazi ukuthi izinto ebekazenza nakasephasini bekungezesikhatjhana. Bekazi ukuthi ngokukhamba kwesikhathi boke abalaphako bebazokugula godu nokuthi boke abavusileko bazokuhlongakala. Nanyana kunjalo, uJesu bekazi ukuthi umBuso kaZimu uzoyiqeda ngokupheleleko imiraro efana nale. Kungebangelo uJesu angakhange enze imikarisomiraro kwaphela kodwana wakhuthalela nokutjhumayela “iindaba ezimnandi zomBuso.” (Matewu 9:35) Imikarisomiraro ebekayenza beyisivezela kancani lokho umBuso kaZimu ozokwenza ephasini loke kungasikade. Cabanga ngalokho iBhayibheli elikuthembisako malungana nesikhatheso.

• Angekhe kusaba nemiraro yezepilo.

  “Ngesikhatheso, amehlo weemphofu azokuvulwa, iindlebe zabangezwako zizokuzwa. Ngesikhatheso abarholopheleko bazokweqayeqa njengeqina, iimumu zizokurhuwelela ngethabo.” Ukungezelela kilokho “asikho isakhamuzi esizokuthi: ‘Ngiyagula.’”—Isaya 33:24; 35:5, 6.

• Ukufa angekhe kusaba khona.

  “Abalungileko bazokufumana iphasi njengelifa begodu bazokuhlala kilo ngokungapheliko.”—IRhubo 37:29.

  “Uzokuqeda nya ukufa begodu iKosi ePhakemeko uJehova izokusula iinyembezi ebusweni babo boke.”—Isaya 25:8.

• Abafileko bazokuvuka.

  “Boke abasemathuneni bazokuzwa ilizwi layo baphume.”—Jwanisi 5:28, 29.

  “Kuzokuvuswa abafileko.”—IzEnzo 24:15.

• Angekhe kusaba nabatlhoga iindawo zokuhlala nomsebenzi.

  “Bazokwakha izindlu bahlale kizo, bazokutjala amasimu wamadiribe badle iinthelo zawo. Angekhe bakhe bese kuhlale omunye namkha batjale bese kudle abanye. . . . Bazokuthabela umsebenzi wezandla zabo.”—Isaya 65:21, 22.

• Angekhe kusaba nepi.

  “Uqeda izipi ephasini loke.”—IRhubo 46:9.

  “Isitjhaba angeze sisaphakamisela esinye isitjhaba isabula namkha sifunde ipi.”—Isaya 2:4.

• Angekhe kusaba nokutlhayela kokudla.

  “Iphasi lizokuthela; UZimu, uZimethu uzosibusisa.”—IRhubo 67:6.

  “Kuzokuba nenala yeenthoro ephasini; zizokuphuphuma esiqongolweni seentaba.”—IRhubo 72:16.

• Angekhe kusaba nokutlhaga.

  “Angeze amkhohlwe otlhagako.”—IRhubo 9:18.

  “Uzokuhlangula abatlhagako abalilela isizo, kunye nabangasililitho nananyana ngubani onganamsizi. Uzokurhawukela abangasililitho nabatlhagako, uzokusindisa ukuphila kwabatlhagako.”—IRhubo 72:12, 13.

Nawucabanga ngeenthembiso ezimalungana nomBuso kaZimu, kghani uyabona ukuthi kubayini uJesu awuthanda umBuso? Nakasephasini, bekakhuthalele ukutjela woke umuntu omlalelako ngomBuso kaZimu ngombana bekazi ukuthi umBuso lo uzokuqeda yoke imiraro esigandelelako namhlanjesi.

Inga-kghani ziyakukara iinthembiso zeBhayibheli ezimalungana nomBuso? Nangabe kunjalo, ungafundaphi ngokungeneleleko ngomBuso lo? Khuyini ongayenza ukuqinisekisa bona uyazuza eenthembiswenezi? Isihloko sokugcina eenhlokweni ezimlandelandezi sizokuphendula imibuzo le.