Funda ELizwini LakaZimu

Ungayibona Njani Ikolo Yeqiniso?

Isihlokwesi siphakamisa iimbuzo ongazibuza yona bese sitjengisa lapho ungafumana khona iimpendulo eBhayibhilinakho. AboFakazi BakaJehova bazokuthabela ukucoca nawe ngeempendulwezi.

1. Kunekolo eyodwa kwaphela yeqiniso?

UJesu wafundisa abalandeli bakhe ngekolo eyodwa kwaphela, ikolo yeqiniso. Ifana nendlela eyisa ekuphileni. Malungana nendlela leyo, uJesu wathi: “Balilitjhwana abantu abayifumanako.” (Matewu 7:14) UZimu wamukela kwaphela ikolo esekelwe eLizwini lakhe leqiniso. Boke abakhulekeli beqiniso bamunye ekukhulekeleni okukodwa.—Funda uJwanisi 4:23, 24; 14:6; Kwebe-Efesu 4:4, 5.

2. Kubayini kuneenkolo ezinengi kangaka ezingafaniko ezithi ngezobuKrestu?

Abaporofidi bamala bonakalisa ubuKrestu begodu babusebenzisela iinzuzo zabo. Njengombana uJesu abikezela, bazibonakalisa ‘banjengezimvu’ zakhe kodwana benza njengeempisi ezilambileko. (Matewu 7:13-15, 21, 23) UbuKrestu bamala banda khulu ngemva kokufa kwabapostoli bakaJesu.—Funda IZenzo 20:29, 30.

3. Ngiziphi ezinye izinto ezihlukanisa ikolo yeqiniso?

Abakhulekeli beqiniso bahlonipha iBhayibhili njengeLizwi lakaZimu. Balinga ukuphila ngeenkambisolawulo zalo. Ngalokho-ke, ikolo yeqiniso ihlukile ekolweni esekelwe eembonweni yabantu. (Matewu 15:7-9) Abakhulekeli beqiniso benza lokho abakutjhumayelako.—Funda uJwanisi 17:17; 2 KuThimothi 3:16, 17.

Ikolo yeqiniso ihlonipha ibizo lakaZimu, uJehova. UJesu wenza ibizo lakaZimu laziwa. Wasiza abantu bona bazi uZimu begodu wabafundisa ukuthandazela ibizo lakaZimu bonyana licwengiswe. (Matewu 6:9) La uhlala khona, ngiyiphi ikolo ethuthukisa ukusetjenziswa kwebizo lakaZimu?—Funda uJwanisi 17:26; KwebeRoma 10:13, 14.

  4. Ungayibona njani ikolo yeqiniso?

AmaKrestu weqiniso atjhumayela ngoMbuso kaZimu. UZimu wathumela uJesu bona atjhumayele ngoMbuso. UMbuso kaZimu ukuphela kwethemba lesintu. UJesu waragela phambili atjhumayela ngawo bekwaba sekufeni kwakhe. (Luka 4:43; 8:1; 23:42, 43) Watjela abalandeli bakhe bona batjhumayele ngoMbuso kaZimu. Nekunomuntu okhuluma nawe ngoMbuso kaZimu, ucabanga bona ungowayiphi ikolo?—Funda uMatewu 10:7; 24:14.

Abalandeli bakaJesu abasiyo ingcenye yephasi elimbeli. Abazibandakanyi kwezepolotiki namtjhana ezipini zomphakathi. (Jwanisi 17:16) Godu abalingisi imikghwa yephasi eyingozi neembono yalo.—Funda KaJakobosi 1:27; 4:4.

5. Ngiliphi itshwayo eliyihloko lamaKrestu weqiniso?

AmaKrestu weqiniso anethando ngomunye nomunye. ELizwini lakaZimu afunda ukuhlonipha abantu bazo zoke iintjhaba. Nanyana ikolo yamanga kanengi isekela izipi zeentjhaba ngamandla, abakhulekeli beqiniso bayabhala ukwenza njalo. (Mika 4:1-4) Kunalokho, amalunga wekolo yeqiniso ngokuzithandela asebenzisa isikhathi sawo nezinto zawo eziqalekako ukusiza nokukhuthaza abanye.—Funda uJwanisi 13:34, 35; 1 KaJwanisi 4:20, 21.

Ngisiphi isiqhema esisekela zoke iimfundiso zaso eLizwini lakaZimu, esihlonipha ibizo lakaZimu begodu esitjhumayela ngoMbuso kaZimu njengowukuphela kwethemba lesintu? Ngisiphi isiqhema esinethando nesingayisekeliko ipi? Amaqiniso atjengisa bona boFakazi BakaJehova.—1 KaJwanisi 3:10-12.

Bona ufumane imininingwana engeziweko, qala isahluko 15 sencwadi le, Khuyini Kwamambala Okufundiswa YiBhayibhili?, egadangiswa boFakazi BakaJehova.

[Isithombe ekhasini 16]

“Bazitjhaya sengathi bayamazi uZimu, kodwana izenzo zabo ziyabalandula.”—KuTitosi 1:16.