Kubayini Kufuze Siphile Ngemithetho YeBhayibhili?
Kubayini Kufuze Siphile Ngemithetho YeBhayibhili?
UMBONO weBhayibhili malungana nomseme uphelelwe sikhathi begodu unombandela ongatlhogekiko? Awa. Ngokuhlukileko, umbono weBhayibhili ngomseme ungasisiza bona sibalekele:
▪ Amalwelwe athathelwana ngomseme
▪ Ukuzithwala ngaphandle komtjhado
▪ Iimphumela ebuhlungu yokuphela kweemtjhado
▪ Ukuba nesazelo esinomlandu
▪ Ukuzizwa ungasi lilitho ngokusetjenziswa kumbi ngabanye
UMbumbi wethu, uJehova uZimu * ufuna sithabe begodu sizuze ekusebenziseni isipho sakhe. UZimu ‘ngiLoyo okufundisa bona uzuze.’ (Isaya 48:17) Umuntu ophila ngeenqophiso zeBhayibhili kwezomseme ufumana:
▪ Ukwamukelwa nguZimu
▪ Ukuthula kwengqondo
▪ Ubuhlobo bomndeni obuqinileko
▪ Uba negama elihle
▪ Nokuzihlonipha
Kuthiwani, nengabe awuphili ngemithetho yeBhayibhili yokuziphatha? Kungakghoneka bona utjhentjhe ukuphila kwakho? UZimu uzokujezisela izenzo zakho zesikhathi esadlulako?
Cabangela iphuzu nanti: Abanye ebebakha ibandla lamaKrestu lekhulu lokuthoma ngaphambilini bebaziimfebe, iimphingi nabantu bobulili obufanako abathandanako. Bakhetha ukutjhentjha ukuphila kwabo, begodu bafumana iinzuzo ezikulu. (1 KwebeKorinte 6:9-11) Namhlanje, iinkulungwana zabantu ephasini mazombe zikhethe okufanako. Zitjhaphulukile ekuziphatheni okumbi begodu zifumana iinzuzo zokwenza ukuziphatha kwazo kuvumelane nemithetho yeBhayibhili. Ngokwesibonelo, tjheja okuhlangabezanwe nakho kwakaSarah, okukhulunywe ngaye esihlokweni sokuthoma.
“Msinyana Ngazizwa Ngitjhaphulukile”
USarah wafumana bona ukuphila umathanda akhenge kumlethele itjhaphuluko nokwaneliseka egade akufuna. Uthi: “Ngezwa bona isazelo sami siba buthundu. Bengineenhloni begodu ngitshwenyekile bona ngingazithwala nofana ngingenwe bulwelwe obumbi. Akhenge ngikhohlwe bona uZimu ukhona, begodu bengazi bonyana indlela yami yokuphila imzwise ubuhlungu. Ngazizwa ngisilaphele, begodu lokho kwangidla.”
Ekugcineni, uSarah wafumana amandla wokutjhentjha ukuphila kwakhe. Wafuna isizo ebabelethini bakhe ababoFakazi BakaJehova. Godu wabawa isizo ebadaleni abafanelekako abamaKrestu ebandleni langekhabo. USarah uthi: “Ngithabile, ngararwa mumusa nethando lababelethi bami nabadala bebandla. Msinyana ngazizwa ngitjhaphulukile.”
Okwanje uSarah ukhulisa abantwabakhe ababili. USarah uthi: “Ngokutjhaphulukileko ngitjela abantwabami ngokukhetha engakwenzako. Ngifuna bazwisise indlela ukungayitjheji imithetho kaZimu okwangithinta ngayo. Umnqophwami kubasiza bona balemuke iinzuzo ukuphila ngomthetho kaZimu malungana nomseme okunazo ngokomzimba, engqondweni nangokwamazizo. Ngiyaqiniseka bona uZimu usinikele imithetho yokuziphatha okuhle ngombana akafuni ukusibona singena engozini.”
Nawe ungezwa iinzuzo zokulandela isinqophiso sakaZimu sethando. IBhayibhili yenza isithembiso nasi: ‘Imithetho yeKosi [uJehova] ilungile, labo abayihloniphako bathabile, imilayo yeKosi ilungile yenza amehlo akhanye. . . . Ukuyihlonipha kuyazuzisa.’—IRhalani 19:8, 11. *
[Imitlolo yaphasi]
^ isig. 8 UJehova libizo lakaZimu mathupha njengombana livezwa eBhayibhilini.
^ isig. 20 Bona ufunde okungeziweko ngesiluleko seBhayibhili esisebenzako, zizwe utjhaphulukile ukuthinta aboFakazi BakaJehova bangekhenu. Namtjhana ungatlolela esiphandeni esifaneleko kwezitjengiswe ekhasini 4 namtjhana uvakatjhele i-Web site yethu ku-www.watchtower.org.
[Umkhangiso osekhasini 8]
Labo abangayitjhejiko imithetho yeBhayibhili kanengi bazibangela ubuhlungu obungokwamazizo
[Umkhangiso osekhasini 9]
Labo abaphila ngemithetho yeBhayibhili banesazelo esihlanzekileko begodu bathabela ubuhlobo bomndeni obuqinileko
