Iphasi namhlanjesi lizele ngeenthombe zomseme ezisilapheleko. a Zingafumaneka emikhangisweni, efetjhenini, kumabhayisikobho, embhinweni, kibomagazini, kuhlanganise nakumabonakude, emidlalweni yamavidiyo, kibofunjathwako, kumakhomphyutha aphathwako, kuZinzolwazi begodu nje zifumaneka neensetjenzisweni zokuthumelana iinthombe nge-inthanethi. Kubonakala ngasuthi iinthombe zomseme ezisilapheleko seziyinto ethandwa khulu emphakathini wanamhlanjesi. Abantu abanengi eendaweni ezinengi babukela iinthombe zomseme ezisilapheleko kunanyana kunini emlandweni.—Qala ibhoksi elithi  “Amaqiniso Ngeenthombe Zomseme Ezisilapheleko.”

Iinthombe zomseme ezisilapheleko ziya ngokuya zitjhentjha. UProfesa Gail Dines uyatlola: “Iinthombe namhlanje sezidlulele khulu kangangobana ebeziqalwa njengeenthombe zomseme ezinyenyisa khulu okwanje sezijayelekile.”

 Uyiqala njani imibono le? Kghani iinthombe zomseme ezisilapheleko ziyinto yokuzithabisa engatjho litho, zinetjhefu ebulalako nofana okhunye kwalokhu? UJesu wathi: “Ngokunjalo omunye nomunye umuthi omuhle uthela iinthelo ezihle, kodwana umuthi omumbi uthela iinthelo ezimbi.” (Matewu 7:17) Iinthombe zomseme ezisilapheleko ziveza siphi isithelo? Bona sifumane iimpendulo, akhe sicoce ngeminye imibuzo esisekelo emalungana neenthombe zomseme ezisilapheleko.

OKUTJHIWO ZIZAZI: Iinthombe zomseme ezisilapheleko zenza umuntu isigqila, abanye abarhubhululi nabalaphi bazifanisa ngitjho nesidakamizwa i-crack cocaine.

UBrian, b obekabanjwe ziinthombe zomseme ezisilapheleko ku-inthanethi uyalandisa: “Ayikho into ebeyingangivimba. Bengizizwa ngidakiwe. Bengihlengezele begodu ngiphathwe yihloko. Ngalinga ukulisa, kodwana kwaphela iminyaka ngilokhu ngisigqila sazo.”

Abantu abazanelisa ngeenthombe zomseme ezisilapheleko kanengi bafihla imikghwabo. Bayafihla begodu bayakhohlisa. Akurari bona abanengi bazizwa balahliwe, baneenhloni, batshwenyekile, bagandelelekile begodu banelaka. Kobunye ubujamo bafuna ngitjho nokuzibulala. USerge obekadawnloda iinthombe zomseme ezisilapheleko kufunjathwakwakhe qobe langa uthi: “Ngathoma ukutshwenyeka ngokweqileko begodu ngaphelelwa lithemba. Ngazizwa ngingasililitho, ngimlandu, nginesizungu begodu ngivalelekile. Bengineenhloni begodu ngisaba ukufuna isizo.”

Ngitjho nanyana umuntu angabona iinthombe zomseme ezisilapheleko isikhatjhana nofana angakahlosi kungaba nemiphumela edanisako. Akhuluma phambi kwekomidi yeSenate e-U.S. uDr. Judith Reisman, omrhubhululi ngeenthombe zomseme ezisilapheleko odosa phambili, wathi: “Iinthombe zomseme ezisilapheleko ziyahlala engqondweni begodu zithinte ingqondo, zibangele ikumbulo engasulekiko, engalawulekiko okubudisi ukuyisusa nofana engeze yasuka.” USusan oneminyaka eli-19, okwenzeka wabona iinthombe zomseme ezisilapheleko ku-Zinzolwazi, uyalandisa: “Iinthombe zakhele engqondwenami. Zinande zibuya kungakalindeleki. Ngicabanga bona angekhe zisuke unomphela.”

IQINISO LIKUKUTHI: Iinthombe zomseme ezisilapheleko ziyagqilaza begodu zenza umonakalo omkhulu kibongazimbi bazo.—2 Pitrosi 2:19.

OKUTJHIWO ZIZAZI: “Abantu abatjhadileko nemindeni bayahlukana ngebanga leenthombe zomseme ezisilapheleko.”—The Porn Trap, kaWendy noLarry Maltz.

Iinthombe zomseme ezisilapheleko zilimaza imitjhado nemindeni

• Ngokwehlisa ukuthembana emtjhadweni, ukutjhidelana nethando.—IzAga 2:12-17.

• Ngokuthuthukisa ukuba marhamaru, ukungabi  nandaba namazizo nokunganeliseki ngomuntu otjhade naye.—Efesu 5:28, 29.

• Ngokubaselela imicabango neemfiso zomseme ezisilapheleko.—2 Pitrosi 2:14.

• Ngokulinga umuntu ozisebenzisako bona akatelele umlinganakhe enze izenzo zomseme ezingakalungi.—Efesu 5:3, 4.

