UZimu wanikela abantu isipho esikhethekileko, ikghono lokukhuluma naye nokuveza amazizwabo kuye ngomthandazo. Umphorofidi uDavida wathandaza, wathi: “Iye, kuwe ozwa imithandazo. Abantu boke beza kuwe.” (IRhubo 65:3) Kufuze sithandaze njani bona uZimu asizwe begodu asibusise?

Imithandazwakho yenza ukghuthulele kuZimu koke okusehliziywenakho, uveze indlela ozizwa ngayo. (IRhubo 62:9) UZimu uyayithanda imithandazo esuka ehliziyweni.

Nanyana uZimu aneziqu ezinengi, unebizo linye. “NginguSomnini [uJehova], libizo lami-ke lelo!” (Isaya 42:8) Ibizo elithi Jehova livela iinkhathi ezizii-7 000 emiTlolweni eCwengileko. Abaphorofidi abanengi babize uZimu ngebizo lakhe. U-Abrahama wathi, “USomnini [uJehova] angangipheleli ihliziyo hle nangikhulumako [nawe] godu.” (Genesisi 18:30) Nathi kufuze sisebenzise ibizo lakaZimu elithi, Jehova nasithandazako.

UZimu uyakwazi esikucabangako nendlela esizizwa ngayo nanyana singakhuluma ngaliphi ilimi. IliZwi lakhe liyasiqinisekisa lithi: “UZimu akakhethi, kodwana kizo zoke iintjhaba umuntu omesabako begodu enze okulungileko uyamukeleka kuye.”—IzEnzo 10:34, 35.

Yeke bona uZimu asibusise sitlhoga okungaphezu kokuthandaza. Eenhlokweni ezilandelako sizokuhlola lokho okufuze sikwenze.