• Ngokuthuthukisa amazizo wokungathembeki.—Matewu 5:28.

IBhayibheli itjela abalingani bomtjhado bona ‘bangakhohlisani.’ (Malaki 2:16, NW.) Ukungathembeki lihlobo lokukhohlisa elingonakalisa umtjhado begodu kungadosela esehlukanisweni nekutlhaleni. Ngalokho, ukuhlukana okunjalo kulimaza abantwana emtjhadweni.

Godu iinthombe zomseme ezisilapheleko zingalimaza abantwana ngokunqophileko. UBrian okukhulunywe ngaye ngaphambili uyahlathulula: “Nengineminyaka elitjhumi, ngingakahlosi ngafumana abomagazini bakababa beenthombe zomseme ezisilapheleko nesidlala umabhacelana. Ngathoma ukuzibukela ngemsitheleni, ngingazwisisi bona kubayini bengikarwa ziinthombezo. Umukghwa lo wathoma ukungitshwenya bengaba mkhulu.” Irhubhululo litjengisa bona iinthombe zomseme ezisilapheleko zingaba nomthelela  ebantwaneni abangena ebutjheni bona baye emsemeni basesebancani begodu baziphathe kumbi, babe nenturhu ekhambisana nezomseme banganzinzi ngokwamazizo nangokomkhumbulo.

IQINISO LIKUKUTHI: Iinthombe zomseme ezisilapheleko zifaka itjhefu ebuhlotjeni obuthandekako begodu ekugcineni zilimaza ihliziyo zibangele nobuhlungu.—IzAga 6:27.

ILIZWI LAKAZIMU LITHI: ‘Nje-ke bulalani koke okukini okungokwemvelo . . . ubufebe, ukusilaphala, ikanuko, iimfiso ezimbi nobumarhamaru, okukulotjha abosingazimu.’—Kolose 3:5.

Bulula, uJehova c uZimu uyazihloya iinthombe zomseme ezisilapheleko. Lokhu akusingebanga lokobana unehlonipho edluleleko ngomseme. Ubumbe iimfiso zomseme ezinamandla begodu ngomnqopho wokobana abalingani bomtjhado bazisebenzise bona bathabisane, batjhidelane ngokwamazizo, begodu bahlanganyele esimangalisweni sokuletha abantwana ephasini.—Jakopo 1:17.

Ngalokho, kubayini singatjho bona uJehova uyazihloya iinthombe zomseme ezisilapheleko? Cabanga ngamabanga ambalwa.

• Uyazi bona iinthombe zomseme ezisilapheleko zingonakalisa ukuphila.—Efesu 4:17-19.

• Uyasithanda begodu ufuna ukusivikela engozini.—Isaya 48:17, 18.

• UJehova ufuna ukuvikela imitjhado nemindeni.—Matewu 19:4-6.

• Ufuna sihlwengeke ngokuziphatha begodu sihloniphe amalungelo wabanye.—1 Thesalonika 4:3-6.

• Ufuna siwahloniphe amandlethu wokubeletha begodu siwasebenzise ngendlela ehloniphekileko.—Hebheru 13:4.

• UJehova uyazi bona iinthombe zomseme ezisilapheleko zitjengisa umbono ongasimuhle ngomseme, omarhamaru nobusathana.—Genesisi 6:2; Juda 6, 7.

IQINISO LIKUKUTHI: Iinthombe zomseme ezisilapheleko zonakalisa ubuhlobo bomuntu noZimu.—Roma 1:24.

Ngalokho, uJehova uyabarhawukela labo abafuna ukulisa ukubukela iinthombe zomseme ezisilapheleko. IBhayibheli ithi: ‘UJehova unomusa nesirhawu, ubuthaka ekusilingekeni, uzele ukuthembeka. Yena uyazi bona sibunjwe ngani, uyakhumbula bonyana silithuli.’ (IRhubo 103:8, 14) Umema abathobekileko bona babuyele kuye ‘bamukele isirhawu, bazuze umusa, basizeke ngesikhathi esifaneleko.’—Hebheru 4:16; qala ibhoksi elithi  “Ukutjhaphuluka Eenthombeni Zomseme Ezisilapheleko.”

Inengi lamukele isizo lakaZimu. Kghani isizo lakhe liyaphumelela? Tjheja lokho okutjhiwo yiBhayibheli ngalabo abahlule imikghwa emimbi: ‘Nahlanzwa, nacwengiswa, nalungisiswa ebizweni leKosi uJesu Krestu nangomoya kaZimethu.’ (1 Korinte 6:11) Njengompostoli uPowula, abanjalo bangathi: “Ngikghona ukwenza yoke into ngebanga laloyo ongiqinisako.”—Filipi 4:13.

USusan owahlula umukghwa wokubukela iinthombe zomseme ezisilapheleko uthi: “UJehova nguye kwaphela ongakusiza bona ulise umukghwa lo. Newubawa isizo nesinqophiso sakhe, ungaba nobujamo obuhle naye. Angekhe akudanisa.”